JOB 34 - Oshikwanyama Bible (OKYB)

Elihu ta ti Kalunga a ningila Job pauyuki

1 Elihu okwa popya vali ndele ta ti: 2 “Udeni eendjovo dange, nye ovalumenhu ovanongo! Pwilikinei nge nye ava mu neshiivo! 3 Osheshi okutwi ku udite eendjovo ngaashi ondakona tai makele eendja. 4 Tu konakoneni osho sha yuka, tu kongeni kumwe osho sha wapala. 5 Osheshi Job a tile: ‘Ame omuyuki, ndelenee Kalunga okwa kufa nge ouyuki wange. 6 Nande ndi nouyuki, ondi nokufufya ngeno. Oshiveta shange shoshikuti itashi veluka, nande ndihe netauluko!’ 7 Omulumenhu olyelye e li ngaashi Job, ou ta nu okusheka Kalunga ngaashi omeva? 8 Ou te litula mongudu yovalongi vowii ndele ha ende pamwe novalumenhu vehe na Kalunga. 9 Osheshi ye a tile: Omulumenhu ke nekwafo nande na wapalele Kalunga.

10 “Onghee hano ovalumenhu ovanaendunge, pwilikinei nge: Kalunga oku li kokule nouhenakalunga, nOmunaenghono adishe oku li kokule nowii! 11 Ndelenee unene ta handukilile omulumenhu pashilonga shaye, ndele Ye ta futile omulumenhu pakweenda kwaye. 12 Heeno shili, Kalunga ita longo osho inashi yuka nOmunaenghono adishe ita endameke ouyuki. 13 Olyelye e mu tula po a pangele edu, nolyelye a tula ekanghameno lounyuni? 14 Ye ngeenge te lidiladila muye mwene ngeno, ndele ta alula omhepo yange nomufudo waye tau shuna kuye, 15 opo nee aishe i nomwenyo kumwe tai xulu po, nomunhu ta shuna mondwi.

16 “Hano ngeenge u neendunge, uda eshi. Pwilikina ondaka yeendjovo dange. 17 Ou ta tondo ouyuki, ota dulu tuu okupangela? Ile ove wa hala okupa omuyuki nomunaenghono oushima? 18 Olyelye ngeno ta lombwele ohamba: ‘Ove ku shi omunhu!’ Nokulombwela elenga: ‘Ove omukolokoshi!’ 19 Oye iha popile ovakulunhu voshilongo ndele ita tula omukengeli komesho yomukwanaluhepo, osheshi vo aveshe oshilonga shomake aye. 20 Ohava fi mepakumo leisho pokati koufiku. Oiwana tai tengauka ndele tai nyonwa po, omunaenghono ta kandulwa po, ina kumwa keke lomunhu. 21 Osheshi omesho aye taa pashukile eendjila domunhu, ndele ta tale eenghatu daye adishe. 22 Kaku noshiwiwili ile omulaulu fokofoko omu ovalongi vowii hava dulu okuhondama. 23 Osheshi Ye ita pumbwa okukonakona omunhu efimbo lile, fimbo omunhu e nokuholoka a tokolwe koshipala shaye. 24 Ye ota teyaula po ovanaenghono ite va konakona, ndele ta tula po vamwe ponhele yavo. 25 Osho ngaha hano Ye a shiiva oilonga yavo, ndele te va hanauna po oufiku, ndele tava teyauka. 26 Ye ote va handukile ngaashi ovakolokoshi moipafi yaaveshe tave shi mono, 27 shaashi vo ove mu liteeka, ndele inava diinina nande imwe yomeendjila daye, 28 ndelenee va kuwifa eehepele onghuwo koshipala shaye, ndele Ye a uda onghuwo yovakwanaluhepo. 29 Ndele Ye ngeenge ta mwena, olyelye ta dulu oku mu tokola? Ndele ngeenge ta holeke oshipala shaye, olyelye ta dulu oku mu tala? Ye ota pashukile oshiwana ngaashi omunhu keshe, 30 opo ovanhu ovakolokoshi vaha mone omhito okupangela, vaha ningile ovanhu eemwiyo.

31 “Osheshi Kalunga ota lombwelwa ngeno: ‘Ame ohandi humbata ehandukilo, inandi hala vali okunyona. 32 Osho ndihe shi wete, shi longe nge. Ngeenge nda nyona, itandi shi ningi vali.’ 33 Ove ho diladila ngeno Ye e noku mu handukila, oove ou ho dini etokolo laye? Heeno, ove u nokuhoolola, haame. Popya osho u shi shii! 34 Ovalumenhu ve neendunge tava lombwele nge, omulumenhu omunongo ou ta pwilikine nge, ta ti: 35 ‘Job ta popi ehe nomayele, neendjovo daye dihe nounongo.’ 36 Akutu Job na yelekwe fiyo okexulilo omolwomanyamukulo oo aye opaulunde. 37 Osheshi ye ta wedele ko etauluko ketimba laye. Mokati ketu ye ta popi shihapu e nondubo naKalunga.”