Etungo loaltari yexwikiloyambo noshivilo shomatwali
1 Nohani onhiheyali eshi ye uya ko novana vaIsrael eshi va li moilando yavo, ovanhu va ongala ngaashi omunhu umwe muJerusalem. 2 Ndele Josua yaJosadak novamwaina ovapristeli naSerubbabel yaSalatiel pamwe novamwaina va fikama, ndele va tunga oaltari yaKalunga kaIsrael, va yambele ko omaxwikiloyambo ngaashi pa shangwa momhango yaMoses, omulumenhu waKalunga. 3 Ndele va tunga oaltari ponhele yayo, osheshi va hangika kehaluko omolwoiwana yedu. Ndele va yambela ko Omwene omaxwikiloyambo, omaxwikiloyambo ongula nonguloshi. 4 Ndele va dana oshivilo shomatwali ngaashi pa shangwa, ndele va yamba omaxwikiloyambo efiku nefiku pamuvalo wa ufwa, efiku keshe omaxwikiloyambo alo. 5 Ndele konima va yamba exwikiloyambo lefiku keshe naalo lohani ipe naaeshe aa omoivilo iyapuki yOmwene naa omunhu keshe ou a etela Omwene eeshali dehalo liwa. 6 Okudja kefiku lotete mohani onhiheyali va hovela okweetela Omwene omaxwikiloyambo, nande ekanghameno lotembeli inali tungwa natango. 7 Ndelenee va yandja oimaliwa kovahongi vomamanya novoipilangi. Ndele kOvasidoni nokOvatirus va yandja ko eendja noikunwa nomaadi, va kufe omiti domisederi muLibanon, ndele ve di ete kefuta kuJoppa pashipango shaKores, ohamba yaPersia, ye shi va pa.
Ekanghameno lotembeli tali tungwa
8 Ndele momudo omutivali eshi va fika kongulu yaKalunga muJerusalem, mohani onhivali, Serubbabel yaSalatiel naJosua yaJosadak novamwaina vamwe ovapristeli nOvalevi naaveshe va dja moukwatwa ndele ve uya kuJerusalem, ova hovela okutunga, ndele va tula Ovalevi ava ve nomido omilongo mbali ile ve di koya, va pashukile oshilonga shongulu yOmwene. 9 Ndele Josua novana vaye novamwaina ovalumenhu naKadmiel novanhu vaye, oludalo laJuda, va fikama ngaashi omunhu umwe okupashukila ava hava longo oshilonga shongulu yaKalunga, pamwe novana vaHenadad, novana vavo novamwaina, Ovalevi.
10 Ovatungi eshi va hovela okutunga ekanghameno lotembeli yOmwene, ovapristeli va tulwa po va djala oikutu yavo youpristeli ve nomanghuma oshikushu, nOvalevi, ovana vaAsaf, ve nomanghuma eembinga, va hambelele Omwene pashipango shaDavid, ohamba yaIsrael. 11 Ndele va hovela okuhambelela nokupandula Omwene:
“Shaashi Ye omuwa,
nouwanghenda waye tau kalelele kOvaisraeli fiyo alushe.”
Novanhu va hafa nokunyakukwa unene, vo eshi va hambelela Omwene, shaashi ekanghameno longulu yOmwene la tungwa. 12 Ndelenee ovapristeli vahapu nOvalevi novakulunhu vomapata, novaxungu, ovo va mona ongulu yotete, ova lila pombada, eshi ve wete ekanghameno longulu ei ya tungwa moipafi yavo, fimbo vakwao va yelula ondaka yavo nokuhafa nokunyakukwa. 13 Novanhu va nyengwa okutongola ondaka yehafo mondaka yelilaano lovanhu, osheshi ovanhu va kuwilila pombada nondaka ya udika kokule.
© Oshikwanyama Bible Revised © Bible Society of Namibia, 2008, 2012.
