Okunyengwa kweyambomhango
1 Osheshi omhango, shaashi oyo omudidimbe wongaho wouwa wokomesho, halupe loinima yoovene, itai dulu okuninga ava tava eta omayambo keshe omudo va kale va wana va pwa. 2 Ngeno osho, ngeno va mana okuyamba, osheshi ava tava longele ngaha Kalunga, shaashi va yapulwa nokuli palumwe vehe nomaliudo tae va pe eembedi molwomatimba avo. 3 Ndelenee momayambo omu na omadimbulukifo omatimba omudo keshe. 4 Osheshi ohonde yeemhedi noyoikombo itai dulu nande okukufa po omatimba.
Kristus okwa wanifa ehalo laKalunga
5 Onghee hano Kristus mokuuya mounyuni ota ti:
“Omatomenoyambo neendjayambo ino a hala,
ndelenee wa longela nge olutu,
6 omaxwikiloyambo netimbayambo ino a hokwa,
7 opo Ame nda tonga: ‘Tala, ohandi uya,
momishangwa onda shangwa mo, okulonga ehalo loye, Kalunga.’ ”
8 Eshi a tya tete: “Omatomenoyambo neendjayambo nomaxwikiloyambo ino a hala noino a hokwa,” nande haa yambwa pamhango, 9 opo tuu ota ti vali: “Tala, ohandi uya okuwanifa ehalo loye, Kalunga.” Oye ota kufa po eshi shotete, a tule po oshitivali. 10 Mehalo tuu eli fye twa yapulwa okeyambo lolutu laJesus Kristus lumwe aluke nosha wana.
Kristus okwa kufa po omatimba nokwa dika ehangano lipe
11 Nomupristeli keshe oha kala ofika efiku nefiku mokuwanifa oshilongayakulo shaye noha yambe luhapu omayambo oo tuu oo amwe, ehe na opo taa dulu okukufa po omatimba; 12 ndelenee Kristus, eshi a yandja eyambo limwe alike ofiyo alushe molwomatimba, okwa kala omutumba kolulyo laKalunga, 13 nota teelele ashike ovatondadi vaye va ningwe oshilyato sheemhadi daye. 14 Osheshi neyambo limwe alike okwa wanifila alushe fiyo alushe ava tava ka yapulwa. 15 NOmhepo Iyapuki otai tu hepaululile eshi, 16 eshi ya tile:
“Ehangano olo handi ke li ninga ofye navo,
omafiku oo ngeenge a pita po, oleli,
Omwene osho ta ti:
Omhango yange ohandi ke i tula momitima davo
nohandi ke i shangela momadiladilo avo.”
17 Ndele ya tile vali:
“Omatimba avo nomatauluko avo itandi ke a dimbulukwa vali.”
18 Apa a dimwa po, itapa pumbwa vali eyambo molwomatimba.
Ondjila i nomwenyo
19 Hano ovamwatate, eshi tu li po tu neyombamo la pama okuya mouyapukielela omolwohonde yaJesus, 20 ondjila ipe i nomwenyo e i tu yapulila, tai pitile moshitukulifo nokutya, mombelela yaye, 21 notu nomupristeli munene nomuleli weumbo laKalunga, 22 tu eheneni hano tu nomutima wa yuka notu neitavelo la pama, twa shaminwa momitima da kufwa omaliudo mai, nokolutu twa koshwa nomeva mayela. 23 Tu diinineni ehepaululo leteelelo letu tuhe nomatengauko, osheshi omuudaneki Oye omudiinini, 24 ndele tu filafaneni oshisho fye tu twaafane omukumo mohole nomoilonga iwa. 25 Tuha efe eongalo letu vene, ngaashi vamwe ve li po hava ningi, ndelenee tu kumaidafaneni, unene eshi tamu mono efiku olo tali ehene popepi.
Oshiponga shokudina efilonghenda
26 Osheshi ngeenge hatu nyono owina nande twa shiiva oshili, itapa kala vali eyambo molwomatimba, 27 ndelenee eteelelo letokolo alike la tilifa, nehandu lomundilo wokulungwinifa ovanandubo. 28 Ou ta ekeleshi omhango yaMoses oye e nokufya pehe nonghenda nande, ngeenge ope na eendobwedi mbali ile nhatu; 29 hano otamu ti ngahelipi ehandu olo tali kala li fike peni kwaau ta lyata nomhadi Omona waKalunga nota dini ohonde yehangano, omo a yapulilwa mo ndele ta sheke Omhepo yefilonghenda? 30 Osheshi otu mu shii ou a tonga: “Ehandu olange, Aame handi futu,” Omwene osho ta ti; navali: “Omwene ota ka tokola oshiwana shaye.” 31 Oixuna yongaho okuwila momake aKalunga omunamwenyo.
Inamu ekelashi elineekelo
32 Ndelenee dimbulukweni omafiku enya onale, eshi mwa li mwa minikilwa, omwe lididimikila momahepeko madjuu, 33 kombinga imwe eshi mwa li mwa shekwa nomwa hepekwa moipafi yovanhu, nokombinga ikwao mwa ninga ovakwao vaavenya va kala momayehameko ngaashi nye. 34 Osheshi omwa li mwa yehamekwa pamwe neenghwate, nokunyekwa kwoinima yeni mwe ku humbata nehafo nokushiiva nokutya, onye omu na emona liwa meulu li dule eli. 35 Hano elineekelo leni inamu li ekelashi, osheshi olo li nondjabi inene. 36 Osheshi otamu pumbwa elididimiko, opo mu wanife ehalo laKalunga, nokupewa eshi mwe shi udanekelwa. 37 “Osheshi ope nokafimbo,
okafimbo kaxupi kongaho, ou e nokuuya ote uya nee, ye ita kala ko,
38 ndele omuyuki wange ota ka kala e nomwenyo okeitavelo,
ndele ngeenge ta shuna monima,
omwenyo wange itau mu hokwa.”
39 Ndelenee fye katu shi ovashunimonima voku ka kana, ndelenee ofye hatu itavele, eemwenyo detu di xupifwe.
© Oshikwanyama Bible Revised © Bible Society of Namibia, 2008, 2012.
