LEVITIKUS 16 - Oshikwanyama Bible (OKYB)

Efiku linene lekwatakanifo

1 Ndele Omwene okwa popya naMoses, ovana vavali vaAron eshi va fya eshi va ehena koshipala shOmwene; 2 nOmwene okwa lombwela Moses ndele ta ti: “Lombwela omumwanyoko Aron nokutya, aha ye mo efimbo keshe monhele iyapuki, nokutya meni loshitukulifoyata koshituviko shekwatakanifo sho shi li koshikefa, opo aha fye, shaashi Ame ohandi holoka moshilemo koshituviko shekwatakanifo. 3 Aron e nokuya monhele iyapuki noinima ei: nomhedi onyasha etimbayambo nodi exwikiloyambo. 4 Ye e nokudjala oshikutu shokoshi shiyapuki sholiina, nodolombuluku yoliina i nokutuvika oulumenhu waye, ndele ye e nokulidika omwiya woshiyata sholiina, nokomutwe waye embale loshiyata sholiina. Oyo oikutu iyapuki. Ndele ye e nokukosha olutu laye momeva noku i djala. 5 Ndele ye e nokutambula keongalo lovana vaIsrael oikombo yoindume ivali etimbayambo nodi imwe exwikiloyambo. 6 Opo nee Aron ta eta omhedi yetimbayambo laye mwene ndele te likwatakanifa nokukwatakanifa yo eumbo laye. 7 Ye e nokukufa yo oikombo oyo ivali noku i tula koshipala shOmwene poshivelo shetwali leongalo. 8 Ndele Aron e nokuumbila oikombo oshihoololifo, oshihoololifo shimwe shOmwene noshihoololifo shimwe kuAshasheli. 9 Opo nee Aron e nokweeta po oshikombo sha hoololelwa Omwene noku shi yamba etimbayambo, 10 ndelenee oshikombo sha hoololelwa Ashasheli shi nokutulwa shi nomwenyo koshipala shOmwene, opo shi kwatakanifwe, nde tashi efiwa shi ye mofuka kuAshasheli.

11 “Opo nee Aron ta etifa ongobe yomhedi yetimbayambo laye ndele te likwatakanifa nokukwatakanifa yo eumbo laye. Ye e nokutoma omhedi yetimbayambo laye. 12 Ye na yadife oshikwatelwa shomundilo nomakala a hanya okoaltari koshipala shOmwene. Ndele pamwe nao oitwiminifo yoimbodi yedimba liwa ya tuwa nawa i fike peke limwe noku i twala meni loshitukulifoyata. 13 Ndele ye e nokutula oitwiminifo komundilo koshipala shOmwene, opo omwifi wetwiminifo u dule okutuvika oshituviko shekwatakanifo sho shi li koshikefa shoundobwedi, opo aha fye. 14 Ndele ye e nokukufa mo mohonde yomhedi noku i shamina nomunwe waye koshituviko shekwatakanifo kombinga yokoushilo. Nokomesho yoshituviko shekwatakanifo ye e nokushamina nomunwe waye ohonde ei luheyali.

15 “Opo nee ye e nokudipaa oshikombo shetimbayambo loshiwana nokutwala ohonde yasho meni loshitukulifoyata nokuninga nohonde ngaashi a ninga nohonde yongobe yomhedi: ye noku i shamina koshituviko shekwatakanifo nokomesho yoshituviko shekwatakanifo. 16 Osho ngaha hano ye e nokukwatakanifa etwali liyapuki omolwonyata yovana vaIsrael nomolwomatauluko avo, heeno, keshe tuu okunyona kwavo. Osho e nokuninga yo molwetwali leongalo, olo li li po puvo mokati komawii avo. 17 Ndele muha kale nande umwe metwali leongalo mefimbo olo Aron ta i mo a ka kwatakanife etwali liyapuki fiyo ye ta di mo, nokwe likwatakanifa nokwa kwatakanifa yo eumbo laye mwene, neongalo alishe laIsrael.

18 “Opo nee ye na dje ko ndele ta i koaltari i li koshipala shOmwene ndele ta ningi ekwatakanifo; ye e nokukufa mohonde yongobe yomhedi nomohonde yoshikombo noku i polola keembinga neembinga adishe doaltari 19 nokushamina nomunwe waye luheyali kuyo. Osho ngaha hano ye e noku i yelifa noku i yapula monyata yovana vaIsrael.

20 “Ndele ye eshi a mana okukwatakanifa onhele iyapuki netwali leongalo noaltari, opo nee ta etifa oshikombo shi nomwenyo, 21 ndele Aron e nokutenheka omake aye avali komutwe woshikombo shi nomwenyo nokuhepaulula opo oilonga aishe ii yovana vaIsrael nomatauluko avo aeshe, heeno, keshe tuu okunyona kwavo. Ye e noku i tula komutwe woshikombo, noku shi tuma nomulumenhu a hoololwa kofuka. 22 Osho ngaha hano oshikombo shi nokuhumbata komutwe washo oilonga yavo aishe ii noku i twala kofuka, ihe novanhu, ndele ye e nokumangulula oshikombo mofuka.

23 “Opo nee Aron e nokuya metwali leongalo nokulidula oikutu yoliina, ei kwa li e i djala, ye eshi a ile monhele iyapuki; ye ne i fiye mo. 24 Ndele ye e nokukosha olutu laye momeva monhele iyapuki nokudjala oikutu yaye. Opo nee ye ta i pondje okuyamba exwikiloyambo loshiwana, opo e likwatakanife nokukwatakanifa oshiwana. 25 E nokuxwika po yo koaltari omakaadi etimbayambo. 26 Ndele ou a twalele Ashasheli oshikombo, e nokukosha oikutu yaye nokukosha olutu laye momeva, opo nee ta shiiva okuuya monhanda. 27 Ndelenee ongobe yomhedi yetimbayambo noshikombo shetimbayambo, ohonde yayo ya etwa konhele iyapuki ngaashi ekwatakanifo, vo ve noku i twala pondje yonhanda. Noipa yayo nonhumba yayo noshandja shayo i nokuxwikwa po momundilo. 28 Ndele ou e i xwika po, e nokukosha oikutu yaye nokukosha olutu laye momeva, opo nee ta shiiva okuuya monhanda.

29 “Ndele oyo nai ninge kunye onghedimhango yaalushe nokutya: mohani onhiheyali mefiku etimulongo lohani, mu nokunyika oluhodi, ihamu longo oilonga yeni, ngee omudalelwamo moshilongo ile omunailongo ha kala mokati keni. 30 Osheshi mefiku tuu olo omupristeli te mu kwatakanifa mu fetwe mo ndele nye tamu fetwa mo komanyonauno aeshe eni koshipala shOmwene. 31 Olo nali ninge kunye efiku letulumuko la wana, ndele nye mu nokunyika oluhodi. Onghedimhango ei oyaalushe. 32 Nomupristeli ou a vaekwa ndele a yapulwa ponhele yaxe moshilonga shoupristeli, ye e nokulandula omufindilo woupristeli a djala oikutu youyambi, 33 nokuwanifa ekwatakanifo kOmuyapukielela. Ye e nokukwatakanifa yo etwali leongalo noaltari, okukwatakanifa omupristeli novanhu aveshe vomeongalo. 34 Ndele oyo i nokukala kunye onghedimhango yaalushe okukwatakanifa ovana vaIsrael molwomatimba avo aeshe lumwe momudo keshe.” Ndele vo va ninga, Omwene ngaashi a lombwela Moses.