Oukolokoshi nowii woiwana
1 Exunganeko, omuxunganeki Habakuk e li mona.
2 Akutu Omwene, fiyo naini ame ndi nokwiingida ekwafo, ndelenee Ove ito udu ko? Handi ku ingidile: Oukolokoshi! Ndelenee Ove ito kwafa? 3 Oshike Ove ho talifa nge osho inashi yuka, ndele ndi nokutala eshunduko? Heeno, owii noukolokoshi u li koshipala shange. Ope nondubo neemhata.
4 Omhango osho tai kanifa eenghono dayo. Neyukifo ihali holoka nande vali. Osheshi omudinikalunga ota dingilile omuyuki, osho hano ouyuki tau endamekwa.
Oye ta xweenenwa nokudengwa kOvakaldea
5 Taleni, mu tale, oiwana nye mu didilike ndele kaleni mwa mwena. Osheshi pomafiku eni ohandi ka longa oshilonga, eshi nye itamu ke shi itavela nande mu shi lombwelwe. 6 Osheshi tala, ohandi ka pendula Ovakaldea, oshiwana osho shidjuu shihe nolukeno, tashi taulula oumbwalangadja wedu, ndele tashi nyeka eenhele deenghalelo dihe fi dasho. 7 Osho oshitilifi tashi tumhaukifa omaxwilili, musho vene tamu va dile eyukifo noukulunhu. 8 Eenghambe dasho ohadi tondoka di dule eengwe, nodi nonhapo i dule yomambungu onguloshi. Novalondi veenghambe vasho tave di lotokifa neenghono ndee hava di kokule ndele hava tuka ngaashi onhwa tai foonyokele koshihakanwa shayo. 9 Ovo aveshe tave uya okutinha. Oipala yavo ya yukilila komesho. Tava ongele eenghwate ngaashi eheke. 10 Otava sheke yo eehamba, nomalenga otave a ningi oiyolifa kuvo. Otava yolo ohotekuma keshe. Otava ongele eheke ndele tave i teya. 11 Opo tava endelele ngaashi okafudaela nokweehena komesho, ndelenee tava pewa etimba, vo, eenghono davo da ninga oshikalunga shavo.
Eilikano nekemo lomuxunganeki
12 Hamba haave Omwene, Kalunga kange omuyapuki okudja omafimbo onalenale? Fye itatu ka fya. Omwene, owe va ninga etokolo. Oove emanya, we va ninga oshihanyenifo. 13 Omesho oye okuyela, itaa shiiva okutala owii, ndele ito shiiva okutala oulunde. Oshike hano ho tale ovaliteeki, Ove ho mwena, ngeenge omudinikalunga ta pona po omuyuki? 14 Osho ngaha to faafanifa ovanhu neeshi domefuta noilipwedi ei ihe nomwene. 15 Ye ote i shili mo nongona, te i yulu mo noiyulifo yaye, ndee te i ongele meendjadja daye. Onghee ye ota hafe nokukuwilila. 16 Onghee hano ye ota yambele ondjadja yaye, ndele ta twiminine oikwatifo yaye, osheshi molwayo oshipewa shaye oshinene neendja daye da ondoka. 17 Ota itavelwa tuu molwayo okupimha oshiyulifo shaye naalushe okudipaa oiwana ehe nonghenda?
© Oshikwanyama Bible Revised © Bible Society of Namibia, 2008, 2012.
