Etumbalo laFarao
1 Ndele momudo omutimulongo nowotete mohani onhinhatu mefiku lotete lohani, ondjovo yOmwene ye uya kwaame, ndele tai ti: 2 “Kaana komunhu, lombwela Farao, ohamba yaEgipiti neemhunga daye u tye:
Ove wa faafana nalyelye metumbalo loye?
3 Tala, Asiria sha li omuti omusederi
komhunda yaLibanon
u noitai i nomafo mawa, u nomudile muwa
nowa li mule mokukula,
noxulo yao ya twa koilemo.
4 Wa kulifwa komeva.
Wa ningwa munene koule womeni ledu,
wa dingililwa komilonga
monhele omo wa twikwa mo,
ndele eenghungulukilo doye domeva
we di undulila omiti adishe domomuulu.
5 Onghee hano oo wa kula unene
u dule omiti adishe domomuulu,
noitai yao ya hapupala
noitai ya tandavela
noya lepala molwomeva manene.
6 Eedila adishe dokeulu
oda yala oihadi yado moitai yao,
noifitukuti aishe yomomufitu
oya dalela momudile woitai yao,
noiwana i lili noi lili inene
oya kala omutumba momudile wao.
7 Ndele oo wa li wa wapala mounene wao
moule woitai yao,
shaashi omidi dao oda li pomeva mahapu.
8 Moshikunino shaKalunga
omiti omisederi inadi fika puwo,
omiti omisipresi inadi foitai yao,
nomiti daplatani inadi feemhanga dao.
Omuti nande umwe womoshikunino shaKalunga
wa fika puwo newapalo.
9 Ame onde u wapalekifa molwouhapu woitai yao,
opo omiti adishe domuEden
odo da li moshikunino shaKalunga de u fila efupa.
10 “Onghee hano, Omwene Kalunga ta ti ngaha: Shaashi oo wa kula unene, nowa twala oxulo yao koilemo ndele we linenepekela oule wao. 11 Ame ohandi ke u yandja momake ovanaenghono vomoiwana. Oshili vo otave u ningile eshi tave u ningi. Molwouhenakalunga waye, Ame nde mu taataa mo. 12 Ovanailongo, oiwana idjuu oye u tetaula, ndele ye u denga poshi. Oitai yao ya wila keemhunda nomomalufilu aeshe, noitai yao ya ninga oitekaukile momakololo aeshe oshilongo. Noiwana aishe yokombada yedu oya dja momudile wao, ndele ye u fiya po ngaho. 13 Eedila adishe dokeulu oda wila kolupwelele lao nopoitai yao aishe oifitukuti aishe ya kala. 14 Opo omiti adishe odo di li pomeva diha kule unene nokutwa eexulo dado koilemo, naado yo di neenghono diha kale mounene wado nande umwe ou ta nu omeva! Osheshi do adishe oda yandjelwa okufya okuya mombwili yomedu mokati kovana vovanhu, kwaavenya va kulukilile mo.
15 “Omwene Kalunga ta ti ngaha: Mefiku tuu olo ye okwa kulukila moshovafi, Ame nda nyika oluhodi, oule nde u uvika molwaye, ndele nda kelela omilonga, opo omeva manene a kanghame. Ndele Libanon, Ame nde shi uvikila momulaulu omolwaye, ndele omiti adishe domomiulu dao wa kulukila. 16 Omolweweelelo lewo laye, Ame nda kakamifa oiwana, Ame eshi nde mu kulukifila moshovafi pamwe naavenya va kulukilile mo. Nomiti adishe domuEden, omiti da hoololwa nodiwa domuLibanon, adishe hadi nu omeva, ode lihekeleka moule womedu. 17 Vo ova kulukila pamwe naye moshovafi, kwaavenya va dipawa keongamukonda, novakwafi vaye yo ava va kala omutumba momudile waye mokati koiwana. 18 Pa kala tuu ngeno mokati komiti domuEden nande umwe u fike pwoove metumbalo nomewapalo? Nande ongaho ove u nokweekelwa moule womedu pamwe nomiti domuEden. Ove u nokunangala mokati kaava inava pita etanda pamwe naava va dipawa keongamukonda. Osho Farao neemhunga daye adishe tadi ka ningwa, Omwene Kalunga ta ti.”
© Oshikwanyama Bible Revised © Bible Society of Namibia, 2008, 2012.
