Jakob naEsau tava monafana
1 Ndele Jakob okwa yelula omesho ndele eshi a mona Esau te uya novalumenhu omafele ane pamwe naye, okwa tukulila Lea naRakel novapika vaye vavali ovana. 2 Ndele okwa pitifa komesho ovapika novana vavo, nova shikulwa kuLea novana vaye; naRakel okwe va shikula konima naJosef. 3 Ndelenee ye mwene okwe va tetekela nokwe linyongamena poshi luheyali kuye, fiyo ye e uya popepi a fika kumumwaina.
4 Opo nee Esau okwa endelela, ndele ta i kuye ndele te mu papatele nomaoko ndele te mu dingatele mofingo ndele te mu fipi komilungu. Vo ova lila. 5 Hano Esau eshi a yelula omesho aye ndele ta mono ovalikadi novana, okwa pula ta ti: “Ovo oolyelye ve li pamwe naave?” Ndele Jakob okwa nyamukula ta ti: “Ovo ovamwange, ava Kalunga konghenda yaye a pa omupiya woye.” 6 Novapika ovakainhu va ehena pamwe novana vavo ndele vo ve linyongamena poshi. 7 NaLea pamwe novana vaye va ehena ndee vo ve linyongamena poshi. Vo ova shikulwa kuJosef naRakel ndele vo ve linyongamena poshi. 8 Opo nee Esau ta ti: “Osheendo shinya sha shakeneka nge, oshashike nowa hala shike?” Ndele Jakob a nyamukula ta ti: “Ndi filwe onghenda momesho omwene wange.” 9 Ndelenee Esau okwa tya: “Ame onda wanifa eliko, mumwameme! Kala noinima yoye!” 10 Opo nee Jakob okwa nyamukula ta ti: “Ahowe tuu! Ngeenge onda mona onghenda momesho oye, tambula omilongelo edi meke lange. Ame onda mona oshipala shoye ngaashi omunhu ta mono oshipala shaKalunga, nowa fila nge onghenda. 11 Hano tambula omilongelo wa etelwa, osheshi Kalunga okwa punika nge, ame nda wana, nda wanenena pombada.” Ndele okwe mu fininika fiyo ye te di tambula.
12 Opo nee Esau okwa tya: “Tu fikameni tu eheneni komesho. Ame ohandi ku kwatele komesho.” 13 Ndelenee Jakob okwe mu nyamukula ta ti: “Omwene wange, owa shiiva nokutya ounona inava pama nondi na eedi neengobe tadi nyamifa. Omunhu ngeenge okwe di shingilile nande efiku limwe alike, oimuna aishe otai fi. 14 Omwene wange na tetekelele omupiya waye, naame ohandi ka enda nokushikula paenghono doimuna nopaenghono dounona, fiyo handi ke uya komwene wange muSeir.” 15 Opo nee Esau ta ti: “Itavele nge ndi ku fiile ovanhu vamwe.” Ndee ye okwa nyamukula: “Ovokulonga shike? Onda hala ashike ndi filwe onghenda momesho oye, omwene wange.” 16 Osho hano mefiku tuu olo Esau okwa shuna ko nokwa ya nondjila yaye kuSeir.
Jakob ta diki eumbo kuSekem
17 Ndele Jakob okwa ya kuSukkot. Ye okwe lidikila ko eumbo, noimuna okwe i dikila oyuunda. Onghee onhele oyo tai lukwa Sukkot.
18 Ndele Jakob okwa fika nawa koshilando shaSekem, moshilongo shaKaanan, eshi a dile muPaddan-Aram. Nokwa onga onhanda komesho yoshilando. 19 Onhele oyo muyo a onga onhanda, okwe i lilandela kovana vaHamor, xe yaSekem noimaliwa efele limwe. 20 Ndele oko a tungila oaltari nokwe shi luka: Kalunga kaIsrael, Oye Kalunga!
© Oshikwanyama Bible Revised © Bible Society of Namibia, 2008, 2012.
