1 Olyelye a itavela eudifo letu, nokwooko kwOmwene okwa hololelwa lyelye? 2 Okwa holoka koshipala shOmwene ongoshitutumine ngaashi omudi womedu likukutu. Kakwa li e nolupe noshinge, ngeno tu mu tale, ye kakwa li e nondilo, ngeno tu mu hokwe. 3 Ye okwa li a dinika, okwa li a efiwa kovanhu, omulumenhu womaluhodi nomwiiki wouyehame, heeno, ngaashi umwe molwaye aveshe ova uvika oipala yavo, vehe mu tale; Ye omudinwa ndele Ye otwe mu tala a fa oshinima shongaho. 4 Ndele Ye okwe litwika oudu wetu, nokwa humbata omauyehame etu. Fye otwe mu tala, a handukilwa, a hepekwa nokwa dengwa kuKalunga, 5 ndelenee Ye okwa tuwa molwomatauluko etu, nokwa nyanyaulwa molwowii wetu. Ehandu ole mu hanga, opo tu kale tu na ombili, ndele twa velulwa molwoipute yaye. 6 Fye atushe otwa pukile ngaashi eedi, twe liyukila, keshe umwe nondjila yaye mwene. Ndelenee Omwene okwa twika kombada yaye omatauluko etu atushe. 7 Okwa hepekwa shaashi e liyandja Ye mwene, Ye ina makula okanya kaye, ongaashi odjona tai twalwa i ka dipawe, nongaashi odi tai mwenenene omukululi wayo, naye yo ina makula okanya kaye. 8 Ye okwa kufwa mefininiko nometokolo, ndele olyelye womepupi laye e shi diladila? Oye a tetwa mo medu lovanamwenyo; molwomanyonauno oshiwana shange, ehandu ole mu hanga. 9 Ndele okwa pewa ombila yaye opwaava vehe na Kalunga, ndele mokufya kwaye okwa ka kala poshipuna, osheshi Ye ina nyona ouyuki, ndele ke na oipupulu mokanya kaye. 10 Ndelenee osha wapalela Omwene oku mu nyanyaula, Ye e mu denga noudu; ngeenge ta yandje omwenyo waye u ninge etimbayambo opo nee ota ka mona oludalo, ndele ta kala e na omwenyo mule, ndele ta wanifa ehalo lOmwene. 11 Molwoudjuu womwenyo waye ote ke shi mona ndele ta kuta; nomolweshiivo laye Omupiya wange omuyuki ota ka ninga vahapu ovayuki, ndele Ye ota humbata omatimba avo. 12 Onghee hano ohandi mu pe oshitukulwa mokati kovanenenhu, ndele ta ka tukula oshihakanwa pamwe novanaenghono, osheshi okwa yandja omwenyo waye mefyo nokwa valulilwa movakolokoshi, okwa humbata omatimba avahapu nokwa ilikanena ovanyoni.
© Oshikwanyama Bible Revised © Bible Society of Namibia, 2008, 2012.
