Molwomitima davo mbali
1 Israel okwa li omuviinyu muwa, ou tau ima. Okwa tunga omayambelo mahapu pauhapu woiimati yaye, ndele a wapeka eengudimanya daye pauwa medu laye. 2 Ova li ve nomitima di noihelele. Paife otave ke shi hepekelwa. Ye ota ka ngumauna po eealtari davo, nokuhanauna po eengudimanya davo. 3 Heeno, paife onava tye: “Katu na vali ohamba, osheshi inatu tila Omwene, nohamba otai tu kwafa shike?” 4 Ndele tava popi eendjovo dinene, ndele tava ane oipupulu, ndele tava ningi omahangano. Ndele etokolo tali mene ngaashi oshimeno shoudiyo mepya. 5 Oonakukalamo muSamaria tava ka tila molwonhana yomuBet-Aven. Osheshi omolwonhana ovanhu vasho tava ka nyika oufiye, novapristeli vasho tava ka kakama omolwefimano lasho eli tali kufwa po. 6 Nayo vene yo otai ka twalwa kuAsiria oshali kohamba Jareb. Efraim ta kwatwa kohoni naIsrael ota ka kala a fifwa ohoni molweemhangela daye. 7 Samaria nohamba yasho tashi hanaunwa po. Ohamba yasho oi li ngaashi onhutu kombada yomeva. 8 Noikulunduyambelo yaAven, oulunde waIsrael, tai ka ngumaunwa po. Omano neeshosholo tadi ka mena keealtari davo. Ndele otava ka lombwela eemhunda: “Tu tuvikileni!” Noikulundu: “Mu tu wile!”
9 Woo oove Israel! Okudja kefiku laGibea ove wa kala nokunyona. Oko ve li ko. Oita itai ke va hanga mbela muGibea, oita yokulwifa ovalongi vowii. 10 Ohandi ke va handukila pahalo lange. Noiwana tai ke va hangakena, nge handi va handukile omolwomatimba avo avali. 11 Ndelenee Efraim oye ongobe odidi ya deuka okuxwa oshipale. Ndele Ame ohandi ka kwata ofingo yaye iwa. Ohandi mange Efraim, Juda ota limi, naJakob ta yelakanifa. 12 Likunineni ekuno louyuki, opo mu teye eteyo lefilonghenda. Likokoleleni oshikokola, osheshi efimbo la fika okukonga Omwene, fiyo Ye ote uya ndele te mu lokifile odula youyuki.
13 Onye mwa kuna okudinakalunga, nye mwa teya owii, ndele mwa lya oiimati yoipupulu, osheshi ove wa kala nokulineekela ondjila yoye mwene nouhapu wovaladi voye. 14 Embuyaano loita otali ka penduka movanhu voye. Neehotengulu doye adishe tadi ka hanaunwa po, ngaashi Salmon a hanauna po Bet-Arbel pomafiku oita: Ovadalakadi novana vavo otava ka nyanyaulilwa mumwe. 15 Eshi tashi mu ningilwa kuBetel omolwoulunde weni muhapu. Pokutenda kweluwa ohamba yaIsrael tai nyonwa po.
© Oshikwanyama Bible Revised © Bible Society of Namibia, 2008, 2012.
