Omayambo omehangano likulu oihetekela yongaho
1 Heeno, nehangano linya lotete ola li li neemhango delongelokalunga nouyapukingulu walo woukwambada yedu, 2 osheshi etwali ola dikwa ngaha: tete omwa li mu nolupale lotete, omo mwa kala oshikwatelwalamba noshitaafula nomingome detaliko, onhele ei oya ifanwa “ouyapuki,”Etwali ola dikwa ngaha: tete omwa li mu nolupale lotete…onhele ei oya ifanwa ‘ouyapuki’. 3 ndele konima yetukulifo etivali okwa li ku na olupale la lukwa “ouyapukielela,” 4 omo mwa li mu noaltari yoshingoldo yokutwimina, noshikefa shehangano sha vaekwa noshingoldo keembinga adishe, musho omwa li oshimbudju shoshingoldo omo mwa kala omanna, onhaili yaAron ya tutuma omafo noipelendemanya yehangano, 5 nokombada yasho okwa fanekelwa ovakerubi voshinge va tuvika oshituviko shekwatakanifo, oinima ei kai nomhito yokupopiwa paife shimwe nashimwe.
6 Ndele oinima ei aishe eshi ya li ya longwa ngaha, ovapristeli ohava i mo efimbo keshe molupale lotete letwali okuwanifa oilongayakulo, 7 ndelenee mushinya oshitivali, omupristeli omukulunhu oye aeke ha i mo lumwe aluke omudo keshe, ita i mo ehe nohonde, te i yambele omolwaye mwene nomolwomatimba oshiwana, aa inaa ningwa owina. 8 Osho ngaha Omhepo Iyapuki ta holola ondjila yokuya mouyapukielela inai yeululwa, olupale lotete letwali fimbo li li po. 9 Eshi osho efaneko tali faneke efimbo lopaife, panghedi yasho tapa yandjwa eeshali nomayambo oo itaa dulu okuninga omuyakuli womelongelokalunga a kale a wana a pwa meliudo laye, 10 ndelenee ngaashi oinakuliwa noikwakunuwa, nomalikoshelo e lili no ku lili, oyo omhango yopambelela, ya tulwa po i kale fiyo efimbo lomhango ipe le uya.
Oupristeli waKristus nhumbi wa wana po
11 Ndelenee Kristus eshi a ninga omupristeli omukulunhu wouwa wokomesho, okwa tokola metwali linene nola wanenena li dule linya, noinali tungwa nomake, nokutya olo kali fi lomeshito eli, 12 nokwa ya mo mouyapukielela hanohonde yoikombo noyeenhana, ndelenee onohonde yaye mwene lumwe aluke, nokwa wanifa ekulilo laalushe. 13 Osheshi ohonde yeemhedi noyoikombo ya shaminwa nomute wondema yondjelipa wa undwa kwaava va nyata, ngeenge tau va yapula, otava koshoka pambelela, 14 unene hano ohonde yaKristus, ou a li ehe na nande oshipo, e liyandja Ye mwene eyambo kuKalunga okOmhepo yaalushe, oyo tai ka kosha omaliudo etu okoilonga ei ya fya okulongela Kalunga omunamwenyo.
Kristus Oye Omupokati wehangano lipe
15 Onghee hano Oye a ninga Omupokati wehangano lipe, osheshi efyo laye ola ninga ekulilo lomanyono efimbo lehangano lotete, ovaifanwa opo va mone efyuululo laalushe la udanekwa. 16 Osheshi apa pe na eudaneko lefyuululo, efyo lomufyuululifi li nokushiivika shili, 17 osheshi eudaneko lefyuululo otali pamekwa kokufya, lo kali neenghono omufyuululifi fimbo e nomwenyo. 18 Onghee hano nehangano linya lotete yo inali yapulwa pehe nohonde, 19 osheshi Moses eshi kwa li a mana okuleshela oshiwana ashishe oipango aishe pamhango, okwa kufa ohonde yeenhana noyoikombo pamwe nomeva nolududi litilyana, naisopi nokwa shamina omushangwa woovene noshiwana ashishe, 20 nokwa tya: “Ohonde ei oyo yehangano olo Kalunga e li mu dikila.” 21 Ndele osho tuu etwali noikwatelwa aishe yomelongelokalunga okwe i shamina nohonde. 22 Ndele hanga aishe tai yapulwa nohonde pamhango, nokape nekufilepo lomatimba pehe netiko lohonde.
23 Hano omafano aainya yomeulu e nokuyapulwa nomayambo e li ngaha, ndelenee oikwameulu yoovene i nokuyapulwa nomayambo mawa e dule aa. 24 Osheshi Kristus ina ya mouyapuki wa tungwa nomake, oo efano longaho laawinya washili, ndelenee okwa ya meulu loovene, opo a ka holoke koshipala shaKalunga paife molwetu, 25 hakutya, e liyandje eyambo luhapu, ngaashi omupristeli omukulunhu ha i mo keshe omudo mouyapukielela e nohonde ihe fi yaye mwene, 26 osheshi ngeno kasha li ngaha, ngeno okwa li a wana okuhepekwa luhapu nghee tuu ounyuni wa shitwa. Ndelenee paife Oye a holoka lumwe aluke opexulilo lomafimbo ounyuni, a kufe po omatimba okeliyandjo laye mwene ngeyambo. 27 Nongaashi ovanhu va ufilwa ve nokufya lumwe aluke nokomesho etokolo, 28 osho tuu naKristus yo, eshi a yandjelwe lumwe aluke eyambo a kufe po omatimba avahapu, ta ka holoka olutivali ehe netimba kwaava have mu teelele, va mone exupifo.
© Oshikwanyama Bible Revised © Bible Society of Namibia, 2008, 2012.
