Ovapristeli tava hangika kehandu laKalunga
1 Ndele Nadab naAbihu, ovana ovamati vaAron, va kufa, keshe umwe, oshikwatelwa shomundilo, ndele va shakala mo omundilo nova tula ko oitwiminifo, ndele va eta koshipala shOmwene omundilo wa nyata, ou Ye ine u va lombwela. 2 Opo nee omundilo wa dja koshipala shOmwene, ndele we va lungwinifa po, nova fila koshipala shOmwene. 3 Opo nee Moses ta ti kuAron: “Eshi osho tuu osho Omwene e shi tile, eshi ta ti: ‘Mwaava ve li popepi naame, Ame nda hala okushiivifa ouyapuki wange nomoipafi yovanhu aveshe nda hala okulifimanekifa.’ ” Ndelenee Aron okwa mwena. 4 Ndele Moses okwa ifana Mishael naElsafan, ovana ovamati vaUsiel, xekulu yaAron, nokwe va lombwela: “Eheneni oku, ovamwaxo va kufeni metwali liyapuki mu va twale pondje yonhanda.” 5 Opo vo va ehena popepi nove va twala noikutu yavo yokoshi pondje yonhanda ngaashi Moses a tonga. 6 Opo nee Moses okwa lombwela Aron novana vaye ovamati Eliaser naItamar: “Taleni, muha efele eexwiki dokomutwe di endjelele, ndele inamu pombaula oikutu yeni, opo muha fye, nehandu laye liha hange eongalo alishe. Ndelenee ovamwaxo, eumbo alishe laIsrael nali lilile epeya eli la temwa kOmwene. 7 Nye inamu dja po poshivelo shetwali leongalo, muha fye. Osheshi omaadi evaeko lOmwene e li munye.” Ndele vo ova ninga paendjovo daMoses.
8 Ndele Omwene okwa lombwela Aron ndele ta ti: 9 “Ove novana voye ovamati inamu nwa omaviinyu ile oikolwifa nye ngeenge tamu i metwali leongalo, muha fye. Oyo onghedimhango yaalushe yomomaludalo eni. 10 Ndele nye mu nokutongola eshi shiyapuki nashi shihe fi shiyapuki, naashi sha koshoka nashi inashi koshoka, 11 ndele nye mu nokulonga ovana vaIsrael eenghedimhango adishe Omwene e di va shiivifila mokanya kaMoses.” 12 Ndele Moses okwa popya naAron novana vaye ovamati Eliaser naItamar, ava va xupa po, ndele ta ti: “Kufeni eendjayambo da xupa po komindiloyambo dOmwene, ndele di lyeni po ngaashi oikuki ihe nonhafi poaltari. Osheshi odo diyapukielela. 13 Onghee hano mu noku di lila monhele iyapuki, osheshi odo oshipewa shoye shovana voye ovamati shokomindiloyambo dOmwene. Eshi osho nda lombwelwa. 14 Nosho yo ombadja yedungadungifwayambo noshilama sheyelulwayambo nye mu noku i lila monhele iyapuki, ove pamwe novana voye ovamati noukadona. Shaashi ngaashi oshipewa shoye noshovana voye ovamati mwe shi pewa komapanduloyambo ovana vaIsrael. 15 Oshilama sheyelulwayambo nombadja yedungadungifwayambo pamwe noipambu nomakaadi omundiloyambo, vo ove nokudungadungifa koshipala shOmwene ngaashi edungadungifwayambo. Ndele olo tali ka ninga oshitukulwa shoye novana voye ovamati pamwe naave fiyo alushe, Omwene ngaashi a popya.”
16 Ndele Moses okwa konga nokukongelela oshikombo shetimbayambo, ndelenee tashi xwikwa po! Onghee hano ye okwa handukila unene Eliaser naItamar, ovana ovamati vaAron, ava va xupa po, ndele ye okwa tile: 17 “Omolwashike etimbayambo inamu li lila monhele iyapuki? Osheshi olo liyapukielela, ye okwe li mu pa omanyonauno eongalo a kufwe po, oku va kwatakanifa koshipala shOmwene. 18 Taleni, ohonde yalo inai etwa mo metwali liyapuki. Nye mu noku li lila shili metwali liyapuki ngaashi nde mu lombwela.” 19 Opo nee Aron ta ti kuMoses: “Tala, vo ova eta nena eli etimbayambo lavo nexwikiloyambo lavo koshipala shOmwene, noinima ya tya ngaha ya hanga nge. Ame ngeenge handi li nena etimbayambo, otashi wapalele tuu Omwene?” 20 Moses, eshi e shi uda, oshe mu wapalela.
© Oshikwanyama Bible Revised © Bible Society of Namibia, 2008, 2012.
