JOB 37 - Oshikwanyama Bible (OKYB)

Elihu ta popi natango

1 “Heeno, omolwaashi omutima wange tau kakama ndele tau nhuka mo monhele yao. 2 Pwilikina, pwilikina endundumo londaka yaye noshihomo tashi di mokanya kaye. 3 Ye ote shi tondokifile koshi yeulu alishe, oluvadi laye fiyo okominghulo dedu. 4 Konima yaye taku ulu ondaka yaye; Ye ta ndundumifa ondaka yaye i yadi epangelonghono ndele ita kelele omaluvadi, ondaka yaye eshi tai udika. 5 Kalunga ta ndundumifa ondaka yaye, tai nyenge eendunge. Ye ota longo oinima inene tai nyenge okukonekwa kufye. 6 Osheshi Ye ta lombwele eandu: ‘Kolokela poshi!’ Nosho yo oshikungulu shodula, heeno, oikungulu yaye yodula: ‘Kala u neenghono!’ 7 Ye ota mwenyeke omakondjo akeshe omunhu, opo ovanhu aveshe va shiive oilonga yaye. 8 Oilyani tai shiti mo momahondameno ndele tai kala momakololo ayo. 9 Omhepo inene tai di melimba laye, noutalala tau di koumbangalanhu! 10 Oikangwa yomeva tai hekelifwa komufudo wokanya kaKalunga noumbwalangadja womeva wa kwatakanwa taa kamenwa kumwe. 11 Heeno, oilemo te i djuupaleke nouyadi womeva ndee te i lihanifa kokule kombinga, oshilemo shaye otashi eta omaluvadi. 12 Odo tadi umbu akushe keembinga adishe okelombwelo laye; onghee hano tadi wanifa ashishe osho Ye te shi di lombwele kombada yedu alishe. 13 Ye ote di tumu ko ngeenge okuhandukila edu ile oku li kwafa, ile oku li nangeka noupuna.

14 “Edi di pwilikina Job! Kala ofika wa mwena, u dimbulukwe oikumwifa yaKalunga. 15 U shi shii tuu Kalunga nhumbi te i pangele nonhumbi te i yelififa omaluvadi? 16 Oilemo, ove u i shii tuu okulinyenganyenga kwayo, oikumwifa yaau, Omushiivi waaishe? 17 Oove, oikutu yoye tai pupyaleke, edu ngeenge la mwena molwomhepo yokoumbuwanhu? 18 Owa shiiva tuu okuyala pamwe naye eulu la pama ngaashi okatengelelo koshivela sha telekwa? 19 Tu pa eendunge, tu shiive osho tu noku mu lombwela. Molwomulaulu hatu nyengwa okweeta po sha. 20 Tu noku mu shiivifila mbela nokutya ame nda hala oku mu popifa? Ile olyelye a tile a hala a nyonwe po?

21 “Ndele paife, omunhu ita dulu okutala ouyelele wetango, osheshi tali vema, la yelelela, omhepo eshi ya pepa okuyelifa eulu. 22 Evadimo loshingoldo tali di koumbangalanhu; kombada yaKalunga oku nepangelonghono tali tilika. 23 Omunaenghono adishe itatu dulu oku mu hanga, Oye omunene weenghono, ndelenee ita endameke osho sha yuka nouyadi wouyuki. 24 Onghee hano ovanhu nave mu tile, noonakulindungika, Ye ite va tale.”