JEREMIA 44 - Oshikwanyama Bible (OKYB)

Ovajuda vomuEgipiti tava hanyenwa

1 Ondjovo ya tuminwa Ovajuda aveshe va kala medu laEgipiti, naavo va kala muMigdol nomuTahpanhes nomuMemfis nomomukunda waPatros, oya hanga Jeremia tai ti: 2 Omwene womatanga ovakwaita, Kalunga kaIsrael ota ti ngaha: “Oiponga inya aishe nde i undulila Jerusalem noilando yaJuda aishe, onye vene omwe i mona. Ndele tala, nena oyo omakulukuma, omo muhe novanhu, 3 omolwowii wavo ve u ninga okuhandukifa nge eshi va ya va ka xwike omayambo nokulongela oikalunga inai shiivika kuvo nokooxe. 4 Ndele Ame onde mu tumina ovapiya vange ovaxunganeki efimbo keshe ndele nda tya: Inamu longa oixuna oyo, handi i tondo. 5 Ndelenee vo inava pwilikina nongaashi inava ameka omatwi avo kwaame, va aluke kowii wavo nova efe okuxwikila oikalunga imwe omayambo. 6 Onghee oupyuhandu wange nehandu lange la tilwa ndele la xwama pombada omoilando yaJuda nomomapandavanda aJerusalem, ndele yo oya shituka omakulukuma nombuwa yongaho, ngaashi i li nonena.”

7 Hano paife Omwene Kalunga komatanga ovakwaita, Kalunga kaIsrael, ota ti ngaha: “Omolwashike hano onye vene tamu lishilile omupya omunene, eshi tamu mane mo mokati keni ovalumenhu novakainhu nounona nouhanana vomuJuda, nye muhe lixupifile nande oshixupe. 8 Osheshi otamu handukifa nge noilonga yomake eni nokuxwikila oikalunga imwe omayambo moshilongo shaEgipiti oko mwe uya ko mu ka kale ovanailongo nosho ngaha tamu lishilile okunyonwa po, ndele tamu ningi ondjovo yefingano noyesheko mokati koiwana aishe yokombada yedu. 9 Hamba nye omwa dimbwa omawii ooxokulu nomawii eehamba daJuda nomawii ovakainhu vavo nomawii eni vene nomawii ovakainhu veni ve u ninga moshilongo shaJuda nomomapandavanda aJerusalem? 10 Fiyo onena inave lixupipika nongaashi inava tila, noinava enda pamhango yange nopamayukifo oo nde e va pa, ovo nooxekulu.” 11 Onghee hano Omwene womatanga ovakwaita, Kalunga kaIsrael ota ti ngaha: “Taleni, oshipala shange ohandi shi mu taalelifile oiponga ndi hanaune po Juda ashishe. 12 Ndele Ame ohandi ka kufa oshixupe shomuJuda, shi noipala ya taalela kuEgipiti, va ye ko va ka kale ko ovanailongo, ndele vo aveshe otava ka xula po muEgipiti. Otava ka fya keongamukonda nokondjala. Ovanyasha novakulunhu otava fi kondjala nokeongamukonda. Ndele voovene otava ka ninga efingano netilifo nondjovo yelengaifo noyesheko. 13 Ndele Ame ohandi ka handukila ava ve li muEgipiti, ngaashi nda handukila Jerusalem neongamukonda nondjala noudu wolutapo. 14 Opo paha kale nande umwe ou ta i onhapo ile te lixupifa mokati koshixupe shaJuda, mwaava ve uya va ka kale medu laEgipiti ovanailongo. Ndele itava shuna kedu laJuda oko eemwenyo davo tadi djuulukwa, va kale ko, osheshi ovainhapo vamwe aveke tava ka shuna ko.”

15 Ndele ovalumenhu aveshe ava va li ve shi shii, kutya ovakainhu vavo tava xwikile oikalunga imwe omayambo, novakainhu aveshe ava va kala ko ofika, ongudu inene, novanhu aveshe ava va kala muEgipiti nova kala muPatros ova nyamukula Jeremia ndele tava ti: 16 Ondjovo ei we tu lombwela medina lOmwene itatu i itavele nande, itatu i itavele tu dulike kwoove. 17 Ndelenee fye ohatu ka wanifa eudaneko letu keshe olo la dja momakanya etu, fye tu xwikile ohamba omwalikadi yomeulu omayambo notu i tilile oikunwayambo ngaashi twa ninga, fye nootate, neehamba detu novakulunhu vetu moilando yaJuda nomomapandavanda aJerusalem, opo nee fye otwa li twa kuta omungome notwa li tu udite ouwa nongaashi inatu mona nande oshiponga. 18 Ndelenee eshi twa efa okuxwikifa ohamba omwalikadi yomeulu omayambo noku i tilila oikunwayambo otwa hepa oinima aishe nohatu manwa po keongamukonda nokondjala. 19 Ndele eshi hatu xwikile ohamba omwalikadi yomeulu omayambo nohatu i tilile oikunwayambo, ohatu shi ningi vati inashi shiivika kovalumenhu vetu, naashi hatu i telekele omingomeyambo da fefano layo ndele hatu i tilile oikunwayambo? 20 Opo nee Jeremia okwa lombwela ovanhu aveshe ovalumenhu novakainhu novanhu aveshe ava ve mu nyamukula eendjovo di fike opo, ndele ta ti: 21 “Heeno, exwikilo mwe li xwika onye nooxokulu neehamba deni novakulunhu veni novanhu aveshe vomoshilongo, mwe li xwika moilando yaJuda nomapandavanda aJerusalem, Omwene ine li dimbulukwa, ndele inali fika komwenyo waye? 22 Opo Omwene ina dula vali oku li lididimikila owii woilonga yeni nomolwoixuna mwe i longa, onghee oshilongo sheni osha ninga omakulukuma nomaputu nondjovo yefingano shihe novanhu, ngaashi shi li nena eli. 23 Osheshi nye omwa xwika omayambo nomwa nyona kOmwene, ndele inamu dulika kondaka yOmwene nye inamu enda pamhango, pamalombwelo nopamaufo aye, onghee hano omupya ou owe mu hanga ngaashi u li paife.”

24 Jeremia okwa lombwela vali ovanhu aveshe novakainhu aveshe ndele ta ti: “Nye Ovajuda aveshe mu li muEgipiti, udeni ondjovo yOmwene. 25 Omwene womatanga ovakwaita, Kalunga kaIsrael, ota ti ngaha: ‘Onye novakainhu veni, osho mwe shi popya nomakanya eni eshi mwe shi wanifa yo nomake eni, mwa ti: “Ohatu wanifa eudaneko letu olo twe li udanekela ohamba omwalikadi yomeulu oku i xwikila noku i tilila oikunwayambo.” Onghee diinineni hano eudaneko leni noku li wanifa. 26 Ndelenee kaleni nokuuda ondjovo yOmwene, onye Ovajuda amushe mu li muEgipiti: “Tala, Ame onda ana edina lange linene,” Omwene osho ta ti, oshili moshilongo ashishe shaEgipiti itamu ka kala vali nande omulumenhu Omujuda ta popi nokanya kaye edina lange, a tye ngeno: Oshili, ngaashi Omwene Kalunga e nomwenyo. 27 Taleni, ohandi pashuka ndelenee owii kuvo, hauwa, nOvajuda aveshe ve li muEgipiti otava nyonaunwa po keongamukonda nokondjala fiyo va hanaunwa po filufilu. 28 Ndelenee ava tava xupu po keongamukonda, otava di muEgipiti, ndele tave uya koshilongo shaJuda, okangudu kanininini. Ndele oshixupe ashishe shOvajuda osho she uya medu laEgipiti, shi kale kwinya ovanailongo, otashi ka shiiva, kutya ondjovo oyalyelye ya twa, oyange ile oyavo.

29 “ ‘Ndele oshinima eshi tashi mu ningile edidiliko, Omwene osho ta ti, nokutya ohandi mu handukile monhele ei, opo mu shiive nokutya, eendjovo dange odo di nondubo nanye otadi wanifwa noku mu etela omupya. 30 Omwene ota ti ngaha: Taleni, Farao Hofra, ohamba yaEgipiti, ohandi mu yandje momake ovatondadi vaye nomomake aava tava nangele omwenyo waye. Ngaashi nda yandja Sedekia, ohamba yaJuda momake aNebukadnesar, ohamba yaBabilon, omutondadi waye nokwa li a nangela omwenyo waye.’ ”