JOB 24 - Oshikwanyama Bible (OKYB)

1 “Omolwashike Omunaenghono adishe ina ufa omafimbo oihokolola, nomolwashike ava ve mu shii, itava mono omafiku aye oihokolola? 2 Vo ohava lundulula eengaba, hava nyeke oyuunda ndele tave i lifa. 3 Ohava twala ondongi yeefiye ndele hava kufa ongobe yomufiyekadi ombabyona. 4 Ovakwanaluhepo tave va undula mo mondjila. Ovakwanaluhepo aveshe vomoshilongo ve nokuhondama. 5 Taleni ove li ngaashi eefino mombuwa, tava i moshilonga shavo okukonga eendja. Ombuwa tai va pe omungome wavo nowovana. 6 Ohave liongelele eendja davo kepumbu nomoikokola yomiviinyu yovahenakalunga hava pupudulula. 7 Oufiku ohava nangala hamunghele, vehe noikutu, vehe na sha shokuliuvikila outalala. 8 Hava tutikwa koshikungulu shodula tashi di keemhunda, vehe noiyaamo, onghee tava yaama komamanya. 9 Okaana taka kufwa komavele, naasho omukwanaluhepo e shi kwete, ote shi kufwa po ombabyona. 10 Vo ohava ende hamunghele vehe noikutu. Ohava humbata oipandi yoilya ve nondjala. 11 Ohava kolo omaadi olumono pokati komakuma ovanhu, ndele moikolelo yavo yomiviinyu hava kolo va fyenota. 12 Ondaka yekemo lovalumenhu tai udika moshilando, nomwenyo weendjashe tau kuu onghuwo. Ndelenee Kalunga ita yavala oixuna. 13 Ovanhu va tya ngaha ovatondadi vouyelele, inava shiiva eendjila davo, ndele ihava kala nomalila ouyelele. 14 Fimbo eluwa inali tenda omudipai ta penduka, ta dipaa omukwanaluhepo nohepele; ndele oufiku ye ta ende ngaashi omulunga. 15 Eisho lomutei wohombo tali tale oshiwiwili ndele ta ti: Kape na nande eisho tali tale nge; ndele ta uvike oshipala shaye. 16 Momulaulu ota panukile mo momaumbo, omutenya ohava kala ve liidilila mo. Kave na sha nouyelele. 17 Osheshi omulaulu fokofoko u li kuvo ngaashi etango la sha, osheshi omahalwifo omulaulu fokofoko ve a shii. 18 Mokweendelela tava twalwa komeva. Epya lavo ola tulwa omutima moshilongo. Vo ihava aluka vali kelila lokoshikokola shomiviinyu. 19 Ngaashi oluteni noupyu tau twala eemhawemeva nosho yo oshovafi ovo va nyona. 20 Oshidalelo shaina tashi mu dimbwa. Omainyo tae mu li nehafo. Ye ita dimbulukiwa vali. Osho ngaha hano owii tau teyaulwa po ngaashi oshiti. 21 Ye okwa nyeka ongadji ei ihai dala, ndele ina kwafa omufiyekadi. 22 Meenghono daye Kalunga ta yambidida ovanaenghono va kale nomwenyo mule. Vo ohava kala ofika, nande va li va limbililwa okukalamwenyo kwavo. 23 Kalunga te va amene, ndele ve nomuyambididi a pama, nomesho aye otaa pashukile eendjila davo. 24 Ova lengwa ndelenee ohaluka, okafimbo kaxupi, kave po vali. Otava xutuka. Otava fi ngaashi aveshe, otava yaumuka ngaashi oshunga. 25 Ndele ngeenge hasho, olyelye ta vele nge ombedi molwoipupulu, ndele ta tomho eendjovo dange?