LEVITIKUS 14 - Oshikwanyama Bible (OKYB)

Omhango yokuyelifa ovanashilundu

1 Omwene okwa popya vali naMoses ndele ta ti: 2 Oyo omhango yomunashilundu mefiku lokufetwa mo kwaye. Ye e nokutwalwa komupristeli, 3 nomupristeli e nokuya pondje yonhanda. Omupristeli ngeenge ta mono oudu woshilundu wa veluka, wa efa omunashilundu, 4 omupristeli e nokulombwela ovakwao, vo va etele omuyelifwa eedila mbali di nomwenyo da koshoka nomuti wasederi, ongodi itilyana omheke naisopi. 5 Omupristeli ne va lombwele va dipaele odila imwe kombada yoshiyuma shelova musho mu nomeva mawa a yela. 6 Ye e nokukufa odila i nomwenyo nosho yo omuti wasederi nongodi itilyana omheke naisopi, oyo pamwe nodila i nomwenyo ye e noku i tula mo mohonde yodila ya dipaelwa kombada yoshiyuma shi nomeva mawa a yela. 7 Ndele ye e nokushamina ou e nokufetwa mo moudu woshilundu luheyali, noku mu ingidila eveluko, nodila i nomwenyo ye e noku i efa i tuke i ye noixwa. 8 Opo nee ou ta fetwa mo e nokukosha oikutu yaye nokukululifa eexwiki dokomutwe nokulikosha. Opo nee ye a yela, ndele ta dulu okuuya monhanda, ndelenee e nokukala omafiku aheyali pondje yetwali laye. 9 Nomefiku etiheyali e nokukulula eexwiki adishe, eexwiki dokomutwe neendjedi neefeleisho, heeno, eexwiki daye adishe, ndele ye e nokukosha oikutu yaye, nolutu laye e noku li kosha momeva. Opo nee ye ta ka kala a yela.

10 Ndele mefiku etihetatu e nokukufa oudjona vavali vehe noshipo nokadjona okakadi komudo umwe kehe noshipo ndele e nokukufa oufila wa nakwa u fike peekilograma nhatu ngaashi eendjayambo mwa pilulilwa omaadi, nomaadi oshitatu sholita. 11 Nomupristeli ou ta fetifa na tule omunhu ou e nokufetwa mo neeshali daye koshipala shOmwene poshivelo shetwali leongalo. 12 Nomupristeli e nokukufa odjona imwe ye e i ete okuvelombediyambo pamwe nomaadi oshitatu sholita ndele te i dungadungifa koshipala shOmwene ngaashi edungadungifwayambo. 13 Opo nee ta dipaele odjona monhele apa hava tomene etimbayambo nexwikiloyambo, monhele iyapuki. Osheshi okuvelombediyambo ngaashi etimbayambo otai ningi yomupristeli. Olo liyapukielela. 14 Nomupristeli e nokukufa ohonde imwe yokuvelombediyambo, nomupristeli e noku i polola kokutwi kwokolulyo kwaau ta ka fetwa mo, nokomunwe wakula wokeke laye lokolulyo nokomunwe waye wakula wokomhadi yaye yokolulyo. 15 Omupristeli e nokukufa mo mulo omaadi noku a tila meke lomupristeli lokolumosho. 16 Opo nee omupristeli e nokutwa omunwe weke lokolulyo momaadi aa e li meke lokolumosho nokushamina omaadi nomunwe waye luheyali koshipala shOmwene. 17 Ndelenee momaadi aa a xupa po aa e li meke laye, omupristeli e nokupolola okutwi kwokolulyo kwaau ta fetwa mo, ndele komunwe waye wakula wokeke lokolulyo nokomunwe waye wakula wokomhadi yaye yokolulyo kombada yohonde yokuvelombediyambo. 18 Omaadi aa a xupa po e li meke lokolumosho lomupristeli, ye e noku a vaeka komutwe waau ta ka fetwa mo. Osho ngaha hano omupristeli e noku mu kwatakanifa koshipala shOmwene. 19 Omupristeli e nokuyamba yo etimbayambo nokukwatakanifa ou ta ka fetwa mo omolwoudu waye. Opo nee ye ta tomo exwikiloyambo. 20 Nomupristeli e nokuyamba exwikiloyambo neendjayambo koaltari. Osho ngaha hano omupristeli e noku mu kwatakanifa, ndele ye ota ka kala a yela.

21 Ndelenee ye ngeenge ohepele noita dulu oku i futa, ye e nokukufa odjona imwe okuvelombediyambo li dungadungifwe, li mu kwatakanife. Ndele pamwe nayo e nokweeta eendjayambo oufila wa nakwa u fike pokilograma imwe wa pilulilwa omaadi, nomaadi oshitatu sholita. 22 Nosho yo omalyamono avali ile eenghutyona mbali odo nge ye ta dulu okulilandela. Ndele imwe yomudo tai ka ninga etimbayambo naikwao exwikiloyambo. 23 Ye e noku di eta komupristeli mefiku etihetatu lokufetwa mo kwaye, poshivelo shetwali leongalo koshipala shOmwene. 24 Nomupristeli e nokukufa odjona yokuvelombediyambo nomaadi. Ndele omupristeli e noku i dungadungifa koshipala shOmwene ngaashi edungadungifwayambo. 25 Opo nee ye e nokudipaa odjona yokuvelombediyambo, nomupristeli e nokukufa mohonde yokuvelombediyambo noku i polola kokutwi kwokolulyo kwaau ta fetwa mo nokomunwe wakula wokeke lokolulyo nokomunwe wakula wokomhadi yokolulyo; 26 omupristeli e nokutila mo yo omaadi meke lokolulyo laye. 27 Opo nee omupristeli e nokushamina nomunwe wokeke lokolulyo luheyali omaadi e li meke laye lokolumosho, koshipala shOmwene. 28 Nomaadi aa e li meke laye omupristeli e nokupolola okutwi kwokolulyo kwaau ta fetwa mo, nokomunwe wakula wokeke lokolulyo nokomunwe wakula wokomhadi yaye yokolulyo, kombada yonhele yohonde yokuvelombediyambo. 29 Oo a xupa po komaadi omeke lomupristeli e noku a vaeka komutwe waau ta fetwa mo, ye opo e mu kwatakanife koshipala shOmwene. 30 Opo nee ye e nokuyamba elyamono limwe ile onghutyona imwe oyo a dula okulilandela, 31 imwe etimbayambo naikwao exwikiloyambo pamwe neendjayambo. Osho ngaha hano omupristeli e nokukwatakanifa ou ta fetwa mo koshipala shOmwene. 32 Oyo omhango yaau e noudu woshilundu oo ita dulu okuyandja omaano oo a ufilwa ewapaleko laye.

Oudu woshilundu womomaumbo

33 Omwene okwa popya vali naMoses naAron ndele ta ti: 34 Onye ngeenge tamu tula medu laKaanan, olo handi ke mu pa ngaashi leni vene, ndele Ame handi tumu oudu woshilundu meumbo limwe lomoshilongo sheni, 35 mwene weumbo e nokuuya okulombwela omupristeli ndele ta ti: “Eumbo lange ola fa li noudu woshilundu.” 36 Nomupristeli ne va lombwele vo va tute mo aishe yomeumbo, fimbo omupristeli ine uya okutala oudu, opo aishe ei i li meumbo iha kwatwe koudu. Opo nee omupristeli te uya okukonakona eumbo. 37 Ye ngeenge ta konakona oudu ndele ta mono nokutya, oudu u li momakuma eumbo ngaashi ounhele va laula ngaashi oulaule womafo nova tilyana, ndele va footela, 38 opo nee omupristeli e nokudja mo nokuya koshivelo noku shi idila po omafiku aheyali. 39 Mefiku etiheyali omupristeli e nokwaaluka. Ye ngeenge ta mono oudu wa tandavela momakuma eumbo, 40 opo nee omupristeli te va lombwele va natule mo omamanya muwo mu noudu, ndele ve a ekeleshi koshala pondje yoshilando. 41 Eumbo lovene oli nokuyavwa meni keembinga adishe nokweekelashi omunoko ve u yaa, koshala pondje yoshilando. 42 Opo nee ve nokukufa omamanya amwe noku a tula ponhele yomamanya enya nove nokukufa omunoko umwe va kolonge eumbo.

43 Ndelenee oudu ngeenge tau holoka vali meumbo, vo eshi va natula omamanya nokuyaa eumbo nove li kolonga nomunoko, 44 omupristeli e nokuuya ndele ye ngeenge ta mono oudu wa tandavela meumbo; opo nee meumbo omu noudu woshilundu shidjuu. Olo inali yela. 45 Onghee hano ve nokungumauna po eumbo, omamanya alo noiti yalo nomunoko aushe womeumbo, ndele vo ve noku i twala koshala pondje yoshilando. 46 Ndele ou te uya meumbo fimbo lo la li la patwa, ye e nokukala ina yela fiyo onguloshi. 47 Naau ta nangala meumbo olo, e nokukosha oikutu yaye; naau ta li meumbo olo, e nokukosha oikutu yaye. 48 Ndelenee omupristeli ngeenge te uya, ndele ta mono oudu inau tandavela vali meumbo, olo eshi la kolongululwa, opo nee omupristeli te va shiivifile nokutya, eumbo ola yela, osheshi onhele omu mwa li oudu ya yela.

49 Opo nee ye na kufe eedila mbali molweyelifo leumbo, nosho yo omuti wasederi, ongodi itilyana omheke naisopi, 50 nokudipaela odila imwe moshiyuma shelova shi nomeva mawa a yela. 51 Opo nee ye e nokukufa omuti wasederi naisopi nongodi itilyana omheke nodila i nomwenyo, noku i yaveka mohonde yodila ya dipawa nomomeva a yela shekesheke. Ndele ye e nokushamina eumbo luheyali. 52 Osho ngaha hano ye e nokuyelifa eumbo nohonde yodila nomeva mawa a yela nodila i nomwenyo nomuti wasederi naisopi nongodi itilyana omheke. 53 Opo nee ta efa odila i nomwenyo pondje yoshilando i tuke, i ye noixwa. Osho ngaha hano ye e nokukwatakanifa eumbo, ndele olo tali ka kala la yela.

54 Oyo hano omhango youdu keshe woshilundu noyomavangwa taa nyu, 55 noyoshilundu shomoikutu noshomomaumbo 56 noyoidinda noyeembulwa noyevangwa la mbuduka, 57 oku va longa onaini oinima ya kwatwa koudu nonaini ya yela. Oyo omhango youdu woshilundu.