Etukulo ledu kombinga yokoushilo waJordan
1 Ndele Josua eshi a kulupa nomafiku aye a ninga mahapu, Omwene okwe mu lombwela ndele ta ti: Ove wa kulupa nomafiku oye a ninga mahapu, ndele natango onhele inene yomedu ya fyaala inai nangalwa. 2 Edu olo la fyaala po oleli: Eenhele adishe dedu lOvafilisti nedu alishe lOvagesuri, 3 nedu alishe laAvvim koumbuwanhu. (Edu alishe okudja kuSihor i li koushilo waEgipiti fiyo okongaba yaEkron langhele koumbangalanhu, olo tali valelwa kedu lOvakaanan nokutya, eehamba nhano dOvafilisti: oyo yaGasa naayo yaAsdod, oyo yaAskelon, oyo yaGat naayo yaEkron) nosho yo Ovaavvim 4 vokoumbuwanhu. Edu alishe lOvakaanan naMeara yOvasidoni fiyo okuAfek, fiyo okongaba yOvaamori. 5 Nedu lOvagebali naLibanon alishe kombinga yokoushilo okudja kuBaal-Gad shi li pefina lomhunda yaHermon fiyo okonhele oko taku iwa kuHamat. 6 Oonakukalamo aveshe vokeemhunda okudja kuLibanon fiyo okuMisrefot-Maim, Ovasidoni aveshe, Ame mwene ohandi ke va taataa komesho yovana vaIsrael. Edu lavo li tukulila Israel ngaashi efyuululo, ngaashi Ame nde ku lombwela. 7 Edu olo li tukulila hano paife omapata omugoi netata lepata laManasse ngaashi oshitukulwafyuululwa. 8 Pamwe nOvamanasse nOvarubeni nOvagad ova tambula oshitukulwafyuululwa shavo, osho Moses e shi yandja kuvo kombinga inya yokoushilo waJordan, ngaashi Moses, omupiya wOmwene, e va pa: 9 okudja kuAroer, shi li komunghulo womulonga waArnon, oshilando shopokati kefilu nedu la tumba la lalakana okudja kuMedeba fiyo okuDibon. 10 Noilando aishe yaSihon, ohamba yOvaamori, ei ya li ya pangela muHesbon, fiyo okongaba yovana vaAmmoni; 11 naGilead noshikandjo shOvagesuri noshOvamaakati nomhunda aishe yaHermon naBasan ashishe fiyo okuSalka. 12 Nouhamba aushe waOg muBasan, ohamba yomuAstarot noyomuEdrei, yo ya li imwe yomOvarefai ava va xupa. Ndele Moses okwe va taataa nokwe va halakanifa. 13 Ndelenee ovana vaIsrael inava taataa Ovagesuri nOvamaakati, onghee Ovagesuri nOvamaakati va kala mokati kOvaisraeli fiyo onena eli. 14 Epata laLevi alike Moses ine li pa oshitukulwafyuululwa: omindiloyambo dOmwene Kalunga kaIsrael, oye oshitukulwafyuululwa shalo, ngaashi Ye e li udanekela.
15 Ndele Moses okwa yandja kepata lovana vaRuben pamaludi avo: 16 va pewa omukunda okudja kuAroer shi li komunghulo womulonga waArnon, oshilando shopokati kefilu nedu alishe la tumba la lalakana fiyo okuMedeba. 17 Hesbon noilando yasho aishe ei i li medu la tumba la lalakana, Dibon naBamot-Baal, naBet-Baal-Meon, 18 naJahas naKedemot naMefat, 19 naKiriataim naSibma naSeret-Hassahar, komhunda yomefilu, 20 naBet-Peor nomafina eemhunda daPisga naBet-Jesimot, 21 noilando aishe yomedu la tumba la lalakana noshilongo ashishe shaSihon, ohamba yOvaamori, ei ya pangela muHesbon, oyo ya dipawa pamwe nomalenga aMidian kuMoses: Evi naRekem naSur naHur naReba, omalenga aSihon, aa a kala moshilongo. 22 Pamwe naava va dipawa, ovana vaIsrael va dipaa yo neongamukonda Bileam yaBeor, omumonikokule. 23 Osho hano ongaba yovana vaRuben oya enda ngaha: Jordan, sho oshitukulwafyuululwa shovana vaRuben pamaludi avo, noilando pamwe nomikunda dayo.
24 Ndele Moses okwa yandja kepata laGad, ovana vaGad pamaludi avo: 25 va pewa ngaashi omukunda wavo Jaeser noilando aishe yaGilead netata loshilongo shovana vaAmmoni fiyo okuAroer sha ama koushilo waRabba, 26 okudja kuHesbon fiyo okuRamat-Mispa naBetonim. Nokudja kuMahanaim fiyo okongaba yaLidbir. 27 Ndele mefilu: Bet-Haram naBet-Nimra naSukkot naSafon eshi sha xupa koshilongo shaSihon, ohamba yaHesbon, naJordan nomunghulo wao fiyo tau xulile mefuta laKinneret, kombinga yokoushilo waJordan. 28 Osho hano oshitukulwafyuululwa shovana vaGad pamaludi avo, noilando nomikunda dayo.
29 Moses okwa yandja vali ketata lepata laManasse; osho hano etata lepata lovana vaManasse la pewa pamaludi alo oshitukulwa. 30 Omukunda wavo oyou: okudja kuMahanaim, Basan ashishe, oshilongo ashishe shaOg, ohamba yaBasan nomikunda adishe daJair muBasan, oilando omilongo hamano. 31 Netata laGilead naAstarot naEdrei, oilando yomoshilongo shaOg muBasan kovana vaMakir yaManasse ketata lovana vaMakir pamaludi avo.
32 Olo hano Moses e li tukula ngaashi efyuululo momaluhaela aMoab koushilo waJordan yaJeriko langhele lwokoushilo. 33 Ndelenee kepata laLevi Moses ina yandja oshitukulwafyuululwa. Omwene Kalunga kaIsrael, Ye oshitukulwafyuululwa shavo, ngaashi Ye e va udanekela.
© Oshikwanyama Bible Revised © Bible Society of Namibia, 2008, 2012.
