Omhango yepitilo pondje yomwali
1 Omwene okwa popya vali naMoses ndele ta ti: 2 Lombwela ovana vaIsrael u tye: Omukainhu ngeenge a ninga oufimba ngeenge a dala okaana okamati, ye e nokukala ina yela oule womafiku aheyali. Omafiku e fike pokumona ohani yaye e nokukala ina yela. 3 Ndele mefiku etihetatu okaana okamati ke noku ka tetwa oshipa shonhele youlumenhu wako. 4 Ndelenee omudali e nokukala meumbo omafiku omilongo nhatu naatatu fimbo oumwali waye tau oka. Na kale iha kumu sha shoshiyapuki ndele ita i ketwali liyapuki fiyo omafiku oumwali waye a pwa. 5 Ndelenee ye ngeenge ta dala okaana okakadona, ye e nokukala oivike ivali mokuhayela kwaye ngaashi moumwali. Opo nee ye e nokukala omafiku omilongo hamano naahamano moumwali waye. 6 Nomafiku oumwali konima yokudala okaana okamati ile okakadona, ngeenge a pwa, ye na ete odi yomudo umwe exwikiloyambo komupristeli nokanghutyona ile onghuti molwetimbayambo poshivelo shetwali leongalo. 7 Ye e noku i yamba koshipala shOmwene noku mu kwatakanifa. Opo nee ye ota ka kala a koshoka ketiko lohonde yaye. Oyo omhango yomudali wokaana okamati ile okakadona. 8 Ndelenee ye ngeenge ohepele iha dulu okulilandela odjona, ye e nokukufa omalyamono avali ile eenghutyona mbali, imwe exwikiloyambo naikwao etimbayambo. Nomupristeli e noku mu kwatakanifa. Opo nee ye ota kala a koshoka.
© Oshikwanyama Bible Revised © Bible Society of Namibia, 2008, 2012.
