Ovatumwa vohamba yokuBabilon
1 Mefimbo tuu linya Merodak-Baladan ohamba yaBabilon, okwa tumina Hiskia onhumwafo noshali, eshi a uda, kutya okwa li ta vele, ndele paife a veluka. 2 Ndele Hiskia okwa hafela ovatumwa, ndele te va ulikile ongulu yoipako yaye, oshisiliveli noshingoldo noidimba, nomaadi ondilo, nongulu yoilwifo nakeshe eshi shi li mo mongulu yoipako yaye. Inapa kala nande osha, osho Hiskia ine shi va ulikila, meumbo laye nomouhamba waye aushe. 3 Opo nee omuxunganeki Jesaja okwe uya kohamba Hiskia, ndele te mu lombwele ta ti: “Ovalumenhu ava otava popi shike nova dja peni?” Hiskia okwa tya: “Ova dja kedu lokokule, kuBabilon, nove uya kwaame.” 4 Ndele ye okwa tya: “Ova mona mo shike meumbo loye?” Ndele Hiskia okwa nyamukula: “Keshe eshi shi li meumbo lange, ove shi tala nomesho, nomeengulu doipako yange kamu na nande osha inandi shi va ulikila.” 5 Opo nee Jesaja okwa lombwela Hiskia, ta ti: “Pwilikina ondjovo yOmwene Kalunga komatanga ovakwaita. 6 Tala, omafiku otae uya, keshe eshi shi li mouhamba woye nooxokulu ve shi tuvikila fiyo onena eli, otashi ka twalwa kuBabilon; itapa ka fyaala nande osha; Omwene osho ta ti. 7 Ndele omovana ovamati voye tava di mwoove, to va dala, vamwe otava kwatwa va ka kale ovapiya vohamba vomouhamba wohamba yaBabilon.” 8 Opo nee Hiskia okwa lombwela Jesaja, ndele ta ti: “Ondjovo yOmwene we i tonga oya wapala.” Ndele ye okwa tya vali: Momafiku ange otapa ka kala ombili, pehe na oumbada nokuli.
© Oshikwanyama Bible Revised © Bible Society of Namibia, 2008, 2012.
