Ovasamaria tava kelele etungululo lotembeli
1 Novatondadi vOvajuda novOvabenjamin eshi va uda nokutya, eenghwate tadi tungu otembeli yOmwene Kalunga kaIsrael, 2 ove uya kuSerubbabel nokovakulunhu ndele tava ti kuvo: “Natu tungeni pamwe, osheshi ngaashi nye osho nafye hatu kongo Kalunga keni, ndele hatu mu yambele okudja komafiku enya aEsar-Haddon, ohamba yaAsiria, oyo ye tu tuma oku.” 3 Ndelenee Serubbabel naJosua novakulunhu vamwe vomapata aIsrael ve va nyamukula: “Ahowe, itashi dulika mu tungile Kalunga ketu ongulu pamwe nafye, ndelenee fye atuke hatu ke i tungila Omwene Kalunga kaIsrael ngaashi ohamba Kores, ohamba yaPersia, ye tu lombwela.”
4 Opo nee ovanhu vomoshilongo va tyololokifa omake ovanhu Ovajuda ndele ve va halukifa vaha tunge. 5 Ndele va futa ovo ve va kondjifa va ongoloke omhangela yavo omafiku aeshe aKores, ohamba yaPersia, fiyo okepangelo laDarius, ohamba yaPersia.
6 Ndele mefimbo lepangelo laAhasveros, pehovelo lepangelo laye, va shanga onhumwafo yokuvela oonakukala muJuda nomuJerusalem ombedi.
7 Ndele pomafiku aArtasasta, Bislam, Mitridat, Tabeel pamwe naava va ama kuvo, va shangela Artasasta, ohamba yaPersia. Ndele eshango lomonhumwafo la li Oshiaramea, ndele la lundululwa melaka lOshiaramea.
8 Rehum, omupangeli, naSimsai, omushangi, va shangela ohamba Artasasta onhumwafo yokutwifa Ovajerusalem eemhata, tai ti:
9 “Rehum, omupangeli nomushangi Simsai naava va ama kuvo, ovatokolipangeli novapangeli novaxunganeki novakulunhu vovapangeli novalumenhu vaErek novaBabilon novaElam muSusa, 10 noiwana imwe oyo ya kufwa po kuAsnappar omunene nomutumbalekwa ndele ve i tula moshilando shaSamaria nomeenhele dimwe mouninginino waEufrat.”
11 Eshangululo eli lonhumwafo oyo ve i tumina: kohamba Artasasta: “Ovapiya voye ovalumenhu ve li kouninginino waEufrat, otave ku kundu.
12 “Ohamba tai shiivifilwa nokutya, Ovajuda, ovo va dja kwoove, ve uya kufye, ova fika kuJerusalem. Vo otava tungulula oshilando shii noshi nondubo. Otava tungulula eehotekuma ndele tava vandeke ekanghameno. 13 Ohamba nai kale i shi shii, oshilando nge sha tungululwa neehotekuma nge da pwa okutungwa, vo itava ka futa oimaliwa, noilya ile okuyandja efuto longaba, osho ngaha eehamba tadi lumbulwa emona. 14 Fye eshi hatu li omongwa wohamba, itatu dulu okutala ohamba tai dinwa, onghee hano hatu tumu ko ndele hatu shiivifile ohamba, 15 nokutya, mu konakone membo lomafimbo ooxo. Ndele ove to ka mona membo lomafimbo nokudimbulukwa nokutya, oshilando osho sha li oshilando shi nondubo tashi twifa eehamba eemhata, ndele tashi pongeke oilongo, ndele noshito nale nokuli mwa tukulukifwa omapiyaano. Onghee hano oshilando sha hanaunwa po. 16 Fye ohatu shiivifile ohamba nokutya, oshilando ngeenge sha tungululwa neehotekuma da tungwa, ove ito ka mona sha moshilongo shokouninginino waEufrat.”
17 Ohamba ya tuma enyamukulo eli:
“Komupangeli Rehum nokomushangi Simsai nokwaava va ama kuvo, ovo ve li muSamaria nomeenhele dokouninginino waEufrat: Ombili tuu. 18 Onhumwafo mwe i tu tumina onde i leshelwa nawa. 19 Ndele nde va lombwela ndele va konakona ndele va mona mo nokutya, oshilando osho noshito nale nokuli sha twifa eehamba eemhata, ndele mwa tukulukifwa ondubo nepiyaano. 20 Neehamba di neenghono da li muJerusalem do da pangela edu alishe lokouninginino waEufrat, ndele da etelwa oimaliwa, noilya yefendelo nofuto yeengaba. 21 Lombweleni ovalumenhu ovo va efe okutunga noshilando osho shiha tungululwe fimbo inandi mu lombwela. 22 Ndele lungameni muha shimike moshinima eshi, paha holoke oiponga inene, eehamba diha lumbulwe sha.”
23 Eshangululo lonhumwafo ya dja kohamba Artasasta eshi la leshelwa Rehum nomushangi Simsai naava va ama kuvo, vo ova endelela okuya kOvajuda kuJerusalem ndele ve va fininika neenghono va efe okutunga. 24 Opo nee oshilonga shetungululo longulu yaKalunga oyo i li muJerusalem, osha efiwa. Ndele sha efiwa fiyo okomudo omutivali wepangelo laDarius, ohamba yaPersia.
© Oshikwanyama Bible Revised © Bible Society of Namibia, 2008, 2012.
