HESEKIEL 24 - Oshikwanyama Bible (OKYB)

Exulilo laJerusalem

1 Ndele momudo omutimugoi mohani onhimulongo, metimulongo lohani, ondjovo yOmwene ye uya kwaame ndele tai ti: 2 “Kaana komunhu, lishangela membo edina lefiku, heeno, lefiku tuu eli. Mefiku tuu eli ohamba yaBabilon tai lotokele Jerusalem. 3 Ndele epata li nondubo li lombwela ekumbiko, u tye kuvo: Omwene Kalunga ta ti ngaha:

Tula ombiya pomafiya, i tula po,

ndele paka mo omeva.

4 Oikambi aishe yombelela i paka mo,

oikambi aishe iwa, oshilama nombeyo.

I yadifa omakipa mawa.

5 Kufa eedi da hoololwa ndele tula oikuni koshi.

Nai fuluke unene.

Nomakipa yo muyo e nokupya.”

6 Onghee hano, Omwene Kalunga ta ti ngaha: “Woo oshilando shohonde, ombiya i noilemo ya kanyatela mo. Kufa mo oshikambi noshikambi, inashi umbilwa oshihoololifo. 7 Osheshi ohonde ya tilwashi kusho oi li meni lasho. Ye e i ongela kemanya li li ngasho. Ye ine i tilashi medu opo i fufilwe nedu. 8 Ame nda tula ohonde kemanya li li hamungaho, iha fufilwe, opo oupyuhandu wange nonghone yange i penduke.”

9 Onghee hano, Omwene Kalunga ta ti ngaha: “Woo oshilando shohonde! Ame ohandi ka hapupalifa oikuni omundilo u titime. 10 Ka keni po oikuni ihapu! Temeni po omundilo! Paka po ombelela fiyo ya pya! Fulukifa omunghoka! Nomakipa naa lungwine! 11 Ndele i efa, nai kale ngaho komakala, opo i pupyale, oshivela shayo shitwima shi tilyane nomakako ayo a shiive okuhemuka muyo, heeno, oilemo yomuyo i pye po. 12 Opa kala shili oupyakadi, fiyo okuloloka, ndele oilemo yayo ihapu inai pwa mo muyo. Oilemo yayo nai ye momundilo! 13 Omolwonyata yoye tai nyonyodolifa, nande Ame nda li nda hala oku ku yapula, ndele ove ino yapuka, ove ito ka yapulwa fimbo Ame inandi tulumukifila mwoove oupyuhandu wange. 14 Aame Omwene, nde shi tya. Otau uya, ndele Ame ohandi ke u ninga. Ame itandi ka efa, itandi ka tala nolukeno ile okulialuluka. Pakweenda kwoye nopailonga yoye vo otave ke mu tokola, Omwene Kalunga ta ti.”

15 Ondjovo yOmwene ye uya vali kwaame, ndele tai ti: 16 “Kaana komunhu, tala, Ame ohandi kufa po ouhokwe womesho oye nokufya kwohaluka. Ndelenee ino kema, ino lila, ndele ino pitifa omahodi. 17 Tula oshenyo poshi. Ino lila eefya. Djala embale loye loshivilo komutwe, djala eenghaku keemhadi. Ino uvika omilungu deni ndele ino lya omungome tau etwa kovanhu.”

18 Opo nee nda popya novanhu etango longula, ndelenee onguloshi omukainhu wange okwa fya. Ndele ongula nda ninga ngaashi nda lombwelwa. 19 Ndele ovanhu va lombwela nge, va pula tava ti: “Ito tu shiivifile, otashi ti shike, eshi to ningi ngaha?” 20 Opo nee ame nde va nyamukula handi ti: “Ondjovo yOmwene ye uya kwaame, ndele tai ti: 21 Tya keumbo laIsrael: Omwene Kalunga ota ti ngaha: Tala, Ame ohandi ka nyateka otembeli yange, ohotengulu yeni, efimano lokulinenepeka, ouhokwe womesho eni nodjuulufi yomwenyo. Ndele ovana veni ovamati noukadona, ava mwe va fiile mo, otava ka dipawa keongamukonda. 22 Opo nee tamu ka ninga ngaashi Ame nda ningile: Nye itamu ka uvika omilungu deni noitamu ka lya omungome tau etwa kovanhu. 23 Ndele embale leni tali ka kala komitwe deni neenghaku deni okeemhadi deni. Nye itamu ka kema ile mu lile, ndelenee nye tamu ka ngonopala molwoulunde weni nokutula oshenyo poshi omunhu nomunhu. 24 Ndele Hesekiel ta ka kala edidiliko kunye. Ngaashi naanaa a ningile, osho nye otamu ka ninga. Sho ngeenge tashi uya, nye otamu ka shiiva, nokutya, Aame Omwene Kalunga.”

25 Omwene okwa tya: “Ndee oove, kaana komunhu! Mefiku tuu olo, Ame ohandi ka kufa po ohotengulu yavo, ehafo linene lavo nouhokwe womesho avo, nodjuulufi yeemwenyo davo, novana vavo ovamati noukadona, 26 mefiku tuu olo nakuyonhapo te uya kwoove e shi ku shiivifile momatwi oye. 27 Mefiku tuu olo okanya koye taka makuka nokanya kanakuyonhapo, ndele ove to ka popya, ito kala vali wa fita ondaka. Osho ngaha ove oto ka ninga edidiliko kuvo, ndele vo otava ka shiiva nokutya, Aame Omwene.”