Ouyapuki nOuyapuki wOuyapuki
1 Opo nee ye a twala nge molupale linene lotembeli. Ndele ye okwa yeleka eengudi dopekuma: kombinga imwe oupapi wa li omaludimbo ahamano nokombinga ikwao oupapi wa li omaludimbo ahamano, ounene wetwali lekololo. 2 Nounene woshivelo omaludimbo omulongo, nomakuma opofindo popepi noshivelo omaludimbo atano kombinga nombinga. Ye okwa yeleka yo oule walo omaludimbo omilongo nhee, nounene omilongo mbali. 3 Opo nee ye okwa ya meni, ndele ye okwa yeleka ongudi yoshivelo omaludimbo avali, noshivelo omaludimbo ahamano nounene woshivelo omaludimbo aheyali. 4 Ye okwa yeleka yo oule wehale omaludimbo omilongo mbali, nounene omilongo mbali kombinga yolupale linene. Ndele ye okwa lombwela nge ta ti: “Eli Ouyapuki wOuyapuki.”
5 Ndele ye okwa yeleka okupama kwekuma lotembeli omaludimbo ahamano, nounene wolupanda tali dingilile otembeli omaludimbo ane. 6 Nomakololo a li ngaha: omakololo atatu a li meshikulafano lopombada lwomilongo nhatu. Ndele oo a dingilila a tungilwa pekuma lotembeli, opa li pa ningilwa omakololo onhele a li a shaamafana nalo, oo a tungilwa pekuma lotembeli. 7 Ndele omakololo a li e dulafane ounene wao mokulonda kwao, oo eshi a londa a dingilila otembeli, osheshi omakololo aa otembeli a londa fiyo okombada yotembeli, e i dingilila, enya okombada kwa li male lwomeni, e dule makwao.
8 Ndele ame nda tala olupanda lotembeli la londa le i dingilila: omakanghameno omakololo opofindo e fike poshiyelekifoshiti, omaludimbo ahamano. 9 Nounene wekuma lomakololo opondje omaludimbo atano, ndele pa li pa fiilwa onhele pokati komakololo notembeli. 10 Ndele pokati komakololo opa li pe nonhele i fike pomaludimbo omilongo mbali, ya dingilila otembeli. 11 Ndele oivelo yomakololo yokofindo ya taalela onhele ya li ya fyaala po ngaho: oshivelo shimwe sha taalela koumbangalanhu nashikwao sha taalela koumbuwanhu. Nonhele ei ya efiwa po ngaho noya dingilila ko, ovo ya li i nomaludimbo atano. 12 Nongulu ya taalela ehalandjadja lotembeli lo la fiwa po ngaho kombinga youninginino ounene wayo wa li u fike pomaludimbo omilongo heyali, nokupama kwekuma longulu: omaludimbo atano keembinga adishe, noule walo omaludimbo omilongo omugoi. 13 Ye okwa yeleka vali otembeli. Oule omaludimbo efele limwe, nosho yo onhele ya tongolwa nongulu nekuma layo: oule omaludimbo efele limwe. 14 Nounene wonhele yokomesho yotembeli naau wonhele ya tongolwa lwokoushilo omaludimbo efele limwe. 15 Osho ngaha ye okwa yeleka oule wongulu fiyo okouninginino lwokombinga yonhele ya tongolwa, konima yayo, nomalupanda eengudi kombinga nombinga: omaludimbo efele limwe, naashi shomeni lotembeli noihale yomoluumbo.
16 Oikulo yoposhi neembululu domakende da mbwalangadja lwomeni nomalupanda eengudi a dingilila omadimo aeshe atatu. Koshipala shoshikulo shoposhi (kwa li oipilangi ya hongwa keembinga adishe), noule woposhi fiyo okeembululu domakende, nomakende a tuvikwa. 17 Koxulo yoshivelo shotembeli nomeni nopondje nomekuma alishe nomeni nopondje akushe 18 okwa fanekelwa ovakerubi nomilunga, pokati kovakerubi vavali pa li omulunga. Omukerubi keshe okwa li e noipala ivali: 19 kombinga imwe oshipala shomunhu, sha taalela omulunga, nokombinga ikwao oshipala shonghoshi, sha taalela omulunga mukwao. Hano osho ngaha sha hongwa akushe, otembeli aishe, 20 okudja koshi fiyo okoxulo yoivelo kwa li omahongwafano ovakerubi nomilunga, nosho yo momakuma olupale linene lotembeli. 21 Molupale linene lotembeli mwa li mu neengudi da hongwa omingenge nhee. Ndelenee koshipala shOuyapuki wOuyapuki pa monika 22 ngaashi oaltari yoiti, oule wopombada omaludimbo atatu, noule omaludimbo avali. Nomuyo mwa li oukololo nomaulu ayo neemhati dayo da li doshiti. Ndele ye okwa lombwela nge: “Eshi oshitaafula shi li koshipala shOmwene.” 23 Ndele molupale linene lotembeli nomOuyapuki wOuyapuki mwa li oivelo ivali ya shikulafana. 24 Noshivelo keshe sha li shi nomavava avali, a endjelela nokulinyenga. Noshivelo shimwe sha li shi neembinga mbali noshikwao sha li shi neembinga mbali, 25 ndele muyo, moivelo yolupale linene lotembeli mwa hongelwa ovakerubi nomilunga ngaashi pa fanekelwa momakuma. Ndele etwali loshiti la li pondje koshipala shehale. 26 Nomeemhatikuma kombinga mwa li mu neembululu domakende da mbwalangadja lwomeni nomilunga. Nosho yo momakololo nomomatwali otembeli.
© Oshikwanyama Bible Revised © Bible Society of Namibia, 2008, 2012.
