Ohole yOmwene
1 Israel fimbo a li omunyasha, onda li ndi mu hole, nomona wange omumati nde mu ifana mo muEgipiti. 2 Alushe eshi va ifanwa, ova pilamena ko. Ova yambela ooBaal nova twimina oihongwafano. 3 Ndele Ame mwene nda longa Efraim okweenda. Ye okwe va papata momaoko aye. Ndelenee vo inava shiiva nge, nokutya Ame onde va velula. 4 Onde va shila momapando ovanhu nomiya dohole. Onda fa nda yululula ondjoko yomofingo yavo, ndele nda petama kuvo noku va palula. 5 Itava ka shuna mbela koshilongo shaEgipiti, naAsiria ita ka ninga mbela ohamba yavo, osheshi ova anya okulidilulula? 6 Ndele eongamukonda tali ke uya moilando yaye, ndele tali ka hanauna po oiidilifo yaye, ndele tali li omolweemhangela davo. 7 Osheshi oshiwana shange osha loloka okwaalukila kwaame nonge tashi ifanwa shi tale pombada, kaku na ou ta fikama. 8 Ondi ku efe ngahelipi, Efraim, nondi ku ekeleshi ngahelipi, Israel? Ondi ku efe ngahelipi ngaashi Adma, nondi ku ninge ngahelipi ngaashi Seboim? Omutima wange we lidilulula nolukeno lange lwa penduka. 9 Ame itandi ka wanifa oupyuhandu wange. Ame itandi ka nyona po vali Efraim, osheshi Aame Kalunga, hamunhu, Aame omuyapuki mokati keni. Ndele Ame itandi ke uya ndi noupyuhandu. 10 Ndele otava shikula Omwene. Ye ota ka kumba ngaashi onghoshi, heeno, Ye ota ka kumba nounona otave uya nokukakama tava di kouninginino. 11 Otave uya nokukakama tava di muEgipiti ngaashi eedila, moshilongo shaAsiria ngaashi eenghuti. Ndele ohandi va alulile momaumbo avo, Omwene osho ta ti.
© Oshikwanyama Bible Revised © Bible Society of Namibia, 2008, 2012.
