Oshiponga shoshipaxu nefiku lOmwene
1 Shikeni enghuma muSion! Kuwileni onghuwo komhunda yange iyapuki! Oonakukalamo moshilongo nava kale nokukakama, osheshi efiku lOmwene tali uya. Heeno, Ye oku li popepi. 2 Efiku lomilaulu nolomudimbi, efiku loshihemime noloilemo. Ngaashi ouyelele weluwa tau tandavele kombada yeemhunda, osho oshiwana shinene nosheenghono tashi uya. Oshiwana sha tya ngaha inashi kala po nale noitashi ka kala fiyo okomido domaludalo oo tae ke uya. 3 Komesho yasho otaku ende omundilo tau lungwinifa, ndele konima yasho omutemo tau xwike. Ngaashi epya laEden, edu la kala koshipala shasho, ndelenee konima yasho edu ombuwa yongaho. Ndele kape na umwe ta xupu po. 4 Nolupe lasho ngaashi olupe leenghambe, nongaashi eenghambe da londwa osho hava tondoka. 5 Otava koyauka kombada yeemhunda, ngaashi omatemba oita haa kolokota, ngaashi epopomo lomundilo tali xwike oihati, ngaashi oshiwana sheenghono, she lihomatekela olwoodi. 6 Ovanhu aveshe otave di kakamene. Noipala aishe otai ka pemba. 7 Ovo tava tondoka ngaashi ovaladi, ngaashi ovakwaita otava londo ohotekuma. Keshe umwe ta ende nokuyukilila nondjila yaye, itava kanduka mo mondjila. 8 Kape na umwe ta undula mukwao. Keshe umwe ota ende nondjila yaye mwene. Otava pitile momauta ndele itava ka yashwa. 9 Otava pumine mo moshilando, tava tondoka kombada yohotekuma, tava londo, tava i meengulu nokupumina momakende ngaashi ovalunga. 10 Moipafi yavo edu otali kakama neulu otali linyengaanyenga. Etango nohani otai ka laula neenyofi itadi yela vali. 11 Ndele Omwene ota ngungumifa ondaka yaye komesho yoita yaye. Osheshi oita yaye oinene unene, nosheshi omuwanifi wondjovo yaye omunaenghono. Osheshi efiku lOmwene olo linene nokutilika unene. Ndele olyelye ta dulu okukala po?
Ekumaido lokulidilulula
12 Ndelenee natango tuu Omwene ta ti: “Alukeni kwaame nomutima weni aushe nokulidilika nokulila nokunyika oufiye. 13 Pombauleni omitima deni, haoikutu yeni, nye mu alukile kOmwene Kalunga keni. Osheshi Ye omunefilonghenda nomunanghenda nomunanheni nomunene mouwanghenda, ndele iha kalele okuhandukuluka.” 14 Kashiimba Ye ote lialuka natango, ndele ta fii po enangeko noupuna, nokutya eendjayambo noikunwayambo yokuyambela Omwene Kalunga keni.
15 Shikeni enghuma muSion! Yapuleni efiku lelidiliko! Shiveni oshiongalele! 16 Ongeleni oshiwana, yapuleni eongalo, shiveni ovakulunhu. Ongeleni ounona nouhanana! Omuhomboli na dje mo mondjuwo yaye, nomuhombolwa mondjuwo yaye. 17 Ovapristeli, ovapiya vOmwene, nava kale nokulila pokati koshivelo noaltari, nava tye: “Akutu Omwene, xupifa oshiwana shoye, noshifyuululifwa shoye, ino shi efa shi fifwe ohoni, vaha shekwe koiwana. Oshike tava ka tya mokati koiwana: ‘Kalunga kavo oku li peni?’ ”
Omaudaneko oshishipo
18 Opo nee ouladi wOmwene wa pendukila oshilongo shaye. Ndele okwa kenukila oshiwana shaye. 19 Ndele Omwene okwa nyamukula ndele ta lombwele oshiwana shaye: “Tala, Ame handi mu tumine oilya, omaviinyu nomaadi, mu kute. Ndele itandi mu efa vali mu shekelwe mokati koiwana. 20 Heeno, omuhanauni ou ta di koumbangalanhu, Ame ohandi ke mu ta po, a dje punye, ndele handi mu shingile medu likukutu lihe nomeva. Ovapiti vokomesho handi va tele mEfuta lokoushilo, novashikuli vaye handi va tele mEfuta Lopokati. Edimba laye tali nyika, neolelo laye ola mbuta. Osheshi ye a ninga oinima yoixuna. 21 Ino tila, oove edu! Nyakukwa ove u kuwilile! Osheshi Omwene oha longo oinima inene. 22 Oifitukuti yomoixwa, inamu kala mwa tila! Omaulifilo omofuka otaa shipukwa nomuti otau ima. Nomukwiyu nomuviinyu otadi yandje oiimati yado. 23 Nanye ovana vaSion, nyakukweni, nye mu kuwilile mOmwene Kalunga keni. Osheshi ote mu pe odula yonhemuna pauyuki waye. Ote mu tumine odula yonhemuna noyokulombo. 24 Oipale otai ka kala i yadi oilya noikolelo otai xunga omaviinyu nomaadi. 25 Ame ohandi ke mu alulila omido dinya da likile koshipaxu nokeshenye nokoshipaxu shanakapipi nokokapuka taka kunya, oyo oita yange inene, nde i mu tuminine. 26 Opo nye tamu ka lya nawa, ndele tamu kuta nokuhambelela edina lOmwene Kalunga keni, Oye ou, e mu longela oikumwifa. Noshiwana shange itashi ka fifwa vali ohoni fiyo alushe. 27 Ndele onye tamu ka shiiva, nokutya Ame ndi li mokati kaIsrael. Ndele Aame Omwene Kalunga keni nokape na umwe. Noshiwana shange itashi ka fifwa vali ohoni fiyo alushe. 28 Konima yoinima ei, Ame ohandi ka tilila Omhepo yange kombada yovanhu aveshe, novana veni ovamati noukadona otava ka xunganeka, ovakulunhu veni otava ka twa eendjodi, novanyasha veni otava ka mona omamoniko. 29 Nosho yo kombada yovapiya ovamati noukadona ohandi ka tilila Omhepo yange, pomafiku tuu enya. 30 Ndele Ame ohandi ka monikifa oikumwifadidiliko keulu nokombada yedu: ohonde, nomundilo noiundu yomwifi. 31 Etango otali ka shituka omilaulu nohani ohonde fimbo efiku linene nolitilifa lOmwene inali fika. 32 Nakeshe tuu ou ta ifana edina lOmwene, ye ota ka xupifwa. Osheshi komhunda yaSion nomuJerusalem tamu ka kala oonakuxupifwa, ngaashi Omwene a tile. Nomokati kovainhapo tamu ka kala ava tava ka ifanwa kOmwene.
© Oshikwanyama Bible Revised © Bible Society of Namibia, 2008, 2012.
