JESAJA 37 - Oshikwanyama Bible (OKYB)

Okuxupifwa kwaJerusalem Okunyonauka po kwaSanheerib

1 Ndele ohamba Hiskia, eshi e shi uda, okwa pombaula oikutu yaye, ndele ta djala oshako, ta i motembeli yOmwene. 2 Opo nee ye okwa tuma Eliakim, elenga leumbo lohamba naSebna, omushangi novakulunhu vomovapristeli, va djala eeshako, ndele te va tumu kuJesaja yaAmos, omuxunganeki. 3 Ndele vo ova tya kuye: Hiskia ta ti ngaha: “Efiku eli olo efiku loudjuu nolehandu nolesheko, osheshi ounona ove uya poshivelo shoshidalelo, ndele kape na eenghono dokulikena. 4 Pamwe Omwene Kalunga koye ta udu eendjovo daRabsake, ou a tumwa komwene waye, ohamba yaAsiria, e mu tuma okusheka Kalunga omunamwenyo, ndele te mu handukilile eendjovo odo Kalunga koye e di uda. Ndele ove yelula eindilo molwoshixupe osho shi li po natango.” 5 Ndele ovapiya vohamba Hiskia, eshi ve uya kuJesaja, 6 Jesaja okwa tya kuvo: “Ka lombweleni omwene weni mu tye: ‘Omwene ota ti: ino tila eendjovo odo wa uda, da shekifwa nge kovapiya vohamba yaAsiria. 7 Tala, Ame ohandi ke mu pa omhepo, nokutya ta udu eenghundana, ota shuna koshilongo shavo, ndele handi ke mu dipaela moshilongo shavo neongamukonda.’ ”

8 Opo nee Rabsake okwa shuna, ndele okwa hanga ohamba yaAsiria tai lwifa Libna, osheshi okwa li a uda nokutya, ye a dja mo muLakis. 9 Ndele Sanheerib eshi a uda Tirhaka, ohamba yaEtiopia, taku tiwa: “Ye okwa fikama e ke mu lwife”, okwa tumununa kuHiskia ondaka tai ti: 10 “Ka lombweleni Hiskia, ohamba yaJuda mu tye: ‘Ino shiivika oulai kuKalunga koye, ou we mu lineekela, eshi to ti: Jerusalem itashi yandjwa momake ohamba yaAsiria. 11 Tala, ove mwene wa uda, eshi eehamba daAsiria da ningila oilongo aishe, nghee di i teya po. Ove ngeno u xupifwe? 12 Oikalunga yoiwana oya xupifa mbela ovo va teyaulwa kootatekulu? Gosan naHaran naResef novana vaEden va kala muTelassar? 13 Ohamba yaHamat, nohamba yaArpad, nohamba yoshilando shaSefarvaim, shaHena noshaIva, odi li peni?’ ”

14 Ndele Hiskia eshi a tambula ombapila momake ovatumwa, okwe i lesha, ndele ta i motembeli yOmwene, ndele te i nyaneke koshipala shOmwene. 15 Ndele Hiskia okwa ilikana Omwene ndele ta ti: 16 “Akutu Omwene womatanga ovakwaita, Kalunga kaIsrael! Ove wa kala omutumba kolukalwapangelo tali humbatwa kovakerubi, Oove auke Kalunga koilongo aishe yedu, Ove wa shita eulu nedu. 17 Akutu Omwene, ameka okutwi kwoye, Ove u ude ko; pashula omesho oye, Omwene, Ove u tale. Pwilikina eendjovo daSanheerib adishe e di tumina okusheka Kalunga omunamwenyo. 18 Heeno, oshili, Omwene, eehamba daAsiria oda hanauna po oilongo aishe de i ninga omaputu, 19 ndele va ekela oikalunga yayo momundilo, osheshi ova li vehe fi oikalunga, ndelenee ova hongwa nomake ovanhu, ovo oiti nomamanya, onghee va dula oku va hanauna po. 20 Hano paife, Omwene Kalunga ketu, tu xupifa momake aye, oilongo aishe yedu i ka shiive, Oove auke Omwene Kalunga.”

21 Opo nee Jesaja yaAmos okwa tuma kuHiskia, ndele ta ti: “Omwene Kalunga kaIsrael ota ti: Eshi ove wa ilikana kwaame molwaSanheerib, ohamba yaAsiria, onda uda ko. 22 Ondjovo Omwene e i popya oyo ei:

‘Okakadona, omona waSion te ku dini, te ku sheke,

omona okakadona kaJerusalem

ote ku lipukaapukile komutwe.

23 Olyelye ou ove we mu dina nowe mu tuka,

nondaka yoye owe i yelulila lyelye?

Omesho oye owe a dakamena melituleko kOmuyapuki waIsrael.

24 Ove owa tukifa Omwene kovapiya voye,

ndele wa tya: Kouhapu womatemba oita ange

onda londa keexulo deemhunda,

kominghulo daLibanon;

ndele ame nda hala okuka po omisederi dayo dile,

nomisipresi dayo da hoololwa,

nonda pita, nda ya fiyo okouxulonyonyo wayo,

nomuulu wayo wa wapalelela unene;

25 ame onda xupa mo nonda nwa mo omeva,

neemhadi dange onda pwiininifa omilonga daEgipiti.

26 “ ‘Ino shi uda:

Ame onde shi lilongekidila nale

nonde shi litokolela momafiku onale?

Paife onde shi wanifa,

nokutya oilando yoye yeehote

otai ningi omaputu ongaho,

27 ndele oonakukalamo ova ngonapala,

va haluka vo va fya ohoni;

va ninga ngaashi oimeno italala yomoixwa,

nongaashi omwiidi mutalala,

ngaashi omwiidi u li kombada yeenduda

noilya ya fya omutenya fimbo inai kula.

28 Ndelenee okukala omutumba kwoye,

nokudja po kwoye nokuuyamo kwoye ondi ku shii

nongaashi okutukulukila nge kwoye.

29 Osheshi ove wa tukulukila nge,

nokuhola ounhwa kwoye okwa fika momatwi ange,

hano onda hala ndi xwekele ondjolo meyulu loye,

noshitomo mokanya koye

nohandi ku shunifile nondjila ei we uyile nayo.’

30 “Ndele oshinima eshi tashi kala edidiliko kwoove, nokutya: neudo eli, lyeni, eshi tashi mene shoovene, nomomudo omutivali eshi tashi uya natango, ndelenee momudo omutitatu kuneni, nye mu teye, twikeni oikokola yomiviinyu, nye mu lye eeviinyu dado. 31 Ndele ovaxupifwa vomeumbo laJuda, ava va xupa po, otava ka twamifa omidi davo medu, ndele tava imine pombada. 32 Osheshi muJerusalem otamu ka dja oshixupe novaxupifwa vokomhunda yaSion. Ouladi wOmwene Kalunga komatanga ovakwaita otau shi ningi. 33 Opo nee Omwene ta popi ohamba yaAsiria ta ti: ‘Ite uya mo moshilando eshi ongaashi ita umbile mo oshikuti, ye ite shi totele nande noshikelelifo, nosho ita fe omikangha domalwilo. 34 Nondjila ei e uya nayo, oyo ta shuna nayo, ndelenee moshilando eshi ye ite uya mo. Omwene osho ta ti. 35 Ndele onda hala ndi amene oshilando eshi nondi shi xupife, ndi shi xupife molwange mwene nomolwomupiya wange David.’ ”

36 Opo nee omweengeli wOmwene okwa ya ko ndele ta dipaele meenhanda daAsiria ovalumenhu omayovi efele nomafele omilongo hetatu naatano. Nongula eshi kwa sha, aveshe ova li oimhu ihe na omwenyo. 37 Ndele Sanheerib, ohamba yaAsiria, okwa fikama, ndele ta i, ta shuna, ndele a kala muNinive. 38 Ndele mefiku limwe, eshi ye a li motembeli yakalunga kaye Nisrok, ndele te linyongamene, ovana vaye ovamati Adrammelek naShareser, ove mu twa neongamukonda, ndele vo ova faduka po, va ya koshilongo shaArarat. Nomona waye Esar-Haddon okwa ninga ohamba ponhele yaye.