Efyo laSara nokupakwa kwaye
1 Ndele omido daSara da li efele nomilongo mbali naheyali. Odo omido daSara odo. 2 Ndele Sara okwa fila muKiriat-Arba nokutya, Hebron, medu laKaanan. Ndele Abraham okwe uya keefya daSara noku mu lila. 3 Opo nee Abraham okwa fikama ndee okwa dja po pomufi, ndee okwa popya novana vaHet, ndele ta ti: 4 “Ame omunailongo nomweenda mokati keni. Pei nge onhele yeembila medu leni, opo ndi shiive okupaka mo omufi wange.” 5 Opo nee ovana vaHet va nyamukula Abraham ndele tava ti: 6 “Tu pwilikina, omwene wetu! Ove elenga laKalunga mokati ketu. Paka omufi woye monhele yeembila iwa i dule adishe edi tu kwete. Kape na ou mokati ketu te ku anyene onhele yeembila u pake mo omufi woye.” 7 Opo nee Abraham okwa kala ofika nokwe linyongamena moipafi yovanhu vomoshilongo, koshipala shovana vaHet, 8 ndele ye okwa popya navo ta ti: “Ngeenge tashi mu wapalele, ohandi tumbu mo omufi wange meumbo ndele handi mu pake. Hano pwilikineni nge nye mu popile nge koshipala shaEfron, omona waSohar, 9 a pe nge ekololo laMakpela, laye mwene noli li kexulilo loshitukulwa shonhele yaye. Ne li pe nge pakuyeleka ondado yalo, opo ndi kale ndi na onhele yeembila mokati keni.” 10 Ndele Efron okwa li omutumba pokati kovana vaHet. Opo nee Efron, Omuheti, okwa nyamukula Abraham momatwi ovana vaHet, aveshe ava va ya mo moshivelo shoshilando shaye: 11 “Ahowe, omwene wange, pwilikine nge. Oshitukulwa osho shedu ame ohandi shi ku pe, nosho yo ekololo li li musho ohandi li ku pe. Moipafi yovanhu vange ame ohandi shi ku pe. Paka omufi woye.” 12 Opo nee Abraham okwe linyongamena koshipala shovanhu voshilongo, 13 ndele okwa popya naEfron momatwi ovanhu vomoshilongo ndele ta ti: “Eewa, ndelenee pwilikine nge tuu! Oshitukulwa osho shedu ohandi shi yandjele oimaliwa, i tambula kwaame, opo ndi shiive okupaka mo omufi wange.” 14 Ndele Efron okwa nyamukula Abraham ndele ta ti: 15 “Omwene wange, pwilikine nge. Oshitukulwa shedu shi fike peesekeli doshisiliveli omafele ane, oshi na shike pokati ketweni naave? Paka mo omufi woye.” 16 Opo nee Abraham okwa pwilikina Efron, ndele Abraham okwa yelekifila Efron oimaliwa i fike pwaai ya tongwa kuye momatwi ovana vaHet, eesekeli doshisiliveli omafele ane panghedi yoipindi.
17 Osho hano ngaha oshitukulwa shedu laEfron osho shi li muMakpela, sha shaama naMamre, oshitukulwa shedu nekololo lomusho nomiti adishe di li moshitukulwa shedu monhele aishe nopominghulo dayo, 18 ashishe sha ninga shaAbraham moipafi yovana vaHet, moipafi yaaveshe ovo va ya mo moshivelo shoshilando shaye. 19 Opo nee Abraham okwa paka omwalikadi waye Sara mekololo lomoshitukulwa shedu laMakpela koushilo waMamre, nokutya, Hebron, medu laKaanan. 20 Osho hano ovana vaHet va yandja kuAbraham oshitukulwa shedu nekololo lomusho, opo shi ninge onhele yaye yeembila.
© Oshikwanyama Bible Revised © Bible Society of Namibia, 2008, 2012.
