JESAJA 22 - Oshikwanyama Bible (OKYB)

Oukukutu waJerusalem

1 Okuxunganekwa kwefilu lemoniko. Oshike ku kwete, eshi oonakukala mwoove aveshe ova londa keenduda, 2 oove oshilando shi yadi elinyengaanyengo, tashi kuyunguta, oove omukunda wehafotanho! Oonakudipawa voye inava fya keongamukonda noinava fila moita. 3 Ovapangeli voye aveshe va ya onhapo mumwe, va mangwa vehe nouta; oonakukala mwoove, keshe umwe ou a hangika mwoove, a kwatwa, naavo ve uya mo onhapo va dja kokulekule. 4 Opo nee ohandi ti: Taleni pamwe pe lili, hakwaame, opo ndi shiive okulila nokuli lilila; inamu uya okuhekeleka nge molwehanauno lomona okakadona koshiwana shange.

5 Osheshi eli olo efiku lepiyaano, lehanauno noledundakano mefilu lemoniko, la tokolwa kOmwene, Kalunga komatanga ovakwaita. Omakuma okwa kumunwa po, nonghuwo otai kuwaana keemhunda. 6 Ndele Elam okwa djala onywa ndele te uya nomatemba e yadi ovalumenhu, novalondi veenghambe, naKir osha kufa oshikelelifo.

7 Opo nee omafilu oye mawa a hoololwa oku yadi omatemba oita, novalondi veenghambe ve li mehonyeno va tala oshivelo. 8 Ndele ye ota kufa oshiuvikilifo shaJuda. Ndele mefiku tuu olo ove to tale oilwifo i li mOngulufuka. 9 Ndele tamu mono omifya domohote yoshilando shaDavid, da ninga dihapu, ndele tamu ongele omeva ometale loposhi. 10 Ndele tamu valula eengulu domuJerusalem ndele tamu ngumauna po eengulu dokutungifa ekumahote. 11 Ndele tamu xupu etale li li pokati komakumahote avali, mwe li xupila omeva metale likulu. Ndelenee nye itamu tale kwaau e shi ninga, itamu liamene ou a li e shi diladila nale. 12 Ndele mefiku tuu olo Omwene, Kalunga komatanga ovakwaita, ote va ifana kelilo nokeenghali nokekululo lomapalu nomitwe nokomundjalo weefya. 13 Ndelenee tala, omu na ehafo nenyakuko, omatomo eehove nomadipao eedi, okulya ombelela nokunwa omaviinyu, tava ti: “Tu lyeni, fye tu nweni, osheshi mongula ohatu fi.”

14 Ndelenee Omwene womatanga ovakwaita okwa hololela omatwi ange, ndele ta ti: “Oshili, etimba eli itali mu diminwa po nande fiyo efyo leni, Omwene Kalunga komatanga ovakwaita osho ta ti.”

Sebna ta xutulwa

15 Omwene Kalunga komatanga ovakwaita osho ta ti: “Fikama, inda u ka holoke kunamukeledi Sebna, elenga lomouhamba, u tye: 16 ‘Oto ningi shike apa, nolyelye u kwete apa, eshi to lihokele ombila apa, to lihokele ombila yoye pombada pokule, ndele to lihokele onhele yoye memanya? 17 Tala, Omwene ote ku kupula, ngaashi omulumenhu ta kupula sha, ndele te ku kwata noku ku kamena mumwe. 18 Ote ku dingile mumwe nokudiinina ngaashi omuti wongodi tau tangelwa, ndele te ku alangatifa ngaashi okatanga noku ku undulila moshilongo shinene sha mbwalangadja. Oko u na oku ka fila, ndele oko taku ka fyaala omatemba oye oupuna, oove ohoni yeumbo lomwene woye. 19 Ndele ame ohandi ke ku undula mo moulenga woye, ndele Kalunga ote ku kandula po ponhele yoye. 20 Ndele mefiku tuu olo ohandi ka ifana omupiya wange Eliakim, omona waHilkia: 21 nohandi ke mu dika oshikutu shoye, nekwamo loye ohandi li dike moshiya shaye, neenghonopangelo doye ohandi ke di tula meke laye, a ninge xe yovanhu vomuJerusalem novomeumbo laJuda. 22 Ndele Ame handi ka tula oshapi yeumbo laDavid kepepe laye, opo, ngeenge ta yeulula, kape na ou ta idile po, nongeenge ta idile po, kape na ou ta yeulula. 23 Ndele Ame ohandi ke mu valela ponhele ya pama, ngaashi ondungu, ndele ye ota ningi olukalwa lefimano lomeumbo laxe. 24 Ndele tapa tulikwa kuye ouhapu aushe weumbo laxe, ovatekulu novatekulululwa, okayaxa keshe kanini, okudja komakopi fiyo okoitoo aishe. 25 Omwene womatanga ovakwaita ota ti: Mefiku tuu olo ondungu ei ya valelwa ponhele ya pama otai ka nyengana ndele tai teka, ndele tai u ko nonduba ya endjelela ko kuyo, otai xulu po, osheshi Omwene okwe shi tya.’ ”