OVATOKOLIPANGELI 18 - Oshikwanyama Bible (OKYB)

Mika nOvadan

1 Momafiku enya muIsrael kamwa li ohamba. Ndele momafiku enya epata lOvadan tali likongele oshitukulwafyuululwa, va kale mo, ndele fiyo okefiku tuu linya, lo inali mona oshitukulwafyuululwa sha wana mokati komapata aIsrael. 2 Novana vaDan ova tuma ovalumenhu vatano ovaladi vomoludi keshe lepata lavo, va dja kuSorea naEstaol, va ka lave edu nokweendaenda nokutalatala ndele tava ti kuvo: Indeni mu ka talaatale edu. Ndele venya va ya keemhunda daEfraim fiyo okongulu yaMika, noko va kala oufiku. 3 Vo eshi va li pongulu yaMika ndele va uda ondaka yomulumenhu omunyasha, Omulevi, ve uya kuye ndele tava ti kuye: “Olyelye e ku eta apa? Ove oto ningi shike apa? Oto kongo shike apa?” 4 Opo nee ye ta ti kuvo: “Mika okwa yukifila nge shonhumba noshongadi, nokwa tambula nge moshilonga, naame nda ninga omupristeli waye.” 5 Opo nee ve mu lombwela: “Tu pulila kuKalunga opo tu shiive ondjila ei hatu ende nayo, ngeenge oi nelao.” 6 Nomupristeli okwe va lombwela: “Indeni nombili. Ondjila yeni tamu ende nayo, oi li koshipala shOmwene!” 7 Opo nee ovalumenhu ava vatano va dja po ndele ve uya kuLais. Ndele va mona nokutya, ovanhu ava va kala ko, ova li vehe noshisho panghedi yOvasidoni, ve nombili vehe noisho. Ndele inapa kala nande umwe a pongeka sha moshilongo osho mokunyeka emona. Ndele venya va li kokule nOvasidoni ndele inava endafana novanhu vamwe. 8 Ndele vo eshi ve uya kovakwao muSorea nomuEstaol, ovakwao ve va lombwela, tava ti: “Tamu ti shike?” 9 Ndele va nyamukula: “Lipyakudukeni, natu va homoneni! Osheshi twa mona oshilongo shavo, ndele taleni, sho oshiwa unene. Nye otamu mwena ashike! Inamu ongaonga okufikama, mu ye ko oku shi nangala. 10 Nye ngeenge tamu fiki ko, tamu ka fika kovanhu vehe noshisho. Noshilongo shi neenhele keembinga adishe, osheshi Kalunga ote shi yandje momake eni, onhele inya inai pumbwa nande sha shi li kombada yedu.”

11 Opo nee ovalumenhu omafele ahamano va dililwa oiti vomoludi lOvadan va fikama va dja muSorea nomuEstaol. 12 Ndele vo va ya ndele tava ongo onhanda pouninginino waKiriat-Jearim muJuda. Onghee hano hava ifana onhele inya fiyo onena Onhanda yOvadan. Yo i li kombada yaKiriat-Jearim. 13 Ndele va dja ko ndele tave uya keemhunda daEfraim ndele va fika fiyo okongulu yaMika. 14 Opo nee ovalumenhu venya vatano ava va ile okulava oshilongo shaLais, va hovela okulombwela vakwao: “Mu shii tuu kutya meumbo eli omu noshikutu shokomapepe noikalunga yomeumbo noshihongwafano noshitelekwafano? Shiiveni hano paife osho mu nokuninga!” 15 Vo ova tengunuka ndele ve uya keumbo lomulumenhu omunyasha, Omulevi, kongulu yaMika, ndele tave mu kundu. 16 Fimbo ovalumenhu omafele ahamano vomovana vaDan va dililwa oiti va kala ofika ponhu, 17 ovalumenhu venya vatano ava va ile okulava oshilongo, va ya mo, ndele tava kufa mo oshihongwafano noshikutu shokomapepe noikalunga yomeumbo noshitelekwafano, fimbo omupristeli a kala ofika ponhu pamwe novalumenhu omafele ahamano va dililwa oiti. 18 Vo eshi va ya mongulu yaMika ndele va kufa mo oshihongwafano, oshikutu shokomapepe noikalunga yomeumbo noshitelekwafano, omupristeli okwe va pula: “Otamu ningi shike?” 19 Ndele ve mu lombwela: “Mwena, likwata komilungu ndele ila, tu yeni pamwe, u ninge tate nomupristeli wetu. Oshe ku wapalela okuninga omupristeli womeumbo lomulumenhu umwe ile okuninga omupristeli wepata limwe noludi limwe lomuIsrael?” 20 Opo nee omutima womupristeli wa hafa, nokwa kufa oshikutu shokomapepe noikalunga yomeumbo noshihongwafano ndele ta i mokati kovalumenhu. 21 Ndele vo ova dja po nokweehena komesho, ounona noimuna noinima iwa ya li mongudu yokomesho. 22 Vo eshi va ehena komesho kanini kongulu yaMika, ovalumenhu vomomaumbo omoushiinda weumbo laMika va shivwa, ndele tava shikula ovana vaDan, 23 ndele tava ingida kovana vaDan. Opo nee va piluka ndele tava pula kuMika, tava ti: “Ou na shike, eshi wa ongela ovanhu voye?” 24 Ndele ye ta ti: “Nye mwa kufa po oikalunga yange nde i ninga nomupristeli, ndele tamu i: ‘Ondi na shike vali?’ Nye otamu dulu ngahelipi okulombwela nge: U na shike?” 25 Ndelenee ovana vaDan tava ti kuye: “Ino tu weelela vali, ovalumenhu vaha handuke noku mu totela, nye otamu kanifa eemwenyo deni vene nodovakweni.” 26 Opo nee ovana vaDan va enda nondjila yavo, fimbo Mika, eshi a mona vo ve mu dule, okwa piluka nokwa shuna keumbo laye.

27 Ndelenee vo ova ya noinima ei Mika e i ninga nomupristeli waye. Ndele va totela Lais, ovanhu venya va kala va tulumukwa ndele vehe noshisho, ndele ve va dipaa neongamukonda ndele tava xwike po oshilando. 28 Ndele kapa li nande omuxupifi, osheshi sho sha li kokule naSidon ndele vo inava endafana novanhu vamwe. Sho sha li mefilu laBet-Rehob. Ovadan va tungulula vali oshilando, ndele ve shi nangala, 29 ndele ve shi luka Dan padina laxe Dan, ou a dalelwa kuIsrael. Ndelenee edina loshilando la li shito Lais. 30 Novana vaDan ve lidikila oshihongwafano. Ndele Jonatan yaGersom yaMoses novana vaye ovalumenhu va li ovapristeli vomepata laDan fiyo okefiku linya ovanhu voshilongo va kufwa mo. 31 Ndele vo ve lidikila oshihongwafano shaMika, osho sha ningwa kuye, momafiku aeshe etwali laKalunga la li muSilo.