JOB 21 - Oshikwanyama Bible (OKYB)

1 Ndelenee Job okwa nyamukula ndele ta ti: 2 “Pwilikineni nawa eendjovo dange, di ninge ehekeleko lange. 3 Lididimikilei nge, ndi dule okupopya yo; ame eshi nda popya, nye tamu dulu okusheka. 4 Handi kemene ovanhu mbela? Ile shike ndiha nyengwe okulididimika. 5 Talei nge, mu haluke, mu tule omake komilungu deni. 6 Heeno, ngeenge handi i diladila, ohandi limbililwa shili, nehaluko tali kwata olutu lange.

7 “Omolwashike ovahenakalunga tava itavelwa okukala po ve nomwenyo, vo hava kulupa ndele hava mono eenghono? 8 Oludalo lavo tali kulu komesho yavo pamwe navo, noitutuma yavo moipafi yavo. 9 Omaumbo avo taa kala nombili, ehe nehaluko, itava hangika kongola yaKalunga. 10 Ongobe yaye omhedi itai hambe oshimha, ongobe yaye onghadi tai dala, itai helula. 11 Ovana vavo ovamati tave va pitifa mo ngaashi ongudu yeedi, nounona vavo hava nhuka nokudanauka. 12 Vo ohava imbi mokushikwa kwenghuma loshikushu nokwokaxumbafeta, ndele hava hafe mokushika eenyalilo. 13 Omafiku avo ove li melao ndele mefaukilo ohava ningine mo moshovafi. 14 Nande ongaha, ova lombwela Kalunga, tava ti: ‘Kala kokule nafye.’ Navali: ‘Eendjila doye inatu hala oku di shiiva. 15 Omunaenghono adishe omushike ngeno, tu mu longele? Noku mu indila otaku tu kwafa ngahelipi?’

16 “Taleni, elao lavo kali mo momake avo vene? Omapukululo ovahenakalunga naa kale kokule naame. 17 Olungapi nokuli olamba yovahenakalunga tai dimi, ndele tava hangika komupya wavo? Kalunga ota tukula omaudjuu mehandu laye. 18 Ohava ningi ngaashi oihati tai twalwa komhepo, nongaashi olungu tali kombwa po komhepo yoshikungulu? 19 Oshiponga shaye Kalunga, vati ote shi tuvikilile ovana vaye. Ye ne shi mu alulile shi mu valule. 20 Omesho aye mwene e nokutala omupya waye, ye mwene e nokunwa oupyuhandu wOmunaenghono adishe. 21 Osheshi ita yavala oludalo laye, ye eshi ta fi, nomuvalu weehani daye ngeenge wa wanifwa? 22 Kalunga e nokulongwa mbela eendunge, Ye ou ta tokola oikwaulu?

23 “Umwe ta fi melao la wana nombili netulumuko. 24 Oiyuma yaye i yadi omashini nomungo womakipa aye taa nwefwa omaadi. 25 Nomukwao ta fi e nomwenyo tau nyika oululu, ina makela ouwa. 26 Vo aveshe tava ka nangala medu, nomainyo tae va tuvike.

27 “Taleni, omadiladilo eni ndi a shii, nomaudafano eni mai, mwa hala okufininika nge nao. 28 Ngeenge tamu ti: ‘Eumbo lomuhepeki oli li peni? Nomatwali ovahenakalunga otaa kala peni?’ 29 Hano inamu pula kovaendanandjila? Itamu dulu okulikala omahepaululo avo. 30 Ovalongi vowii tava xupifwa efiku lehanauno, ye ta amenwa efiku loupyuhandu. 31 Olyelye te mu lombwele moipafi yaye okweenda kwaye? Olyelye te mu alulile osho e shi ninga? 32 Opo nee tave mu twala noku mu findikila kombila, nombila yaye tai kalelwa noshisho. 33 Omakuma okefilu tae mu tuvike omapu kuye; ovanhu aveshe tave mu shikula ngaashi vahapu, vehe shi kuvalwa ve mu tetekela ko. 34 Omolwashike tamu hekeleke nge panghedi ii? Nomanyamukulo eni ekonda alike tali fyaala po!”