JEREMIA 45 - Oshikwanyama Bible (OKYB)

Baruk ta hekelekwa kOmwene

1 Ondjovo oyo omuxunganeki Jeremia e i lombwela Baruk yaNeria ye eshi e di shangela momushangwatonywa da tongwa kokanya kaJeremia momudo omutine waJehoiakim yaJosia, ohamba yaJuda, tai ti: 2 “Baruk, Omwene Kalunga kaIsrael moku ku popya ota ti: 3 Ove owa tya: Woo ame, osheshi Omwene okwa wedela nge oudjuu kouyehame wange. Ame onda loloka kokukema kwange, ndele ihandi mono nande etulumuko. 4 Ove u noku mu lombwela ngaha, u tye: Omwene ota ti ngaha: Tala, osho nde shi tunga ohandi shi ngumauna po, naashi nda twika po ohandi shi duda mo. Ndele eshi otashi hange edu alishe. 5 Ndele ove oto lihalele oinima inene? Ino i lihalela. Osheshi tala, ombelela keshe Ame ohandi i etele omupya, Omwene osho ta ti. Ndelenee ove ohandi ku pe omwenyo woye oshihakanwa, keshe apa to i.”