Kalunga ota kulile oshiwana shaye Israel ondobwedi yOmwene
1 Ndelenee paife Omwene ota ti ngaha, Omwene ou e ku shita, Jakob, ou e ku longekida, Israel: “Ino tila, osheshi Ame onde ku kulila, Ame onde ku ifana edina loye, oove owange. 2 Ngeenge to pitile momeva, Ame ondi li pwoove; ngeenge pe nomilonga domeva itadi ku yelula; ngeenge to pitile momundilo, itau ku lungwinifa, nelaka lomundilo itali ku xwike. 3 Osheshi Aame Omwene, Kalunga koye, Omuyapuki waIsrael nOmuxupifi woye. Egipiti ohandi shi yandje oikulila yoye naEtiopia naSeba ponhele yoye. 4 Osheshi ove u nondilo momesho ange, nomufimanekwa, shaashi ondi ku hole, onghee ohandi yandje ovanhu ponhele yoye noiwana ponhele yomwenyo woye.
5 “Ino tila, osheshi Ame ondi li pwoove; oludalo loye ohandi ke li tala ko koushilo nohandi ku kombelele kouninginino. 6 Ame ohandi ka lombwela oumbangalanhu: ‘Eta!’ Nombuwanhu: ‘Ino anyena!’ Eta oku ovamwange ovamati vokokulekule, novamwange oukadona vokominghulo dounyuni, 7 keshe ou a lukilwa nge nonde mu shitila efimano lange, nde mu ninga nonde mu wapaleka.” 8 Pitifa mo oshiwana shipofi, nande oshi nomesho, novafitamatwi, nande ove na omatwi. 9 Oiwana aishe oya ongala novanhu voilongo ve uya kumwe. Olyelye womokati kavo e shii okuholola oinima ya tya ngaha? Ile nave tu shiivifile ei yonale, nava ete oku eendobwedi, nadi holole, nokutya ove li moshili. Opo nee tapa udika ndele tapa tiwa: Heeno, oshili. 10 Omwene ta ti: “Onye eendobwedi dange, nomupiya wange, ou nde mu hoolola, opo mu shiive nge, nye mu itavele nge, nye mu shiive kutya, Aame tuu ou. Kape na kalunga a shitwa, nde mu shikula, ndele pehe na umwe ta shikula nge. 11 Aame, Aame Omwene, ndele kape na omuxupifi umwe, Aame andike. 12 Ame ou nda udifa nonda xupifa nonda holola, ndele mokati keni inamu kala kalunga omunailongo. Onye eendobwedi dange.” Omwene osho ta ti: “Ndele Aame Kalunga. 13 Heeno, nghee nda dja nale nonena, Aame tuu ou. Kape na ou ta dulu okuxupifa meke lange. Ame eshi nda longa, olyelye te shi longolola?” 14 Omwene, Omukulili weni, Omuyapuki waIsrael osho ta ti: “Omolweni ohandi tumu kuBabilon, handi va shingi ngaashi oonakufaduka po. Ovakaldea ohandi va undulile momawato oo ehafo lavo. 15 Aame, Omuyapuki weni, Aame Omushiti waIsrael, Ohamba yeni.” 16 Omwene osho ta ti, ou a ninga ondjila mokati komeva nelila mokati komeva madjuu, 17 Oye ou a twala koita omatemba neenghambe, eenghono domatanga novakwataiti, vo aveshe ohava nangala mumwe, itava ka penduka po vali, ova dimwa po ngaashi onyika tai dimwa: 18 “Inamu dimbulukwa oinima yonale, nye inamu diladila inya ikulu yonale. 19 Taleni, Ame ohandi shiti oshinima shipe, sha tutuma nokuli, inamu shi dimbulukwa? Heeno, ohandi kokola ondjila mombuwa, omilonga ohandi di tondokifile mofuka. 20 Oifitukuti yomoixwa otai ka fimaneka nge, ouvandje neemho, osheshi handi tondokifile omeva mombuwa, nomilonga mofuka, opo oshiwana shange, oshihoololwa shange shi nwe. 21 Oshiwana eshi nde limela, tashi ka vilikila ehambelelo lange.
22 “Ndelenee, akutu Jakob, ove ino ifana nge, naave Israel, ino lihepekela nge. 23 Ove ino etela nge eedi di ninge exwikiloyambo loye, ndele ino fimanekifa nge nomatomenoyambo. Ame inandi ku lolokifa neendjayambo, noinandi ku djuupalifa netwiminoyambo. 24 Ove ino landela nge okalmus noimaliwa, noino kutifa nge nomaadi omatomenoyambo oye; ndelenee ove wa humbatifa nge oudjuu womatimba oye, ndele wa lolokifa nge nomanyonauno oye. 25 Aame, heeno, Aame ou, handi dimi po omanyonauno oye molwange mwene, ndele Ame itandi dimbulukwa vali omatimba oye. 26 Ndelenee dimbulukife nge, tu ka hokololeni. Ove popya, u holole ouyuki woye. 27 Xokulu wotete okwa nyona novapopili voye ove liteeka nge. 28 Osho nee onda xutula ovakulunhu ovayapuki, ndele nda yandja Jakob mehanauno naIsrael mesheko.
© Oshikwanyama Bible Revised © Bible Society of Namibia, 2008, 2012.
