Eendjodi daFarao
1 Omido mbali eshi da pita po, Farao okwa twa ondjodi, a kala ofika pomunghulo waNil. 2 Ndele tala, muNil mwa djuuka eengobe heyali eedidi da wapala okutalwa noda ondoka, ndele do oda lya momanenge. 3 Ndele tala, do oda shikulwa keengobe dimwe heyali eedidi da dja muNil, eengobe dii okutalwa, nomalutu a utama ndele do oda ya ndele tadi kala ofika peengobe dinya pomunghulo waNil. 4 Neengobe eedidi odo da li dii okutalwa nomalutu a utama, oda lya po eengobe dinya heyali diwa okutalwa noda ondoka. Opo nee Farao okwa papuduka. 5 Ndele ye okwa kofulula vali nokwa twa vali ondjodi. Ndele tala, omitwe heyali doilya di li koshihati shimwe, da pya nawa, diwa unene. 6 Ndele do oda shikulwa komitwe dimwe heyali doilya da twiyuka mo da feta da kukutikwa komhepo yokoushilo. 7 Ndele omitwe dinya doilya da feta oda pona po odo heyali da pya da paka. Opo Farao a pashuka, ndele tala, oyo ya li ondjodi! 8 Ongula omwenyo waye owa li uhe na ombili ndele okwa tuma ko nokwa ifana ovamonikokule aveshe novanongo vomishangwa, vaye aveshe vomuEgipiti. Ndele Farao okwe va hepaululila ondjodi yaye, ndele kapa li nande umwe a shiiva oku i fatululila Farao.
9 Opo nee omukulunhu wovapindi okwa popya naFarao ndele ta ti: “Onena eli ame ohandi dimbulukwa omanyono ange. 10 Farao okwa li a handukila unene ovapiya vaye ndele okwa yandja nge ndi idililwe meumbo lelenga letanga lovanangeli, ame pamwe nomukulunhu wovateleki vomingome. 11 Ndele fye naye otwa twa eendjodi oufiku tuu umwe. Fye otwa twa eendjodi, keshe umwe ondjodi i na eendunge di lili. 12 Ndele mo omwa li pufye omunyasha umwe Omuheberi, omupiya welenga letanga lovanangeli; kuye twa hepaulula eendjodi ndele ye okwe tu fatululila eendjodi detu. Keshe umwe a fatululilwa ondjodi yaye. 13 Nongaashi ye e di tu fatululila, osho sha ningwa. Ame nda shunwa moshilonga shange, ndelenee omukulunhu wovateleki vomingome okwa endjelelifwa momuti.”
Josef ta fatululile Farao eendjodi daye
14 Opo nee Farao okwa ifana mo Josef, ndele vo ove mu pitifa mo divadiva modolongo. Ndele ye okwe likululifa nokwa djala oikutu imwe. Ndele ye okwe uya koshipala shaFarao. 15 Opo nee Farao okwa tya kuJosef: “Ame onda twa ondjodi, ndele kape na ou a shiiva oku i fatulula, ndelenee onde ku uda nokutya, shamha tuu ove wa udu ondjodi oto shiiva oku i fatulula.” 16 Ndele Josef okwa nyamukula Farao ndele ta ti: “Haame; oKalunga ha yandje efatululo liwa kuFarao.” 17 Opo nee Farao ta ti kuJosef: “Tala, mondjodi yange nda kala ofika pomunghulo waNil, 18 neengobe heyali eedidi da dja muNil, da li da ondoka nodiwa okutalwa, oda li tadi li momanenge. 19 Ndele tala, do oda shikulwa natango keengobe heyali eedidi doingone dii okutalwa noda utama. Medu alishe laEgipiti inandi mona nande eengobe dii da fa odo. 20 Ndele eengobe eedidi odo da utama nodii, oda lya po eengobe heyali dinya dotete, 21 do ode di lya po, ndelenee omunhu ina shiiva okudimbulukwa nokutya, ode di pona, osheshi okutalwa kwado okwa li kwii, ngaashi tete. Opo nee onda papuduka. 22 Komesho ame onda mona mondjodi yange, ndele tala, omitwe heyali doilya da pya nodiwa oda twiyuka moshihati shimwe. 23 Ndele do oda shikulwa komitwe heyali doilya da twiyuka, do da li dikukutu, da feta noda fetekwa komhepo yokoushilo. 24 Ndele omitwe heyali doilya da feta oda pona po omitwe dinya heyali diwa. Ndele ame nda shiivifila ovamonikokule, ndele inapa monika nande umwe a shiiva okupa nge efatululo.”
25 Opo nee Josef okwa tya kuFarao: “Eendjodi daFarao ode lifa. Kalunga okwa shiivifila Farao, eshi Ye a hala okuninga. 26 Eengobe heyali eedidi diwa otadi didilike omido heyali. Nomitwe heyali doilya diwa otadi didilike omido heyali. Eendjodi ode lifa. 27 Neengobe heyali eedidi dii da utama odo da djuuka de di shikula, otadi didilike omido heyali. Nomitwe heyali doilya da feta noda kukutikwa komhepo yokoushilo otadi didilike omido heyali dondjala. 28 Onghee hano onda lombwela Farao nokutya, eshi Kalunga a hala oku shi ninga, Ye e shi talifa Farao. 29 Tala, otape uya omido heyali di na oshishipo moshilongo ashishe shaEgipiti. 30 Ndelenee komesho otaku ke uya omido heyali dondjala, noshishipo ashishe tashi ka dimbuwa moshilongo shaEgipiti, nondjala otai ka lya oshilongo. 31 Ndele oshishipo itashi ka shiivika vali moshilongo omolwondjala tai shikula ko, osheshi yo otai ka ninga idjuu unene. 32 Naashi Farao a tuulula ondjodi luvali, otashi ti: oshinima eshi osha pama sha pangelwa kuKalunga ndele Kalunga ote ke shi wanifa diva. 33 Farao na konge hano omulumenhu e na eendunge nomayele, ye na yandje Egipiti mepangelo laye. 34 Farao na lombwele, ovadiinini va nangekwe komikunda nomikunda nomomido odo heyali doshishipo nava ongele oshitukulwa oshititano shomoilya moshilongo shaEgipiti. 35 Ndele ve na okwoongela eendja adishe domido heyali diwa tadi uya, nopamhango yaFarao ove na okwoongela oilya ngaashi eendja moilando noku i tuvikila. 36 Osho ngaha hano eendja tadi ka ninga oituvikilwa yoshilongo komido heyali dondjala edi tadi ke uya medu laEgipiti, opo oshilongo shaEgipiti shiha teke po kondjala.”
Josef ta lengwa
37 Ndele eendjovo edi oda li diwa momatwi aFarao novapiya vaye aveshe. 38 Opo nee Farao okwa tya kovapiya vaye: “Ohatu ka mona tuu omunhu umwe ngaashi omulumenhu ou e na Omhepo yaKalunga?” 39 Ndele Farao okwa tya kuJosef: “Kalunga eshi e ku hololela ashishe eshi, ope na tuu nande umwe e na eendunge nomayele ngaashi ove. 40 Ove ou na okupangela eumbo lange, novanhu vange aveshe ove na okudulika komalombwelo oye. Ashike kombinga yolukalwapangelo ame ondi ku dule.” 41 Natango Farao okwa lombwela Josef ndele ta ti: “Tala, ame ohandi ku lenge kombada yedu alishe laEgipiti.” 42 Opo nee Farao okwa kufa oshihakolinga meke laye ndele te shi tula meke laJosef. Ndele ye okwe mu djaleka oikutu iwa yoliina nokwe mu dika elyenge loshingoldo mofingo yaye. 43 Ndele ye okwe mu endififa metemba etivali loulenga womatemba, la shikula eli laye mwene, nokwa tetekelwa kovakuwilili tava ti: “Tweni eengolo!” Osho ngaha okwe mu lenga omupangeli womuEgipiti alishe. 44 Ndele Farao okwa tya kuJosef: “Aame Farao, ndelenee nande umwe moshilongo ashishe shaEgipiti ita yelula eke laye ile omhadi yaye, ove ngeenge ino shi hala.” 45 Ndele Farao okwa luka Josef Safenat-Paneas, ndele okwe mu pa Asenat, omona okakadona kaPotifera, omupristeli womuOn, a ninge omwalikadi waye. Ndele Josef okwa dja po, ndele okwa endaenda noshilongo ashishe shaEgipiti. 46 Ndele omido daJosef oda li omilongo nhatu eshi a kala ofika koshipala shaFarao, ohamba yaEgipiti. Ndele Josef okwa dja po puFarao nokwa endaenda oshilongo ashishe shaEgipiti.
Eyukifo laJosef lokuxupifa oshilongo
47 Ndele momido odo heyali doshishipo oshilongo osha dala eendja dihapu unene. 48 Opo nee ye okwa ongela eendja adishe momido heyali fimbo Egipiti sha li shi na oshishipo, nokwe di tuvikilifa moilando. Moilando aishe okwa tuvikilifa mo eendja domomapya a li kominghulo popepi noilando. 49 Osho ngaha Josef okwa ongela oilya ihapu unene ngaashi eheke lopomunghulo wefuta, fiyo va efa okuvala, shaashi oya li ihapu unene.
50 Ndele Josef okwa dalelwa ovana ovamati vavali, fimbo omudo wondjala inau fika. Asenat, omona okakadona kaPotifera, omupristeli womuOn, okwe ve mu dalela. 51 Ndele Josef okwa luka oshiveli Manasse, osheshi ye okwa ti: “Kalunga okwa dimbwifa nge oluhepo lange alishe nosho yo eumbo alishe latate.” 52 Nondenge okwe i luka Efraim, osheshi ye okwa ti: “Kalunga okwa pa nge oludalo moshilongo shoudjuu wange.”
53 Opo nee omido heyali doshishipo oda pita po moshilongo shaEgipiti, 54 nomido heyali dondjala oda hovela, ngaashi Josef a tile. Ndele moilongo aishe omwa li ondjala, ndelenee moshilongo ashishe shaEgipiti omwa li eendja. 55 Ndele edu alishe laEgipiti eshi la hangika kondjala oshiwana ashishe osha ya kuFarao okupula eendja, Farao okwa lombwela Ovaegipiti aveshe ta ti: “Indeni kuJosef, ningeni ngaashi te mu lombwele.” 56 Ndele ongonga aishe yedu oya hangika kondjala, ndele Josef okwa matula oituvikilwa aishe ndele okwa landifa oilya kOvaegipiti. Nondjala oya li idjuu medu laEgipiti. 57 Nounyuni aushe owe uya kuJosef muEgipiti, u lande oilya, osheshi ondjala oya handuka mongonga aishe yedu.
© Oshikwanyama Bible Revised © Bible Society of Namibia, 2008, 2012.
