LEVITIKUS 13 - Oshikwanyama Bible (OKYB)

Omhango youdu woshilundu

1 Omwene okwa popya vali naMoses naAron ndele ta ti: 2 Moshipa shomunhu ngeenge tamu holoka ombulwa ile evangwa ile okavangwa ka toka, ngaashi oudu woshilundu tau hovele moshipa shombelela yaye, ye e nokutwalwa komupristeli Aron ile komona waye umwe womupristeli. 3 Nomupristeli e nokutala onhele ei i noudu womoshipa shaye. Olududi lomevangwa ngeenge olitoka noshipa ngeenge sha footela opo, eshi osho nee oudu woshilundu. Omupristeli ngeenge te shi mono e noku mu lombwela, nokutya okwa nyata. 4 Ndelenee moshipa ngeenge omu nevangwa litoka, ndele lo inali footela nolududi lomulo, inali toka, omupristeli e nokwiidilila mo omunaudu mefimbo li fike pomafiku aheyali. 5 Omupristeli ngeenge te mu konakona mefiku etiheyali, ndele ta mono nokutya, evangwa pakutala kwaye, oli li ngaashi la kala, evangwa inali tandavela moshipa, opo nee omupristeli e noku mu idilila mo vali omafiku aheyali. 6 Omupristeli ne mu konakone vali mefiku etiheyali, nongeenge ta mono evangwa la mbuduka noinali tandavela moshipa, opo nee omupristeli te mu lombwele nokutya ke noshilundu. Olo evangwa longaho; na koshe oikutu yaye, opo ta kala a yela. 7 Ndelenee evangwa ngeenge tali tandavele moshipa shaye konima yeliulikilo lomupristeli opo a talwe a yela, ye a nokuliulikila vali omupristeli. 8 Omupristeli ngeenge ta mono nokutya, evangwa la tandavela moshipa, opo nee omupristeli e noku mu tongola nokutya ou oo oudu woshilundu.

9 Oudu woshilundu ngeenge u li momunhu, ye e nokutwalwa komupristeli. 10 Nomupristeli ngeenge ta mono nokutya, moshipa omu nombulwa itoka, olududi lomuyo la toka fimbo onhumba tai umhuka mo mombulwa, 11 opo nee oo oudu woshilundu shikulu moshipa shaye, onghee hano omupristeli e noku mu tongola. Ye ine mu idilila mo vali, shaashi ye ina yela. 12 Ndelenee oudu woshilundu ngeenge tau holoka neenghono moshipa nokutandavela moshipa ashishe shomunaudu okudja komutwe waye fiyo okeemhadi daye, ngaashi omupristeli ta koneke mokutala kwaye; 13 omupristeli ngeenge ta mono oudu woshilundu wa tuvika olutu alushe, opo nee ye ta lombwele omunaudu nokutya, ye a yela; ye okwa toka kolutu alishe, ye a yela. 14 Ndelenee shamha pa monika onhumba tai umhuka mo mombulwa, ye ta ka tongolwa, ye ina yela. 15 Nomupristeli ngeenge ta mono onhumba ya umhuka mo mombulwa, ye e noku mu tongola. Onhumba ya umhuka, oyo ya nyata, oyo oudu woshilundu. 16 Ndelenee onhumba ya umhuka ngeenge ya dja po ndele ye ta toka, ye e nokuya komupristeli. 17 Omupristeli ngeenge te mu konakona ndele ta mono nokutya, ombulwa ya toka, opo nee omupristeli e nokulombwela omunaudu: “wa yela.” Oye a yela.

18 Ndelenee moshipa shomunhu ngeenge tamu holoka oshidinda, ndele tashi veluka, 19 ndelenee monhele yoshidinda ngeenge tamu holoka ombulwa itoka ile evangwa litoka litilyana, ye e nokuliulikila omupristeli. 20 Omupristeli ngeenge ta mono nokutya, sho osha footela, nolududi lomusho la toka, opo nee omupristeli e noku mu shiivifila ye e noudu woshilundu, wa holoka moshidinda. 21 Ndelenee omupristeli ngeenge te shi konakona, ndele musho muhe nolududi litoka noinashi footela nosha mbuduka, opo nee omupristeli e noku mu idilila mo omafiku aheyali. 22 Nongeenge oudu wa tandavela shili moshipa, omupristeli e noku mu shiivifila ye e noudu. Owo oudu woshilundu. 23 Ndelenee ombulwa ngeenge tai kala po itai tandavele, oyo oshivadi shoshidinda, nomupristeli e noku mu shiivifila nokutya, ye a yela.

24 Ile ngeenge monhumba, nokutya moshipa omu nonhele ya pya komundilo nonhumba ipe yomonhele ya pya itilyana ile itoka, 25 nomupristeli ote i konakona, ndele ta mono nokutya, olududi lomevangwa la mbuduka litoka nola footela, opo nee owo oudu woshilundu. Monhele ya pya owa holoka. Onghee hano omupristeli e noku mu shiivifila ye e noudu. Owo oudu woshilundu. 26 Ndelenee omupristeli ngeenge te li konakona, ndele ta mono nokutya, mevangwa la toka muhe nolududi litoka ndele inali footela ndele la mbuduka, opo nee omupristeli e noku mu idilila omafiku aheyali. 27 Opo nee omupristeli e noku mu konakona mefiku etiheyali. Owo ngeenge wa tandavela shili moshipa, omupristeli e noku mu shiivifila ye e noudu. Oo oudu woshilundu. 28 Ndelenee evangwa litoka ngeenge la kala ngaashi la li, inali tandavela moshipa nola mbuduka, opo lo oshivadi shoshipute shomundilo. Onghee hano omupristeli e noku mu shiivifila ehe noudu. Olo oshivadi shoshipute shomundilo.

29 Natango ngeenge momulumenhu ile momukainhu tamu holoka evangwa momutwe ile meendjedi, 30 nomupristeli te li konakona ndele ta mono lo la footela nomulo omu noulududi vanini va twima, opo nee omupristeli te mu shiivifile, ye e noudu. Olo evangwa tali nyu, lo oudu woshilundu wokomutwe ile womeendjedi. 31 Ndelenee omupristeli mokukonakona kwaye evangwa tali nyu, ngeenge ta mono nokutya, lo ola footela ndele mulo muhe nolududi lilaula, opo nee omupristeli e nokwiidilila mo ou e nevangwa tali nyu, a kale a idililwa omafiku aheyali.

32 Omupristeli ngeenge ta konakona mefiku etiheyali evangwa ndele ta mono nokutya, evangwa tali nyu inali tandavela nomulo muhe nolududi la mbuduka, nevangwa tali nyu inali footela, 33 opo nee omunhu e nokulikulula ndelenee onhele yevangwa ite i kulula, nomupristeli e nokwiidilila mo vali omunhu e nevangwa tali nyu, a kale mo omafiku aheyali a idililwa. 34 Mefiku etiheyali omupristeli ngeenge ta konakona evangwa tali nyu ndele ta mono nokutya, evangwa inali tandavela moshipa ndele inali footela, opo nee omupristeli e noku mu shiivifila, ye ke noudu woshilundu, ndele ye e nokukosha oikutu yaye ndele ta kala a yela. 35 Ndelenee evangwa tali nyu ngeenge tali tandavele shili moshipa konima ye eshi a shiivifilwa nokutya, ye a yela, 36 nomupristeli te li konakona ndele ta mono nokutya, evangwa tali nyu la tandavela moshipa, omupristeli ita tale vali olududi la mbuduka; ye e noudu woshilundu. 37 Ndelenee evangwa tali nyu, ngeenge pakutala kwaye, la kala ngaashi la li nolududi lilaula tali kulu mulo, opo nee evangwa ola veluka. Ye a yela, nomupristeli e noku mu shiivifila ye ke noudu.

38 Natango moshipa shomulumenhu ile shomukainhu ngeenge tamu monika omavangwa, omavangwa a toka, 39 nomupristeli ota mono nokutya, moshipa shavo omu nomavangwa a mbuduka a toka, opo nee oo omavangwa ongaho a holoka moshipa. Ye a yela.

40 Ndele omutwe womulumenhu ngeenge tau duduka eexwiki, ye omutwe wongwala, oye a yela. 41 Ndele omutwe waye ngeenge tau duduka eexwiki koshipala, oye e nongwala. Ye a yela. 42 Ndelenee mongwala yaye yokekofi ile yokoshipala ngeenge tamu holoka okanhele ka tilyana noka toka, opo nee oo oudu woshilundu wa holoka mongwala yaye yokekofi ile yokoshipala. 43 Omupristeli ngeenge te ka tale ndele ta mono ombulwa mongwala yokekofi ile yokoshipala i tilyana noi toka ngaashi oudu woshilundu moshipa, 44 opo nee ye omunashilundu, ye ina yela, omupristeli e noku mu tongola mo shili, ye e noudu komutwe waye.

45 Natango, oikutu yomunashilundu ou e noudu i nokukala ya pombaulwa, neexwiki daye dokomutwe di nokweendjelela. Ye e nokutuvika yo eendjedi daye nokwiingida: “Omunashilundu! Omunashilundu!” 46 Ye ta kala ina yela, fimbo oudu u li muye. Ye omunashilundu. E nokulikalela. Ye e nokulikalela pondje yonhanda.

47 Oudu woshilundu ngeenge tau holoka moshikutu sholududi ile sholiina, 48 ile meengodi da poshelwa kumwe ile momutonyeno woliina ile wolududi ile moshipa nakeshe eshi sha hondjelwa oshipa, 49 ndele onhele ya hangika koudu i li moshikutu ile moshipa ile meengodi da poshelwa kumwe ile momutonyeno ile mushimwe sha hondjelwa oshipa, hano onhele ei ngeenge ya fa omafo a hapa ile i tilyana, opo nee oo oudu woshilundu, vo ve i ulikila omupristeli. 50 Omupristeli e nokukonakona onhele ya hangika noudu nokutuvikila oinima ya hangika noudu omafiku aheyali. 51 Opo nee mefiku etiheyali ye e nokukonakona onhele. Oudu ngeenge wa tandavela moshikutu ile meengodi da poshelwa kumwe ile momutonyeno ile moshipa shamha oshilonga oshipa tashi longifwa, opo owo oudu, oudu woshilundu shidjuu. Yo inai yela. 52 Onghee hano ye e nokuxwika po oshikutu ile eengodi da poshelwa kumwe ile omutonyeno wolududi ile woliina ile oinima imwe muyo mu nonhele ya hangika noudu. Osheshi owo oudu woshilundu shidjuu. Oyo i nokuxwikwa po momundilo. 53 Ndelenee omupristeli ngeenge ta mono onhele ya hangika moshikutu ile meengodi da poshelwa kumwe ile momutonyeno ile moinima imwe, nokutya inai tandavela, 54 opo nee omupristeli e noku va lombwela vo ve nokukosha oshinima nonhele muyo sha hangika. Ndele ye e noku shi idilila mo natango omafiku aheyali. 55 Omupristeli ngeenge ta konakona oshinima sha hangika noudu, sho eshi sha koshwa, ndele ta mono onhele naanaa osho i li, nande inai tandavela, opo nee sho inashi yela. Ye e noku shi xwika po momundilo. Osho oudu woshilundu ngeenge kombada ile meni. 56 Ndelenee omupristeli ngeenge ta mono kutya onhele oyo eshi ya koshwa, oya mbuduka, opo nee ye e noku i konda mo moshikutu ile moshipa ile meengodi da poshelwa kumwe ile momutonyeno. 57 Ndelenee oo ngeenge tau holoka vali moshikutu ile meengodi da poshelwa kumwe ile momutonyeno ile moinima imwe ya longwa noshipa, opo nee oo oudu woshilundu wa holoka vali. Ye e nokuxwika momundilo oshinima sha hangika noudu. 58 Ndelenee oshikutu ile eengodi da poshelwa kumwe ile omutonyeno ile oshinima shimwe sha koshwa, onhele ngeenge ya dja mo, sho shi nokukoshwa vali lumwe, opo tashi ka kala sha yela.

59 Oyo omhango youdu woshilundu wa li moshikutu sholududi ile sholiina ile meengodi da poshelwa kumwe ile momutonyeno ile moshinima shimwe shoshipa, opo shi tongwe ngeenge sha yela ile inashi yela.