OVATOKOLIPANGELI 16 - Oshikwanyama Bible (OKYB)

Simson naDelila

1 Ndele Simson okwa ya kuGasa ndele oko a mona ombwada nokwa ya mo kuye. 2 Ovagasa eshi va shiivifilwa nokutya, Simson e uya mo, vo ove mu dingilila noku mu nangela oufiku aushe poshivelo shoshilando. Noufiku aushe va mwena ndele tava ti: Eluwa eshi tali tende, fye ohatu mu dipaa. 3 Ndele Simson okwa nangala fiyo opokati koufiku. Ndele pokati koufiku ye okwa penduka nokwa kwata omivelo doshivelo shoshilando noikulo ivali ndele okwe i dokola mo pamwe noiidilifo noivela aishe nokwe i leka komapepe aye ndele te i twala koxulo yomhunda ya shaama naHebron.

4 Pomafiku okomesho ye okwa hokwa omukainhu mefilu laSorek, edina laye Delila. 5 Opo nee ovakulunhu vOvafilisti ve uya kuDelila ndele tava ti kuye: Mu heka u mu faafae eenghono daye dinene odi li peni, ndele hatu dulu ngahelipi oku mu kwata noku mu manga tu mu shundule. Opo nee keshe umwe womufye ote ku pe eesekeli doshisiliveli eyovi limwe nefele limwe. 6 Opo nee Delila okwa pula kuSimson: Lombwele nge omolwashike u neenghono dinene, ndele u nokumangwa nashike ngeno u shunduke? 7 Ndele Simson ta ti kuye: Vo ngeenge hava mange nge neefipa heyali dipe, do inadi kukuta, opo nee eenghono tadi kana ndele handi kala ngaashi ovanhu vamwe. 8 Opo nee ovakulunhu Ovafilisti ve mu etela eefipa heyali dipe inadi kukuta ndele ye okwe mu manga nado. 9 Ndele fimbo monduda yaye yomeni mwa li ovanangeli, ye okwe mu lombwela: “Simson, Ovafilisti tave ku kwata?” Opo nee ye a tokaula eefipa ngaashi eengodi dongaho da lungwina. Ndelenee eenghono daye inadi shiivika apa da dja. 10 Opo nee Delila ta ti kuSimson: Tala, ove wa kengelela nge ndele wa lombwela nge oipupulu. Lombwele nge hano, ove to ka mangifwa nashike? 11 Nokwe mu nyamukula: Vo ngeenge tava mange nge neengodi dipe da pama, odo inadi longifwa, opo nee eenghono tadi kana ndele handi kala ngaashi ovanhu aveshe. 12 Opo nee Delila okwa kufa eengodi dipe nokwe mu manga nado ndele ta ti kuye: “Simson, Ovafilisti tave ku kwata,” fimbo ovanangeli va kala monduda. Ndelenee ye okwe di tokaula komaoko ngaashi ongodi. 13 Ndele Delila ta ti kuSimson: Fiyo paife wa kengelela nge ndele wa lombwela nge oipupulu. Lombwele nge hano, ove to ka mangifwa nashike? Ndele ye okwe mu nyamukula ta ti: Ove ngeenge to tungu omapando aheyali eexwiki dokomutwe wange kumwe noshiyata to shi tungu. 14 Opo nee ye e di finda noshifindifo ndele ta ti kuye: Simson, Ovafilisti otave ku kwata! Ndele ye okwa duduluka meemhofi daye nokwa tokola oshifindifo pamwe noshiyata. 15 Ove to dulu ngahelipi okutya: Ame ondi ku hole fimbo omutima woye uhe li mwaame? Lutatu nokuli wa kengelela nge ndele ino shiivifila nge kutya eenghono u di na oda dja peni? 16 Ndele ye eshi e mu fininika efiku keshe neendjovo daye noku mu hepeka, ye okwa loloka fiyo okufya. 17 Nokwe mu hepaululila omutima waye aushe ndele ta ti kuye: Oshimbi inashi kuma nande omutwe wange, osheshi ame Omunasiri waKalunga okudja medimo lameme. Ame ngeenge handi kululwa, eenghono dange tadi yapuka mwaame ndele eenghono dange tadi kana ndele handi ka kala ngaashi ovanhu aveshe. 18 Delila eshi a mona nokutya, ye okwe mu hepaululila omutima waye aushe, ye okwa ifana ovakulunhu vOvafilisti ndele ta ti: Ileni hano paife, osheshi winya okwa hepaululila nge omutima waye aushe. Opo nee ovakulunhu vOvafilisti ve uya kuye noimaliwa yavo. 19 Ndele ye okwe mu nangeka mekolo laye ndele te mu kofeke, ndele ta ifana omulumenhu umwe nokwa teta omapando aye aheyali eexwiki dokomutwe waye. Ndele ye okwa hovela oku mu shundula, neenghono daye da dja mo. 20 Opo nee ye ta ti: Simson, Ovafilisti tave ku kwata! Ndele ye eshi a duduluka meemhofi daye, ye ta ti: Ame ohandi ke limangulula ngaashi shito nokulitukumuna. Osheshi ye ina shiiva nokutya, Omwene e mu efa. 21 Opo nee Ovafilisti ve mu kwata ndele ve mu twiyula omesho aye, ndele ve mu twala kuGasa ndele tave mu mange nelyenge loshikushu; ndele ye e nokutwa moshini modolongo. 22 Ndelenee eexwiki daye dokomutwe da hovela vali okututuma, konima eshi da kululwa.

Efyo laSimson

23 Novakulunhu vOvafilisti va ongala va ka yambele kalunga kavo Dagon, eyambo linene nokuhafa; ndele tava ti: Kalunga ketu e tu pa omutondadi wetu Simson momake etu. 24 Novanhu eshi ve mu mona va hambelela kalunga kavo, shaashi va tile: “Kalunga ketu e tu pa omutondadi wetu nomuhanauni woshilongo shetu, ou a dipaa po vahapu vomufye.” 25 Ndele omitima davo eshi da li da nyakukwa pombada, tava ti: Ifaneni Simson, ye e tu shikile okaxumba! Ndele va ka tala Simson modolongo. Ndele ye okwa shika moipafi yavo ndele ve mu tula ofika pokati keengudi mbali; 26 ndele Simson ta ti komupiya ou e mu kwata komhango: Efe nge ndi kwatelele eengudi odo hadi humbata ongulu, opo ndi shiive oku di yaamena. 27 Nongulu i yadi ovalumenhu novakainhu, novakulunhu aveshe vOvafilisti omo va li. Nokombada yonduda pa li ovalumenhu novakainhu ngeno omayovi atatu, ava va tala Simson eshi ta shiki okaxumba. 28 Opo nee Simson ta kuu kOmwene ndele ta ti: Omwene Kalunga, dimbulukwe nge, u pameke nge lumwe aluke, akutu Kalunga, opo ndi shiive okukwatelela Ovafilisti eisho lange limwe lomomesho ange avali onghone! 29 Ndele Simson okwa papatela eengudi mbali odo da kwata ongulu, imwe e i kwata nokwooko kwokolulyo naikwao onokwooko kwokolumosho ndele ta yaamene kudo. 30 Ndele Simson ta ti: Nandi fye pamwe nOvafilisti! Nokwe lifidimika neenghono, opo ongulu ya wila mo kombada yovakulunhu nokombada yovanhu aveshe ava va li mo. Ovafi ava ye e va dipaa pefyo laye, va li vahapu, ve dule venya e va dipaa fimbo a li e nomwenyo. 31 Ovamwaina neumbo laye alishe, ve uya, ve mu kufa, ndele ve mu twala ndele tave mu pake pokati kaSorea naEstaol mombila yaxe Manoah. Ye okwa pangela Israel omido omilongo mbali.