JEREMIA 23 - Oshikwanyama Bible (OKYB)

Ovafita vai nomufita muwa

1 “Woo ovafita ava tava hanauna ndele tava halakanifa po eedi doufita wange,” ta ti Omwene. 2 Onghee hano Omwene Kalunga kaIsrael mokupopya ovafita ava, hava lifa ovanhu vange, ota ti: “Nye omwa halakanifa po eedi dange nomwe di ta po, nye inamu di diinina. Tala, paife onda hala ndi diinine moku mu handukilila oilonga yeni ii, Omwene osho ta ti. 3 Ndele Ame mwene ohandi ka kongolola oshixupe sheedi dange koilongo noilongo, oko nda li nde di taataela ko, ndele handi ke di alulila moufita wado, di dale nodi hapupale. 4 Ndele Ame ohandi ke di kongela ovafita, vo ve di life, do itadi tila vali, do itadi haluka, ndele kamu na nande imwe ihe po, Omwene osho ta ti.

5 “Taleni, omafiku otae uya, Omwene ta ti, Ame ohandi ka tutumifila David oshitutumine shouyuki, ndele ye ota ka kala ohamba ndele ta ka pangela nounongo, ndele ta diinine osho sha yuka ndele ta wanifa ouyuki moshilongo. 6 Momafiku aye Juda ota ka xupifwa naIsrael ota ka kala ehe nombudi, nedina laye tali ifanwa, olo eli: ‘Omwene ouyuki wetu.’

7 “Onghee hano taleni, omafiku otae uya, Omwene ta ti, ovo itava ka tya vali: ‘Oshili, ngaashi Omwene e nomwenyo, ou a tembula mo ovana vaIsrael medu laEgipiti,’ 8 ndelenee otapa tiwa: Oshili, ngaashi Omwene e nomwenyo, a alula oludalo lomeumbo laIsrael okoshilongo shoumbangalanhu nokoilongo aishe Ame nde va taataelele ko. Ndele vo otava ka kala moshilongo shavo.”

Ovaxunganeki ovanaipupulu tava popiwa

9 Okupopya ovaxunganeki; Omutima wange monhulo yange owa tatuka. Omakipa ange aeshe a tyololoka. Ame ndi li ngaashi omulumenhu a kolwa, ngaashi omuladi a natwa po komaviinyu. Osho ndi li koshipala shOmwene nokeendjovo daye diyapuki. 10 Osheshi edu ola yada ovatei vohombo. Edu otali nyika oufiye molwefingo. Oufita wokomalondo wa kukuta, eshi tave shi hokele, oshii. Naapa tave likongele neenghono davo osho sho inashi yuka.

11 Omwene osho ta ti: “Ovaxunganeki nosho yo ovapristeli vehe na Kalunga. Mongulu yange mwene nda hangele mo owii wavo. 12 Onghee hano ondjila yavo tai ka kala kuvo ngaashi elila li nomufenhu momilaulu otava ka fenunguta, ndele otave lidenge poshi. Osheshi Ame ohandi ke va etela omupya momudo wokuhandukilwa kwavo.” Omwene osho ta ti. 13 “Movaxunganeki vomuSamaria onda mona oixuna. Ohava xunganeke medina laBaal, ndele tava pukifa ovanhu vange Ovaisraeli. 14 Ndelenee movaxunganeki vomuJerusalem onda hanga mo oixuna yongaho inene; vo ohava teya ohombo nohava ende noipupulu. Vo ohava pameke omake ovalongi vowii, nosho ngaha itapa monika nande umwe te lidilulula kowii waye. Vo aveshe ove li moipafi yange ngaashi Sodom, noonakukalamo musho ngaashi Gomorra.”

15 Onghee hano Omwene womatanga ovakwaita mokupopya ovaxunganeki ta ti: “Tala, Ame ohandi va lifa oimbodi ilula nohandi va nwefa omeva oudiyo. Osheshi movaxunganeki Ovajerusalem omwa dja edinokalunga la tandavela noshilongo ashishe.” 16 Omwene womatanga ovakwaita ota ti ngaha: “Inamu pwilikina eendjovo dovaxunganeki ava, tave mu xunganekele. Otave mu yadifa nomateelelo ongaho. Omamoniko omitima davo vene tave a udifa, ndelenee hasheshi tashi di mokanya kOmwene. 17 Alushe hava lombwele oonakudina nge: Omwene okwa popya: ‘Otamu kala mu nombili,’ naaveshe ava hava ende moukukutu womitima davo otave va lombwele tava ti: ‘Oshiponga itashi ke mu hanga.’ ” 18 Ndelenee olyelye a kala peenghundafana dOmwene nokwa mona nokwa uda ondjovo yaye? Olyelye a tula mo monhulo yaye ondjovo yaye nokwe i uda? 19 Tala, oshikungulu shOmwene otashi tukuluka, oupyuhandu tau uya nokafudaela otaka alangatele komitwe dovakolokoshi. 20 Ehandu lOmwene itali ka pola, manga Ye ina ninga, Ye ina wanifa omadiladilo okomutima waye. Pomafiku axuuninwa nye otamu ke shi shiiva shili. 21 Ovaxunganeki ava nande haame nde va tuma ko, vo otava tondoka. Ame inandi va lombwela sha, ndelenee vo otava xunganeke. 22 Ndelenee ngeno ova li po peenghundafana detu, ngeno va udifila ovanhu vange eendjovo dange nove va alula keendjila davo dii nokowii woilonga yavo. 23 Omu shii Aame Kalunga kopopepi apeke vati, Omwene osho ta ti, nondihe fi Kalunga kokule yo? 24 Olyelye ta dulu okuhondama a fudama, opo ndihe mu mone, Omwene osho ta ti. Haame ou handi yadifa edu neulu, Omwene ta ti?

25 Ame onda uda osho ovaxunganeki ovo tave shi tongo, ava hava xunganeke oipupulu medina lange ndele tava ti: Ame onda nangala ondjodi, onda nangala ondjodi! 26 Hano fiyo onaini tashi kala ngaha? Ovaxunganeki ava tava xunganeke oipupulu ndele tava xunganeke omakoto omomitima davo, ove na shike momadiladilo avo? 27 Ova hala ngeno neendjodi davo have di hepaululilafana, okudimbwifa ovanhu vange edina lange, ngaashi ooxekulu va dimbwa edina lange omolwaBaal. 28 Omuxunganeki ou a nangala ondjodi, na hepaulule ondjodi yaye, ndelenee ou e kwete ondjovo yange, na hepaulule ondjovo yange moshili. Oihati oi na shike noilya, Omwene osho ta ti. 29 Ondjovo yange inai fa omundilo ngeno, Omwene osho ta ti, nongaashi ohamala tai nyanyaula emanya? 30 Tala, onghee hano ohandi hange ovaxunganeki ovo, Omwene ta ti, hava vakafana eendjovo dange. 31 Tala, Ame ohandi ka hanga ovaxunganeki, Omwene ta ti, ava tava popi eshi elaka lavo vene tali shi eta, ndele tava ti: Omwene ta tongo. 32 Tala, Ame onda hala okuhanga ava tava xunganeke eendjodi davo doipupulu, Omwene ta ti, vo otave di hepaulula notava pukifa ovanhu vange noipupulu yavo nonokulitanga kwavo, nande Ame inandi va tuma, Ame inandi va lombwela, nongaashi kave na eshi tava kwafa ovanhu vange. Omwene osho ta ti.

33 Ovanhu ava vange ile omuxunganeki ile omupristeli ngeenge te ku pula ndele ta ti: Omutengi wexunganeko lOmwene ulipi? Opo nee va lombwela u tye: Onye omutengi! Ndele Ame ohandi ke mu ekelashi, Omwene osho ta ti. 34 Ndele omuxunganeki ou nomupristeli ou novanhu ava tava ti: “Omutengi wOmwene”, ohandi ke va handukila pamwe neumbo laye. 35 Osho mu nokulombwelafana, omushiinda nomushiinda, omukwao nomukwao mu tye: Omwene okwa nyamukula shike? Omwene okwa popya shike? 36 Ndelenee etumbulo eli: “Omutengi wOmwene”, inamu li tumbula vali, osheshi ondjovo yakeshe umwe otai ka ninga omutengi waye mwene. Onye ohamu pilike eendjovo daKalunga omunamwenyo, dOmwene womatanga ovakwaita, Kalunga keni. 37 Osho hano u nokulombwela omuxunganeki: Omwene okwe ku nyamukula shike? Omwene okwa popya shike? 38 Ndelenee ngeenge tamu ti: “Omutengi wOmwene”, opo nee Omwene ota ti ngaha: Eshi nye tamu tumbula etumbulo eli: “Omutengi wOmwene”, nande Ame onde mu lombwela, inamu tumbula vali omutengi wOmwene, 39 onghee hano taleni, Ame ohandi ke mu tumba mo nohandi mu ekeleshi, onye vene noshilando sheni, nde shi mu pa nooxokulu. Ohandi mu kandula po koshipala shange. 40 Ndele ohandi ke mu twika esheko nodino fiyo alushe, itai ka dimbuwa.