Omwene ta nyamukula Job
1 Opo nee Omwene a nyamukula Job mokafudaela ndele ta ti: 2 “Olyelye ou ta laulike omhangela yange neendjovo dihe neshiivo? 3 Fikama, u lilongekide ngaashi omulumenhu, opo nee handi ku pula, u longe nge hano. 4 Ove wa li peni, eshi nda shita edu? Lombwele nge, ngeenge u neshiivo. 5 Olyelye a yeleka oiyelekifo yalo, ove u i shii mbela, ile olyelye a shila oshiyelekifongodi kombada yalo? 6 Omamanya ekanghameno lalo a dikilwa kushike? Ile olyelye a dika emanya lokolonela yalo? 7 Eenyofi dongula eshi da hafa mumwe novana aveshe ovamati vaKalunga va nyakukwa? 8 Efuta, olyelye e li idila po nomivelo, lo eshi la fuluka mo la dja moshidalelo? 9 Ame eshi nde li pa oilemo oshikutu shalo, nomulaulu eteta lalo, 10 Ame eshi nde li tulila po ongaba yange ndele nda ninga oiidilifo nomivelo dalo, 11 ndele nda tile: ‘Fiyo apa to uya, ndelenee hakukoya po opo. Ndele apa pa tulilwa ouladi womakufikufi oye ongaba?’
12 “Fimbo wa kala nomwenyo, wa lombwela ngeno ongula, i she, neluwa we li ulikila onhele yalo, 13 lo li kwate ominghulo dedu ndele li tukumune mo mulo ovahenakalunga? 14 Opo nee tali shituka ngaashi elova koshi yoshihakifo, naashishe tashi holoka ngaashi oshikutu. 15 Ovahenakalunga tava kufwa ouyelele wavo, nokwooko kwa yeluka taku teyaulwa. 16 Ove wa ile ko tuu keefifiya defuta? Ndele wa endaenda tuu moule woposhi meni lefuta poukukutu? 17 Omivelo defyo de ku hololelwa, wa mona tuu mbela oivelo yomilaulu? 18 Oumbwalangadja wedu u u shii tuu? Aishe ei, i holola hano, ngeenge u i shii. 19 Ondjila yokuya konhele youyelele oilipipo? Onhele apa omulaulu tau kala, oi li peni? 20 Opo u u twale monhele yao ndele u shiive omalila ao taa twala ketwali lao? 21 Ndishi ove u i shii, osheshi wa li wa dalwa hamba shito nale, nomuvalu womafiku oye omahapu unene mbela!
22 “Wa ile ko komalimba eandu? Ndele wa mona ko tuu omalimba eemhawe? 23 Odo nde di tuvikilila efimbo loudjuu, efiku lolwoodi noloita? 24 Ouyelele otau tukaulwa nondjila oilipipo omhepo youshilo otai liundwile medu alishe?
25 “Olyelye a panunina odula omatondokelo nelila lokutondokela mo oluvadi, 26 opo oshilongo shihe novanhu, shi lokwe, nombuwa omo itamu kala omunhu, 27 opo ombuwa ya tokekwa i kutifwe nedu li menife omwiidi muwa? 28 Odula oi na tuu xe, ile olyelye a dala omata omume? 29 Oikangwa yomeva ya dile moshidalelo shalyelye? Nolyelye a dala eandu leulu? 30 Omeva taa ningi makukutu ngaashi emanya, ombada youle womeva tai li tuvike.
31 “Ove to dulu tuu okuditika omamangifo oshofi? Ile okumangulula eengodi dOkalimbanombwa? 32 Ove to dulu tuu okupitifa mo eenyofi pefimbo lado, ile to dulu tuu okulinyengifa Omunghalavili nOshofi? 33 Wa shiiva tuu eemhango deulu? Ile ove to di lombwele nhumbi tadi pangele edu?
34 “Oto dulu tuu okuudifa ondaka yoye fiyo okoilemo, opo efundja lomeva li ku tuvike? 35 To dulu tuu okutuma omaluvadi a pite mo ndele tae ku lombwele: Ofye ava! 36 Olyelye a tula ounongo moilemo? Ile olyelye a pa oilemo eendunge? 37 Olyelye omunandunge a shiive okuvala omuvalu woilemo? Neeshako deulu olyelye te di fidimike 38 edu eshi la kukuta la ninga likukutu ngaashi la yofwa nomakuma taa damafana?
39 “To dulu tuu okukongela onghoshi onghadi oikulya, ile okukutifa ondjala yonghoshi yonyasha 40 do eshi tadi hondama momakololo ndele tadi nangala momudile tadi nangele? 41 Olyelye ta longekidile ekola eendja dalo, oludalo lalo eshi tali kuwile Kalunga ndele tali tukatuka lihe neendja?
© Oshikwanyama Bible Revised © Bible Society of Namibia, 2008, 2012.
