JOSUA 22 - Oshikwanyama Bible (OKYB)

Omapata taa shuna koilando yao

1 Opo nee Josua okwa ifana Ovarubeni nOvagad netata lepata lOvamanasse 2 ndele ta ti kuvo: “Nye mwa diinina ashishe eshi Moses, omupiya wOmwene, e mu lombwela, ndele mwa uda nge mwaashishe nde shi mu lombwela. 3 Nye inamu efa oovakweni mefimbo eli lile fiyo onena, ndelenee mwa diinina oshipango eshi mwe shi lombwelwa kOmwene Kalunga keni. 4 Ndelenee paife Omwene Kalunga keni a pa ovamwanyoko etulumuko ngaashi Ye e va udanekela. Hano shuneni mu ye komatwali eni koshilongo mwe shi pewa kuMoses, omupiya waKalunga, kombada yaJordan. 5 Ashike diinineni shili oshipango nomhango ei, Moses omupiya wOmwene, e mu lombwela mu kale nokuhola Omwene Kalunga keni nokweenda neendjila daye adishe nokudiinina oipango yaye nokukanyatela muye noku mu longela nomutima weni aushe nomwenyo weni aushe.” 6 Opo nee Josua okwe va nangeka noupuna ndele te va lekele. Ndele vo ova ya komatwali avo.

7 Ndelenee etata limwe lepata laManasse, Moses okwe li pa oshitukulwafyuululwa muBasan, netata likwao lepata, Josua okwe li pa oshitukulwa pamwe novamwaina, kombinga ei yaJordan mouninginino. Ndele Josua eshi e va lekela va ye komatwali avo, ye okwe va nangeka yo noupuna, 8 nokwa popya navo ndele ta ti: “Shuneni ko komatwali eni noupuna muhapu neemhunga doimuna noshisiliveli noshingoldo noshikushu noshivela noikutu ihapu. Oixuulwa yokovatondadi veni i liyandjeleni novamwanyoko.”

9 Osho ngaha hano ovana vaRuben novana vaGad netata lepata laManasse va shuna ndele va dja po povana vaIsrael muSilo, osho shi li medu laKaanan, va ya kedu laGilead, koshilongo shavo oko va pewa oshitukulwalongo shavo kuMoses palombwelo lOmwene. 10 Ovana vaRuben novana vaGad netata lepata laManasse eshi ve uya koyuunda yomamanya puJordan, ei i li medu laKaanan, ova tunga ko oaltari puJordan, oaltari inene unene. 11 Ndelenee ovana vaIsrael eshi va uda tapa tiwa: Taleni, ovana vaRuben novana vaGad netata lepata laManasse, ova tunga oaltari ya shaama nedu laKaanan poyuunda yopuJordan kombinga yovana vaIsrael, 12 ovana vaIsrael eshi ve shi uda, eongalo alishe lovana vaIsrael la ongala muSilo, opo ve va homone. 13 Novana vaIsrael va tuma Pinehas yaEliaser, omupristeli kovana vaRuben nokovana vaGad noketata lepata laManasse medu laGilead, 14 nomalenga omulongo pamwe naye, elenga limwe koludi keshe lomapata aeshe aIsrael. Keshe limwe la li omukulunhu woludi lomapata aIsrael. 15 Vo eshi ve uya kovana vaRuben nokovana vaGad noketata lepata lovana vaManasse medu laGilead, vo ova popya navo ndele tava ti: 16 Eongalo alishe lOmwene tali ti ngaha: “Nye omwa tauluka ngahelipi eudafano nokuliteeka Kalunga kaIsrael, nye eshi tamu liteeka Omwene nena eli, eshi mwe litungila oaltari ndele tamu tu ondubo nOmwene paife? 17 Okunyona kwetu molwaPeor nani inaku tu wanena nofiyo onena eli inatu koshwa molwokunyona oko, nomolwakwo ehandukilo la hanga eongalo lOmwene? 18 Ndele nye mwa hala paife okuliteeka Omwene; nye ngeenge tamu tu ondubo nOmwene, nena Ye ota ka handukila mongula eongalo alishe laIsrael. 19 Ndelenee oshitukulwalongo ngeenge inashi yela, ileni moshilongo shoovene shOmwene, omo mu na etwali liyapuki lOmwene, mu tule mokati ketu. Ndelenee inamu twa ondubo nOmwene ndele inamu twa ondubo nafye mokulitungila oaltari ponho yoaltari yOmwene Kalunga ketu. 20 Akan yaSera eshi a kufa mo moinima ya tokolelwa ehanauno, ehandu inali uya nani kombada yeongalo alishe laIsrael? Ndele haye mwene aeke a nyonauka molwokunyona kwaye.”

21 Opo nee ovana vaRuben novana vaGad netata lepata laManasse ova nyamukula, ndele tava ti kovakulunhu vomapata aIsrael: 22 “Kalunga koikalunga, Omwene, heeno, Kalunga koikalunga, Omwene, Ye e shi shii! NaIsrael yo na kale e shi shii! Fye ngeenge twa twa ondubo ile twe liteeka Omwene, Omwene ino tu kwafa nena eli, 23 eshi twe litungila oaltari tu liteeke ngeno Omwene. Ndele ngeenge twe i tunga tu yambe kuyo omaxwikiloyambo neendjayambo ile tu yambe kuyo omapanduloyambo, Omwene Ye mwene ne shi ngumaune po. 24 Ndelenee oshili, fye twe shi ninga molwoshisho eshi: ‘Komesho ovana veni tava dulu okulombwela ovana vetu ndele tava ti: Nye omu na shike nOmwene Kalunga kaIsrael? 25 Omwene, tu shii, okwa tula po Jordan ngaashi ongaba pokati ketu nanye, ovana vaRuben novana vaGad.’ Nye muhe noshitukulwa mOmwene. Osho ngaha hano ovana vetu itava tila vali Omwene omolwovana veni. 26 Onghee twa tya: Tu litungileni oaltari ndelenee hakuyamba omaxwikiloyambo nomatomenoyambo, 27 ndelenee opo shi ninge ondobwedi pokati ketu nanye nomaludalo etu konima yetu, opo tu longe eyakulolonga lOmwene koshipala shaye nomaxwikiloyambo etu nomatomenoyambo etu nomapanduloyambo etu, opo ovana veni komesho vaha ka shiive okutya: ‘Nye kamu na mo sha mOmwene.’ 28 Ndele fye otwa diladila nokutya: ‘Vo ngeenge tave shi tu lombwele komesho, noludalo letu, fye ohatu ka tya: Taleni oshiyelekela shoaltari yOmwene ootate va ninga hakuyamba omaxwikiloyambo nomatomenoyambo, opo i kale ondobwedi pokati ketu nanye.’ 29 Nashi kale kokule nafye tu kale tu nondubo nOmwene ndele tu liteeke nena Omwene mokutunga oaltari yomaxwikiloyambo noyeendjayambo noyomatomenoyambo ponho yoaltari yOmwene Kalunga ketu, oyo i li komesho yetwali laye liyapuki.”

30 Omupristeli Pinehas novakulunhu veongalo novakulunhu vomapata aIsrael, ava va li pamwe naye, eshi va uda eendjovo odo da popiwa kovana vaRuben nokovana vaGad nokovana vaManasse, da li diwa momatwi avo. 31 Opo nee omupristeli Pinehas yaEliaser ta lombwele ovana vaRuben novana vaGad novana vaManasse ta ti: “Paife eshi tu shi shii nokutya, Omwene oku li mokati ketu, nye eshi inamu liteeka Omwene. Osho ngaha hano mwa xupifa ovana vaIsrael vaha hangike keke lOmwene.” 32 Opo nee omupristeli Pinehas yaEliaser novakulunhu va shuna va dja po povana vaRuben novaGad medu laGilead, va ya kedu laKaanan kovana vaIsrael, ndele ve va twaalela enyamukulo. 33 Nenyamukulo ola li liwa momatwi ovana vaIsrael, novana vaIsrael va hambelela Kalunga. Ndele vo inava diladila vali ve va homone nokunyona po edu omo ovana vaRuben novana vaGad va kala. 34 Novana vaRuben novana vaGad va luka oaltari ondobwedi: “Osho ondobwedi pokati ketu nokutya, Omwene Oye Kalunga.”