JOB 11 - Oshikwanyama Bible (OKYB)

1 Opo nee Sofar, Omunaamati, a nyamukula ndele ta ti: 2 “Omapopyaano a kale ngeno itaa nyamukulwa? Ile omulumenhu omupopyaani ta ka pewa tuu ounongo? 3 Omapopyaano oye taa mweneke ngeno ovalumenhu, ove u sheke, kuhe na ou te ku fifa ohoni? 4 Wa tile: ‘Elongo lange ola yela, aame omukoshoki momesho oye.’ 5 Ndelenee woo, ngeenge Kalunga ta popi, ndele te ku makulile omilungu daye 6 ndele te ku hololele oiholekwa younongo, nokutya Ye e neendunge dihapu! Opo to shiiva, nokutya Kalunga okwa hala okudimbwa dimwe domeembedi doye. 7 U shi, ove to dulu okukonakona oule wounongo waKalunga? Ile to dulu okuhanga ouyadi wOmunaenghono adishe? 8 Owo u fike poule weulu; ove to dulu shike? Owo u dule oule woposhi woshovafi; ove to dulu okushiiva shike? 9 Oule wao u dule wedu, noumbwalangadja wao u dule wefuta. 10 Ye ngeenge te uya ta ingaana ndele ta kwata onghwate ndele ta shivi oshiongalele shoihokolola, olyelye te mu kelele? 11 Osheshi ovanaipupulu va shiivika kuye ndele ta mono owii nande ine u konakona? 12 Osho ngaha hano elai tali dulu okupewa ounongo, nokandongwena taka ka dalululwa omunhu. 13 Ove ngeenge to longekida omutima woye nomake oye to a yelula noku mu ilikana, 14 ngeenge meke loye omu nowii, u ekela kokule, ndele ino itavela metwali loye mu kale nande owii, 15 opo to dulu okuyelula oshipala shoye shihe nokavala kohoni, ndele to kala wa pama nokupamenena, ku noku tila sha. 16 Heeno, nena to ka dimbwa omupya woye, noku u diladila wa fomeva a kunguluka po. 17 Okukalamwenyo kwoye taku ka kala ku nouyelele u dule ou wopokati komutenya; ndele nande naku laule, tau kala ngaashi etango longula. 18 Ove u nelineekelo, shaashi u neteelelo. Ove to lengaalenga ndele to ka nangala nombili. 19 Ove oto ka nangala pehe na ou te ku tilifa, ndele vahapu tava ka konga oukaume naave. 20 Ndelenee omesho ovakolokoshi taa ka loloka, onhele yavo yokuhondama ve i kanifa. Eteelelo lavo okufuda mo omufudo waxuuninwa.”