JEREMIA 42 - Oshikwanyama Bible (OKYB)

Jeremia ta pukulula oshiwana shiha ye kuEgipiti

1 Opo nee ovakulunhu aveshe vomatanga naJohanan yaKarea naAsaria yaHosaja novanhu aveshe ovanyasha novakulunhu ove uya, 2 ndele va lombwela omuxunganeki Jeremia ndele tava ti: “Omaindilo etu twe a eta koshipala shoye, tu indilila kOmwene Kalunga koye nokwiindilila oixupe ei aishe, osheshi ofye ava twa xupa movanhu vahapu, okangudu kanini, ngaashi u tu wete, 3 Opo Omwene Kalunga koye ne tu ulikile ondjila ei hatu ka enda nayo, Ye ne tu shiivifile eshi tu nokuninga.” 4 Ndele omuxunganeki Jeremia okwe va nyamukula ndele ta ti: “Onda uda ko. Tala, ame ohandi ka indila kOmwene Kalunga keni paendjovo deni. Nakeshe eshi Omwene te mu nyamukula, ame ohandi ke mu hololela. Ame ihandi ke mu holeka nande ondjovo imwe.” 5 Opo nee ova lombwela Jeremia tava ti: “Omwene na kale ondobwedi yetu yashili nomulineekelwa, ngeenge itatu wanifa naanaa keshe ondjovo Omwene Kalunga koye te ke i ku pa u i ete kufye. 6 Ngeenge oiwa ile oii, ohatu ka dulika kondaka yOmwene Kalunga ketu, ou hatu ku tumu kuye, opo tu kale nawa, eshi hatu dulika kondaka yOmwene Kalunga ketu.”

7 Ndele eshi pa pita omafiku omulongo, ondjovo yOmwene oya hanga Jeremia. 8 Ndele ye okwa ifana Johanan yaKarea novakulunhu aveshe vomatanga va li puye novanhu aveshe, ovakulunhu novanyasha, 9 ndele ta ti kuvo: “Omwene Kalunga kaIsrael ou mwa tumine nge kuye, ndi twale koshipala shaye eilikano leni, ota ti: 10 ‘Ngeenge otamu kala moshilongo eshi, Ame ohandi mu tungu, itandi mu ngumauna po, nohandi mu twike, itandi mu duda mo, osheshi Ame onde lialuluka kowii ou nde u mu monifa. 11 Inamu tila ohamba yaBabilon, ngaashi mwe mu tila nale. Inamu tila, osho Omwene ta ti, osheshi Ame ohandi kala punye ndi kwafe nondi mu xupife momake aye. 12 Ndele Ame ohandi ke mu fila onghenda opo ye e mu file onghenda, ndele te mu shunifa koshilongo sheni.’ 13 Ndelenee ngeenge tamu ti: ‘Fye inatu hala tu kale moshilongo eshi, noitamu dulika kondaka yaKalunga keni,’ 14 ndele tamu ti: ‘Ahowe, ndelenee ohatu ka ya kuEgipiti, tuha mone olwoodi ndele tuha ude ondaka yomanghuma ile tuha ka fye ondjala yomungome, oko twa hala tu kale;’ 15 Onghee hano, pwilikineni ondjovo yOmwene, onye oixupe yaJuda! Omwene womatanga ovakwaita, Kalunga kaIsrael, ota ti ngaha: ‘ngeenge tamu pungulukile oipala yeni kuEgipiti mu ye ko, mu kale kwinya ovanailongo, 16 eongamukonda mwe li tila, otali mu hange kedu laEgipiti. Nondjala mwe i tila otai mu shikula, tai uya kuEgipiti, ndele tamu ka fila ko. 17 Heeno, ovalumenhu aveshe tava pungulukile oipala yavo kuEgipiti, va ka kale ko ovanailongo, otava ka fya keongamukonda nokondjala nokoudu wolutapo, ndele kape nomunhu ta dulu oku lixupifa koshiponga ile okuya onhapo omupya ou handi u va tumine.’

18 “Osheshi Omwene womatanga ovakwaita, Kalunga kaIsrael ota ti ngaha: ‘Ngaashi ehandu lange noupyuhandu wange wa tililwa kombada yoonakukalamo muJerusalem, osho yo oupyuhandu wange otau ka tililwa kombada yeni, ngeenge tamu i kuEgipiti. Ndele nye otamu ka ninga efingo noshitondifa nondjovo yefingano nelengaifo, ndele itamu ka mona vali onhele ei.’ 19 Omwene te mu lombwele, nye oixupe yomuJuda, ndele ta ti: ‘Inamu ya ko kuEgipiti!’ Kaleni mu shi shii shili, Ame onde mu londwela nena eli. 20 Osheshi nye omwe lipukifa nye vene, eshi mwa tuma nge kOmwene Kalunga keni, eshi mwa tya: ‘Tu ilikanena kOmwene Kalunga ketu; naadishe odo Omwene Kalunga ketu ta popi, di tu hololela, opo tu di wanife.’ 21 Hano onde di mu lombwela nena eli, ndele nye omwa anya okudulika kondaka yOmwene Kalunga keni mwaadishe edi e di tumina nge kunye. 22 Paife hano kaleni mu shi shii shili, nye otamu ka fya keongamukonda nokondjala nokoudu wolutapo okonhele oko mwa hala okuya ko, mu kale ovanailongo.”