Eliteeko laIsrael nehandu laKalunga
1 Israel, ino hafa nokunyakukwa, ngaashi oiwana imwe, osheshi moluhaelo loye wa efa Kalunga koye. Ove wa kala u hole ondjabi yoluhaelo moipale aishe yoilya. 2 Oshipale noshikolelo itashi va kutifa, nomaviinyu tae va bebelekele. 3 Itava ka kala vali medu lOmwene, ndelenee Efraim e nokushuna kuEgipiti, nomuAsiria ve nokulya ei yoshidila. 4 Itava ka yambela Omwene omaviinyu oikunwayambo, nomatomenoyambo avo itae mu wapalele, a ninga kuvo omungome woluhodi. Aveshe ava tave u li, otava kwata oshidila, osheshi omungome wavo tau kutifa ondjala yavo, ndele itau uya motembeli yOmwene. 5 Otamu ka ninga shike mefimbo loshivilo nomefiku loshivilo shOmwene? 6 Osheshi tala, ove nokuya onhapo ehanauno: Egipiti tashi va ongele, Memfis otashi va pake. Eeshosholo otadi ka kala odo emona lavo loshisiliveli, omano otaa ka mena momatwali avo. 7 Omafiku etalelepo a fika, omafiku ehandukilo e uya. Israel ote ke shi shiiva! Omuxunganeki ta ka ninga elai. Omunhu wopamhepo ta i eenghwengu omolwounene woulunde woye nomolwounene wehandu.
8 Efraim ta holamene omuxunganeki, meendjila daye adishe omu nomwiyo noutondwe motembeli yaKalunga kaye. 9 Ova duka mokunyona ngaashi pomafiku aGibea. Oye ta ka dimbulukwa oulunde wavo, ta ka handukila omatimba avo.
10 “Onda hanga Israel ngaashi eeviinyu mofuka, nonda hanga ooxekulu yavo ngaashi eedive domukwiyu pehovelo lao. Ndelenee ove uya kuBaal-Peor, ndele ve liyapulila kalunga kohoni, ndele va ninga oitondifa ngaashi omuholike oo wavo. 11 Efraim, oshinge shaye otashi tuka po ngaashi odila. Kape na vali okudala noufimba nokupewa oufimba. 12 Heeno, nande nava kulife ovana vavo, ohandi ke ve va kufa po, paha kale nande ovanhu. Heeno, woo voovene, ngeenge handi va efa.”
13 Efraim, ngeenge handi shi tale lwokuTirus, osha twikwa moulifilo muwa. Ndelenee Efraim e nokutwala ovana vaye komudipai. 14 Va pa, Omwene! U va pe shike hano? Va pa oshidalelo shongadji nomavele a fipatela.
15 Owii wavo aushe u li muGilgal, osheshi oko tuu oko nda hovela oku va tonda: “Omolwoilonga yavo ii handi ke va taataa mongulu yange, kandi va hole vali, ovanenenhu vavo aveshe ovalundakani. 16 Efraim a kewa, nomidi daye da kukuta; itadi ima vali. Ndele ngeenge tava dala, ohandi ka dipaa po ovaholike vavo, ve va dala.”
17 Kalunga kange ote ke va ekelashi, osheshi inave mu uda. Otava ka ninga ovaendaendi mokati koiwana.
© Oshikwanyama Bible Revised © Bible Society of Namibia, 2008, 2012.
