Oupika womido 70 wOvajuda
1 Ondjovo ya hanga Jeremia, tai tongo oshiwana ashishe shaJuda, momudo omutine wepangelo laJehoiakim yaJosia, ohamba yaJuda, momudo wotete wepangelo laNebukadnesar, ohamba yaBabilon, 2 omuxunganeki Jeremia okwe i tonga mokutamaneka oshiwana ashishe shaJuda noonakukalamo aveshe muJerusalem, ta ti: 3 Okudja komudo omutimulongo nanhatu wepangelo laJosia yaAmon, ohamba yaJuda, fiyo okefiku lonena eli, momido omilongo mbali nanhatu, ondjovo yOmwene oya kala nokuhanga nge, ndele ame inandi loloka oku i mu lombwela, ndelenee nye inamu hala oku i pwilikina. 4 Nomwene ina loloka oku mu tumina ovapiya vaye aveshe ovaxunganeki, ndelenee nye inamu pwilikina ngaashi inamu pakaleka omatwi eni mu ude ko. 5 Vo eshi ve mu lombwela: Alukeni, keshe umwe kondjila yaye inai yuka nokowii woilonga yeni, ndele nye otamu kala medu leni, olo mwe li pewa kOmwene, onye nooxokulu mu kale mo alushelushe. 6 Ndele inamu shikula oikalunga nye inamu i longela nokulinyongamena kuyo, ndele inamu kala nokuhandukifa nge noilonga yomake eni, Ame ndihe mu tumine omupya. 7 Ndelenee nye inamu pwilikina nge, Omwene osho ta ti, nosho ngaha mwa handukifa nge noilonga yomake eni, omwe shi ningila omupya weni vene.
8 Onghee hano Omwene womatanga ovakwaita ota ti ngaha: Nye eshi inamu pwilikina eendjovo dange, 9 onghee ohandi ifana ko nohandi ka eta ko oiwana aishe yokoumbangalanhu, Omwene ta ti, nomupiya wange Nebukadnesar, ohamba yaBabilon, ndele handi ke va pumifila moshilongo eshi noonakukalamo, noiwana aishe yomoushiinda. Ndele handi ke va yandja kokufingwa ndele tava ningi oshitilifa shongaho noiyolifa nonduba yomakulukuma fiyo alushe. 10 Ndele Ame ohandi ka kukifa ondaka yehafo nondaka yenyaku nondaka yomuhomboli nondaka yomuhombolwa, ekolokoto loshini nouyelele wolamba. 11 Ndele oshilongo eshi ashishe otashi ningi oshala shoimbodi neputu. Noiwana ei tai ka longela ohamba yaBabilon omido omilongo heyali.
Babilon tashi hanaunwa po
12 Ndelenee omido omilongo heyali nge da pita po, ohamba yaBabilon noshiwana shayo, ohandi i alulile owii wayo, Omwene osho ta ti, nedu lOvakaldea ohandi ke li ninga ombuwa fiyo alushe. 13 Ndele edu olo handi ke li wanifila eendjovo dange adishe nde di popya, odo adishe da shangelwa membo eli, Jeremia kwa li e di xunganekela oilongo ei aishe. 14 Osheshi navo yo ove nokulongela oiwana ihapu neehamba dakula ndele Ame ohandi ke va alulila osho shi fike paoilonga yavo, ngaashi omake avo a ninga.
Eholo lehandu lokunwefa oiwana aishe
15 Osheshi Omwene Kalunga kaIsrael okwa lombwela nge ndele ta ti ngaha: “Kufa mo eholo eli lomaviinyu oupyuhandu meke lange, ove u nwefe mo oiwana ei aishe, handi ku tumu kuyo, 16 opo va nwe nova pungauke ndele va piyaane meendunge moipafi yeongamukonda handi li tumu mokati kavo.” 17 Ndele ame nda tambula eholo meke lOmwene nonda nwefa mo oiwana aishe oko nda tumwa kOmwene, 18 kuJerusalem nokoilando yaJuda neehamba domusho nomalenga asho, opo i ninge oshala shoimbodi noshitilifa nesheko nefingo ngaashi shi li nena eli, 19 Farao, ohamba yaEgipiti novapiya vaye nomalenga aye novanhu vaye aveshe; 20 noonakukalamo aveshe vomoludi keshe, eehamba adishe dokoshilongo shaUs; neehamba adishe dokoshilongo shOvafilisti moilando Askelon naGasa naEkron noixupe yomuAsdod; 21 Edom naMoab noludalo laAmmoni; 22 eehamba adishe domuTirus neehamba adishe domuSidon neehamba adishe dokomunghulo wa ama kEfuta Lopokati; 23 Dedan naTema naBus naava va kululwa omixungo, 24 neehamba adishe daArabia neehamba adishe dovanhu vomoludi keshe hava kala mombuwa, 25 neehamba adishe domuSimri neehamba adishe domuElam neehamba adishe domuMedia; 26 neehamba adishe dokoumbangalanhu, ngaashi di li naava ve li popepi ile kokule, imwe nashimwe, heeno, omauhamba aeshe edu aa e li kombada yedu. Nohamba yaSesak tai ke di shikula mokunwa. 27 Ndele ove u noku va lombwela nokutya: Omwene womatanga ovakwaita, Kalunga kaIsrael ota ti ngaha: “Nweni, kolweni nye mu kunge nye mu lidenge poshi muha penduke vali moipafi yeongamukonda handi li tumu mokati keni.” 28 Ndele ngeenge tava anye okutambula eholo meke loye nokunwa mo, ove u noku va lombwela u tye: Omwene womatanga ovakwaita ota ti: “Nye omu nokunwa!” 29 Osheshi tala, ehanauno ohandi li hovele moshilando eshi sha lukilwa edina lange; nye otamu kala ngeno inamu handukilwa? Onye itamu kala itamu handukilwa, osheshi kombada yoonakukala aveshe kedu ohandi ifana eongamukonda, osho Omwene womatanga ovakwaita ta popi.
30 Ndelenee ove, eendjovo odo adishe, ou noku di va xunganekela u va lombwele u tye: “Moule wopombada Omwene ota ka ndunduma ndele ta kuwaanifile ondaka yaye monhele yaye iyapuki. Ye ota ka ndunduma neenghono kombada yonhele yaye. Ota yelula ondaka ngaashi omulyati weeviinyu noku i yelulila oonakukalamo aveshe vedu. 31 Ekolokoto loita otali udika fiyo okomaxulilo ledu, osheshi Omwene ota tu eemhata noiwana, Ye ota hokololifa ombelela aishe. Ovakolokoshi ote va efele eongamukonda, Omwene osho ta ti.” 32 Omwene womatanga ovakwaita osho ta ti: Taleni, oshiponga tashi ende koshiwana noshiwana noshikungulu shidjuu otashi tukuluka kominghulo daxuuninwa dedu. 33 Ndele mefiku tuu linya oonakudipawa kOmwene otava ka kala nokunangala kominghulo dounyuni fiyo ominghulo dikwao, itava lilwa eenghali vo itava pakwa; otava ningi oushosho wedu.
34 Akutu, lileni onye ovafita, liameneni kombada nye mu lidedaule momute, onye ovanaenghono voshiwana! Osheshi efimbo leni ola fika, mu dipawe; ndelenee tamu hanauka ndele tamu ke lidenga poshi ngaashi oshitoo sha wapala shi nondilo. 35 Itapa kala vali oshihondameno shovafita nexupifo lokuxupifa ovanaenghono voshiwana. 36 Uda! Onghuwo yovafita nekemo lovanaenghono voshiwana tali udika, shaashi Omwene ota nyonauna po oufita wavo. 37 Omalwandjelo etulumuko a hanaunwa po kexwamo lehandu lOmwene. 38 Oye okwa shituluka moshixwa ngaashi onghoshi yonyasha; oshilongo shavo osha ninga ombuwa okeongamukonda li neenghono nokexwamo lehandu laye.
© Oshikwanyama Bible Revised © Bible Society of Namibia, 2008, 2012.
