JOB 10 - Oshikwanyama Bible (OKYB)

1 “Ame ohandi nyonyodola okukalamwenyo kwange. Onda hala, okukema kwange ku udike. Nda hala okupopya mouyehame wokomwenyo, 2 handi lombwele Kalunga: Ino tokola nge ndi pewe oushima. Shiivifile nge: molwashike ho twile nge eemhata? 3 Ove to lilikolele shike mokufininika nge, eshi to ekeleshi oshilonga shomake oye, ndelenee ho minikile eemhangela dovahenakalunga? 4 Ove u nomesho opambelela mbela? Ove ho tale mbela ngaashi omunhu ha tale? 5 Omafiku oye e li mbela ngaashi omafiku omunhu? Ile omido doye ngaashi omido domulumenhu? 6 Eshi Ove ho kongo owii wange ndele to pula omatimba ange, 7 nande u shi shii ame nghi nombedi, ndele kape na nande umwe ta xupifa mo momake oye?

8 “Omake oye a honga nge ndele a ninga nge keembinga adishe; ndele Ove to teyaula nge po. 9 Dimbulukwa, nokutya wa honga nge ngaashi elova ndele wa hala okushitulula nge ondwi vali. 10 Ove wa tilashi nge ngaashi omashini, ndele wa pameka nge ngaashi omashini a ota. 11 Ove wa djaleka nge oshipa nonhumba ndele wa tunga nge nomakipa neefipa. 12 Ove wa pa nge okukalamwenyo nonghenda, noshisho shoye sha amena omhepo yange. 13 Ndelenee wa holeka eshi momutima woye; ondi shi shii Ove we shi diladila: 14 ame eshi nda nyona, Ove wa nangela nge, ndele ino dimina nge po owii wange. 15 Ngeenge ndi nombedi, woo ame! Ndele ngeenge ndimuyuki, ame nda nyengwa okuyelula omutwe wange, eshi nda kuta ohoni nokutala oluhepo lange. 16 Ngeenge omutwe wange tau yeluka, Ove to taataa nge ngaashi onghoshi, ndele to monifa nge oixuna. 17 Ove ho kongele nge alushe ovahokololifi vape tava hokololifa nge, ndele to hapupalifile nge oupyuhandu woye, omatanga mape ovakwaita va homone nge! 18 Omolwashike wa shilila nge mo moshidalelo shameme? Ngeno nda fya fimbo eisho nande limwe inali mona nge! 19 Ngeno nda li nda fa ndihe po, moshidalelo shameme ngeno nda twaalelwa mombila. 20 Omafiku ange omanini. Na efe nge ndi kale nombili, na pilamene nge ndi nyakukwe kanini, 21 fimbo inandi fikama ndi ye koshilongo shomulaulu noshomudidimbe wefyo ndiha aluke vali, 22 koshilongo shomulaulu ngaashi pokati koufiku, oshomudidimbe wefyo noshehanauno oko ouyelele u li ngaashi omulaulu.”