HESEKIEL 29 - Oshikwanyama Bible (OKYB)

Egipiti

1 Momudo omutimulongo mohani onhimulongo, metimulongo netivali lohani, ondjovo yOmwene ye uya kwaame, ndele tai ti: 2 “Kaana komunhu, oshipala shoye shi taalelifa Farao, ohamba yaEgipiti, u mu xunganekele noshilongo ashishe shaEgipiti. 3 Popya u tye: Omwene Kalunga ta ti ngaha:

‘Tala, Farao, ohamba yaEgipiti, tala,

Ame ohandi ku vele eembedi,

oove ongadu inene to nangala momilonga doye,

ove to ti: “Nil, omulonga wange,

ame nde u li ningila.”

4 Ndelenee Ame ohandi ka tula meehamama doye ongona,

noikwameva yomomilonga doye

ohandi i kanyatifile koipeta yoye;

ndele Ame ohandi ke ku shila mo momilonga doye

pamwe noikwameva aishe yoye

ei tai kanyatele koipeta yoye.

5 Ndele Ame ohandi ku ekele mofuka,

oove mwene noikwameva aishe yomomilonga doye.

Ove oto ka fila moluhaela.

Ito ongelwa ngaashi ito kombelelwa.

Ame ohandi ku yandje u ninge eendja doilyani

yokombada yedu

nodeedila dokeulu.

6 “Noonakukalamo aveshe vomuEgipiti otava ka shiiva nokutya, Aame Omwene, osheshi ovo va ninga oshihati shenenge kepata laIsrael. 7 Vo ngeenge tave ku kwata neke, ove to teka ndele to tete omapepe aeshe. Nongeenge tave liwilike kwoove, oto teka ndele to tengaukifa oiya yavo aishe. 8 Onghee hano, Omwene Kalunga ta ti ngaha: Tala, ohandi ku tumine eongamukonda, ndele handi ka mana mo mwoove ovanhu noimuna. 9 Ndele oshilongo shaEgipiti tashi ka ninga ofuka nonduba yomakulukuma, ndele vo otava ka shiiva nokutya, Aame Omwene. Ove shaashi to ti: Nil owange, ame nde u ninga, 10 onghee hano, tala, Ame ohandi ku vele ombedi, oove mwene nomilonga doye. Ndele Ame ohandi ka ninga oshilongo shaEgipiti onduba yomakulukuma ongaho, ofuka okudja kuMigdol fiyo okuSiene nofiyo okongaba yaEtiopia. 11 Omhadi nande imwe yomunhu itai tokola mo nokaku nekondo loshimuna tali tokola po. Ndele sho oshi nokukala ongaho kashi novanhu momido omilongo ine. 12 Oshilongo shaEgipiti Ame ohandi ke shi ninga ofuka mokati koilongo ya tokekwa, noilando yasho otai ningi ofuka mokati koilando ya hanaunwa po, oule womido omilongo ine. Ovaegipiti Ame ohandi ke ve lihanifila moiwana noku va halakanifila moilongo.’ ”

13 Osheshi Omwene Kalunga ta ti ngaha: “Pexulilo lomido omilongo ine Ame ohandi ka ongela Ovaegipiti moiwana omo va halakanifililwe. 14 Ndele Ame ohandi ka lundulula okukala kwOvaegipiti, ndele vo otava ka shuna medu laPatros moshilongo omo va dalelwa. Ndele oko otava ka ninga ouhamba uhe na etumbalo linene. 15 Ndele oo otau ka kala munini u dulike komauhamba makwao, ndele ye ite ke linenepeka kombada yoiwana. Ndele Ame ohandi ke u ninga oshilongo shinini, vo vaha pangele vali oiwana. 16 Ndele sho itashi ka wana vali shi ninge eameno laIsrael. Vo otava dimbulukifa oulunde waIsrael ta pungulukile okushikula Egipiti. Ndele vo otava ka shiiva nokutya, Aame Omwene Kalunga.”

17 Ndele momudo omutimilongo mbali nomutiheyali mohani yotete, mefiku lotete lohani, ondjovo yOmwene ye uya kwaame ndele tai ti: 18 “Kaana komunhu, Nebukadnesar ohamba yaBabilon, okwa longifa omatanga aye ovakwaita oshilonga shidjuu mokulwifa Tirus: omutwe keshe owa pushuka nepepe keshe ola toshoka, ndelenee ye nomatanga aye inava mona ofuto kuTirus okufutila oilonga yoita ye e i longa kwinya.” 19 Onghee hano, Omwene Kalunga ta ti ngaha: “Tala, oshilongo shaEgipiti ohandi shi pe Nebukadnesar, ohamba yaBabilon, ndele ye ota ka kufa mo oupuna washo noshihakanwa shomusho te shi hakana noixuulwa yomusho te i tinhi, ndele yo otai ka ninga ondjabi yomatanga aye ovakwaita. 20 Ondjabi, ye e i teelela mokulihepeka, ohandi mu pe oshilongo shaEgipiti, osheshi vo ove shi longela nge, Omwene Kalunga ta ti.

21 “Mefiku tuu olo ohandi ka tumifila eumbo laIsrael oluvinga, ndele handi ku pe eenghono u shiive okumakula okanya koye mokati kavo. Ndele vo otava ka shiiva nokutya, Aame Omwene.”