Eenghundana dehafo molwexupifo laSion
1 Duduluka po, duduluka po, lidika neenghono, oove Sion. Akutu oove Jerusalem, lidika oshikutu shoshivilo, oove oshilando shiyapuki! Osheshi mwoove itamu uya vali ou ina pita etanda ile omunashipo. 2 Lipupula ondwi, yeluka u kale omutumba koshipundi shoye, oove onghwate Jerusalem; xukula mo eemango doye mofingo, oove onghwate, omona okakadona Sion.
3 Osheshi Omwene ota ti: “Nye omwa landifwa po oshimha, otamu ka kulilwa yo pehe noimaliwa. 4 Osheshi Omwene, Omwene ota ti: Ndele ovanhu vange ova tembukilile kuEgipiti, va ka kale ko ovaenda, nena Asiria okwe va fininika oshimha. 5 Ndelenee paife ondi na shike apa, Omwene ta ti; oshiwana shange, eshi sha kufwa nge oshimha? Ovapangeli vasho otave litange, Omwene ta ti, naalushe omutenya aushe, edina lange otali shekwa. 6 Onghee oshiwana shange otashi ka shiiva edina lange mefiku tuu olo ove na okushiiva nge. Ame ou handi popi, handi ti: Tala, ondi li apa.”
7 Eenghatu daau ha popi eenghundana dehafo, oda wapala ngahelipi keemhunda, daau ta udifile ovanhu ombili, ndele ta hepaululile ovanhu ondaka iwa, daau ta udifa ekulilo, ou ta lombwele Sion, ta ti: “Kalunga koye Oye ohamba.” 8 Uda! Ovanangeli voye tava popi mokule, aveshe mumwe tava kuwilile pombada, osheshi otava tale oshipala noshipala nhumbi Omwene ta alukile kuSion. 9 Kuwilileni nye mu nyakukwe pombada, omakulukuma nye amushe aJerusalem, osheshi Omwene ota hekeleke oshiwana shaye, ta kulile Jerusalem. 10 Omwene okwa holola okwooko kwaye kuyapuki moipafi yoiwana aishe, nominghulo adishe dedu otadi ka mona exupifo laKalunga ketu. 11 Djeni ko, djeni ko! Tembukeni ko, inamu kuma oshipo; djeni mo mokati kavo, lifeteni onye ovahumbati voitoo yOmwene. 12 Osheshi nye itamu di mo omhulukuta, itamu ka tembuka mo nokweendelela, osheshi Omwene ote mu kwatele komesho, Kalunga kaIsrael ta kala monima yeni.
Okuhepekwa nokunenepekwa kwomupiya wOmwene
13 Tala, omupiya wange ota ka kala e na elao, ota ka nenepekwa nokulengwa, ndele ta nenepala.
14 Ngaashi vahapu ve mu haluka, osheshi olupe laye ola alamekwa, ola shituka, nokufa kwaye inaku fa vali kwovana vovanhu, 15 osho ta ka kumwifa oiwana ihapu, eehamba otadi ke likwata komilungu, da kumwa. Osheshi eshi inave shi hepaululilwa, otave shi mono. Naashi inave shi uda otave ke shi shiiva.
© Oshikwanyama Bible Revised © Bible Society of Namibia, 2008, 2012.
