JOSUA 4 - Oshikwanyama Bible (OKYB)

Omadimbulukifomanya muJordan nomuGilgal

1 Oshiwana ashishe eshi sha taulula Jordan, Omwene okwa popya naJosua ndele ta ti: 2 “Hoololeni movanhu ovalumenhu omulongo navavali, mepata keshe omulumenhu umwe, 3 ndele va lombwela u tye: kufeni po opo pokati kaJordan monhele apa eemhadi dovapristeli da kala ofika, omamanya omulongo naavali, mu ye nao ndele ke a dikeni konhele oko tamu ka nangala.” 4 Opo nee Josua okwa ifana ovalumenhu omulongo navavali, ava e va hoolola movana vaIsrael, omulumenhu umwe womepata keshe. 5 Ndele Josua okwe va lombwela: “Indeni komesho yoshikefa shOmwene Kalunga keni fiyo omokati kaJordan ndele lekeni, omulumenhu keshe, emanya limwe kepepe laye, pamuvalo womapata ovana vaIsrael, 6 opo a ninge edidiliko mokati keni. Ovana veni ngeenge tave mu pula komesho ndele tava ti: Omamanya aa otae mu tile shike? 7 Nye mu noku va lombwela: Osheshi omeva aJordan a tukuka komesho yoshikefa shehangano lOmwene mokutauluka kwasho Jordan, omeva aJordan a tukuka. Onghee hano omamanya aa a ninga edidiliko kovana vaIsrael fiyo alushe.” 8 Ovana vaIsrael osho va ninga ngaashi Josua e va lombwela. Vo ova toola mokati kaJordan omamanya omulongo naavali, ngaashi Omwene a popya naJosua, pamuvalo womapata ovana vaIsrael. Ndele vo ove a twala pamwe navo konhele oko va nangala ndele oko ve a tula.

9 Josua okwa dika yo mokatielela kaJordan omamanya omulongo naavali monhele apa eemhadi dovapristeli, va humbata oshikefa shehangano, da li ofika. Ndele fiyo onena eli oko e li. 10 Novapristeli ava va humbata oshikefa va kala ofika mokati kaJordan fiyo ashishe sha wanifwa eshi Josua e shi lombwelwa kOmwene, e shi lombwele ovanhu, ashishe ngaashi Moses e shi lombwela Josua. Ndele ovanhu va taulula diva. 11 Ndele ovanhu aveshe eshi va taulula, oshikefa shOmwene pamwe novapristeli osha taulula, ndele tashi i komesho yovanhu. 12 Novana vaRuben novana vaGad netata lepata laManasse ova taulula ndele va pita komesho yovana vaIsrael ngaashi Moses e va lombwela. 13 Pakuvalwa ngeno omayovi omilongo nhee va homatekwa okuhomona oita, ova taulula nokweenda koshipala shOmwene va lwe momaluhaela aJeriko.

14 Mefiku tuu olo Omwene okwa tumbalekifa Josua moipafi yOvaisraeli aveshe, vo ove mu tila ngaashi va li hava tila Moses momafiku aeshe omokukala kwaye.

15 NOmwene okwa popya naJosua ndele ta ti: 16 “Lombwela ovapristeli ava hava humbata oshikefa shoundobwedi, va londe mo muJordan.” 17 Opo nee Josua okwa lombwela ovapristeli ndele ta ti: “Djeni mo muJordan.” 18 Ndele ovapristeli ava va humbata oshikefa shehangano lOmwene, eshi va dja mo mokati kaJordan, noififinwa yeemhadi davo ya lyata poukukutu, omeva aJordan a shuna monhele yao, ndele a kunguluka fiyo okominghulo dao adishe ngaashi nale. 19 Ndele mefiku etimulongo lohani yotete ovanhu ova dja mo muJordan, ndele va onga onhanda muGilgal pongaba yaJeriko yokoushilo. 20 Nomamanya enya omulongo naavali vo ve a kufa mo muJordan, Josua e a dika muGilgal. 21 Ndele ye okwa popya novana vaIsrael ndele ta ti: “Ovana veni momafiku okomesho ngeenge tava pula kooxo, tava ti: Omamanya aa otaa ti shike? 22 Nye mu noku va shiivifila mu tye: Ovaisraeli va taulula Jordan va enda poukukutu, 23 osheshi Omwene Kalunga keni okwe mu pwiininifila omeva aJordan, fiyo mwa taulula ngaashi Omwene Kalunga keni a ninga nEfuta Litilyana, olo ye e li tu pwiininifila fiyo twa taulula, 24 opo oiwana aishe kombada yedu i shiive nokutya, eke lOmwene oli neenghono, opo nye mu kale nokutila alushe Omwene Kalunga keni.”