Jakob ta nangeke noupuna ovana vaye
1 Opo nee Jakob okwa ifana ovana vaye ovamati ndele ta ti: “Ileni, liongeleni, opo ndi shiive oku mu shiivifila eshi tashi mu hange pexulilo lomafiku:
2 “Liongeleni mu ude, nye ovana ovamati vaJakob;
pwilikineni Israel, xo yeni.
3 “Ruben, oove shiveli shange neenghono dange,
Oove wotete weenghono dange,
omukulunhu metumbalo, nomukulunhu mepangelo!
4 Wa fuluka ngaashi omeva; ndelenee ove ito ka kala omukulunhu,
osheshi owa londa kombete yaxo;
osho we i nyateka—ove wa londa kombete yange.
5 “Simeon naLevi, vo ovamwainafana.
Oiti yavo oilongifo youkolokoshi.
6 Omwenyo wange itau pande eenghundafana davo,
omutima wange itau kala neemhangela davo,
osheshi mehandu lavo va dipaa ovalumenhu,
nomoupwidi wavo va ngudupaleka eemhedi.
7 Ehandu lavo nali fingwe, osheshi lo ohali xwama diva,
Noupyuhandu wavo, osheshi oo udjuu.
Ame ohandi ke va tukula muJakob
noku va halakanifa muIsrael.
8 “Juda, oove tuu! Ove oto ka hambelelwa kovamwaxo.
Eke loye otali ka kala kofingo yovatondadi voye.
Koshipala shoye ovana vaxo otave ke linyongamena.
9 Juda onghoshi onyasha;
moihakanwa wa dja, omumwange.
Ye ote likoko, ndee ta nangala ngonghoshi,
ngaashi onghoshi onghadi. Olyelye ta dulu oku mu taataa?
10 Epangelodibo itali ka kufwa kuJuda
nodibo youhamba itai di po peemhadi daye.
Fiyo ou e na okuuya te uya,
noiwana tai ka dulika kuye.
11 Ye ota pandeke ondongi onyasha yaye komuviinyu,
nondongwena yondongi yonghadi yaye okeshila lomuviinyu.
Ye ota kosho oikutu yaye momaviinyu
nelwakani laye mohonde yeeviinyu.
12 Omesho aye a tilyana komaviinyu,
nomayoo a toka komashini.
13 “Sebulon ota ka kala pomunghulo wefuta,
ndee ta ka kala popepi neeskepa,
kombinga yokuSidon.
14 “Isaskar ondongi yomakipa a pama,
tai nangala pokati koyuunda.
15 Ye eshi a mona etulumuko oliwa
nedu la wapala,
ye okwa endameka epepe laye lokuhumbata omutengi,
ndele okwe liyandja a ninge omupika.
16 “Dan ota ka yukifila ovana vaye
ngaashi limwe lomomapata aIsrael.
17 Dan ota ka kala eyoka mondjila,
efu melila,
olo tali lumata pomhando yonghambe,
opo omulondi ta u ko ongali.
18 “Omwene, ohandi teelele exupifo loye!
19 “Gad, ovakwaita tave mu totele,
ndelenee ye ote va kwata koshififinwa.
20 “Asser, eendja daye di na omaadi,
ndele ta kongele eehamba oiliwa inyenye.
21 “Naftali ongaashi oholongo i na onhapo;
muye otamu di oludalo liwa.
22 Josef omuti mupe tau imi,
omuti mupe pofifiya.
Oitai yao tai tandavele kombada yekuma.
23 Ovaumbi vomauta tave mu nangele,
ndele tave mu umbu, ndele tave mu lwifa,
24 ndelenee outa waye wa pama
nomaoko nomake aye e na eenghono
molwomake Omunamapangelo womuJakob,
Omufita nemanya laIsrael,
25 Kalunga kaxo, ekwafo loye, nekwafo laKalunga Omunaenghono adishe,
ou te ku nangeke noupuna nomanangeko okeulu pombada,
nomanangeko nomakungulukilo omeva oposhi,
nomanangeko omavele nomomadimo.
26 Omanangeko noupuna aa xo a pewa,
e dule omanangeko noupuna eemhunda daalushe,
eeshali doupuna dokoikulundudu yaalushe.
Omanangeko noupuna aa naa kale kombada yomutwe waJosef
nokombada pokati komutwe womuhoololwa mokati kovamwaxe.
27 “Benjamin oye embungu tali nyanyaula.
Ongula tali li oshihakanwa shalo
nonguloshi tali tukula eshi la kwata.”
28 Aa omapata aeshe omulongo naavali omuIsrael. Ndele odo xe e va lombwela, ndele ye e va nangeka noupuna. Ye okwe va nangeka noupuna, keshe umwe enangeko noupuna laye li lili.
Efyo laJakob
29 Opo nee ye e va lombwela ndele ta ti kuvo: “Ame ohandi ka ongelwa kovakwapata vange. Pakei nge pootate mekololo li li monhele yedu laEfron Omuheti, 30 mekololo li li monhele yedu laMakpela, koushilo waMamre, medu laKaanan, onhele yedu Abraham e i landa kuEfron, Omuheti ngaashi ombila yefyuululo. 31 Oko va paka Abraham naSara, omwalikadi waye. Oko va paka Isak naRebeka omwalikadi waye. Oko nda paka yo Lea, 32 onhele yedu nekololo li li mo, ei ya landwa kovana vaHet.” 33 Jakob eshi a mana okulombwela ovana vaye ovamati, okwa yelulila eemhadi daye kombete, ndele ta fuda mo omhepo. Ndele okwa ongelwa kovakwanepata laye.
© Oshikwanyama Bible Revised © Bible Society of Namibia, 2008, 2012.
