HESEKIEL 16 - Oshikwanyama Bible (OKYB)

Ombwada oififahoni yomuJerusalem

1 Ondjovo yOmwene ye uya vali kwaame ndele tai ti: 2 “Kaana komunhu, hololela Jerusalem oixuna yasho,” 3 u tye: Omwene Kalunga ta lombwele Jerusalem ngaha: “Efina lepata loye nokudalwa kwoye okwa li medu lOvakaanan. Xo okwa li Omuamori nanyoko Omuheti. 4 Ndele okudalwa kwoye okwa li ngaha: Efiku tuu linya wa dalwa okanghowa koye inaka tetwa, ndele ove ino koshwa nomeva u yele. Nosho yo ino fetifwa nomongwa, noino dingilwa omalapi. 5 Inapa kala nande umwe e ku uditile olukeno, ye e ku ningile ngeno sha shomoinima ei noku ku filonghenda. Ndelenee ove wa ekelwashi wa tulwa mehenene longaho. Osho ngaha va nyonyodola omwenyo woye mefiku linya ove wa dalwa. 6 Ndele Ame nda enda po pwoove nonde ku mona, eshi to fangaula mohonde yoye. Opo nee Ame nde ku lombwela fimbo wa li mohonde yoye: Kala nomwenyo! Heeno, Ame nde ku lombwela: Kala nomwenyo, fimbo wa li mohonde yoye! 7 Ame nde ku hapupalifa, ngaashi omumeno womepya muhapu uhe shii kuvalwa! Ndele ove wa kula, wa kulilila, ndele wa fika mouwa wa wapalelela, omavele oye a tumba neexwiki dokomutwe dakula. Ndele natango ove wa li hamunghele uhe na sha.

8 “Ndele Ame onda enda po pwoove, ndele nde ku mona, ndele tala, efimbo loye ola li efimbo lohole. Opo nee Ame nde ku uvika noshikutu shange nonda tuvika ouhamunghele woye. Heeno, Ame nde ku anenene ndele nda ninga ehangano naave, ndele ove wa ninga wange, Omwene Kalunga ta ti. 9 Ame nde ku kosha nomeva ndele nda feta po ohonde yoye ndele nde ku vaeka omaadi. 10 Ame nde ku dika yo noikutu yeefoloto dihapu, ndele nde ku ningila eenghaku doshipa shoshinamwenyo shomomeva ndele nde ku tuvika noshiyata shiwa sholiina ndele nde ku uvika noshiyata shofei. 11 Natango onde ku wapeka nomawapaleko noivela komaoko oye nokalyenge mofingo yoye. 12 Ndele Ame nda tula okalinga meyulu loye, noulinga momatwi oye noshishani shiwa komutwe woye. 13 Heeno, Ame nde ku wapeka noshingoldo noshisiliveli, noikutu yoye ya li oliina iwa ipu nofei noshiyata sheefoloto di lili nodi lili. Ndele ove wa lya oufila wa nakwa eenyiki nomaadi, ndele ove wa li muwa unene uhe shii kuyelekwa ndele ove wa wana okuninga ouhamba. 14 Ndele etumbalo loye la tandavela moiwana molwouwa woye, osheshi oo wa wanenena omolwomawapaleko ange aa nde ku dika, Omwene Kalunga ta ti.

15 “Ndelenee ove we lineekela ewapalo loye ndele we litula mokuhaelwa omolwokushiivika kwoye. Ndele oluhaelo loye we li tilila kombada yakeshe ou a enda po: naye yo na kale mulo. 16 Ove wa kufa oikutu yoye ndele we li ningila oikulundu yondomo ndele wa haelwa kombada yayo. Sha tya ngaha inashi ningwa nale noitashi ka ningwa. 17 Ndele omawapaleko oye wa kufa moshingoldo shange nomoshisiliveli shange, eshi nde shi ku pele, ndele ove we li ningila omafano ovalumenhu nokuhaelwa nao. 18 Ndele ove wa kufa oikutu yoye yomaludi mahapu, ndele wa uvika omafano aa. Omaadi ange noitwimino yange ove we i tula moipafi yao. 19 Nomungome wange ou nde u ku pele, oufila wa nakwa nomaadi nonomaadi eenyiki nao nde ku palula, oo ove we a tula moipafi yao ngaashi edimba liwa. Heeno, osho sha kala, Omwene Kalunga ta ti.

20 “Natango ove wa kufa ovana voye ovamati noukadona, ovo wa dalela nge, ndele vo we ve a yambela a lye. Oluhaelo loye inali ku wanenena mbela, 21 ove eshi wa dipaa ovana vange, ndele we va yandjela ngaashi eyambo kuwo okuxwikwa po momundilo. 22 Ove moixuna yoye aishe nomokuhaelwa kwoye ino dimbulukwa vali omafiku ounyasha woye, fimbo wa li hamunghele uhe na sha, ndele wa nangala nokufangaula mohonde yoye.

23 “Omwene Kalunga ta ti: Woo, woo ove! Ndele mokuhapupalifa owii woye 24 ove we litungila onhele ya tumba nowe liningila oshikulundu mondabo keshe. 25 Peshakeneno keshe ove wa tunga oshikulundu shoye ndele ouwa woye we u fifa ohoni, noito fyohoni okupandjulila omutokoli po keshe omaulu oye, ndele ove wa hapupalifa oluhaelo loye. 26 Ndele ove wa haelwa yo kovana vomuEgipiti, ovashiinda voye ve noinhimbu inene. Ndele wa hapupalifa okuhaelwa kwoye, u handukife nge.

27 “Ndele tala, Ame nda nana eke lange kwoove ndele nda xupipikifa oshitukulwa shoye shomeendja. Ndele Ame nde ku efela ehandu laava have ku tondo, nokutya ovana oukadona Ovafilisti, ava va fya omolwokweenda kwoye kwa nyonyodolwa. 28 Natango ove wa haelwa kovana vaAsiria, osheshi ino kuta mboli. Heeno, ove wa haelwa kuvo nonatango ino kuta. 29 Ndele ove wa hapupalifa okuhaelwa kwoye langhele lwokoshilongo shovalandifi langhele lwokuKaldea. Ndele nasho yo ove ino kuta natango.

30 “Omutima woye wa xwama ouhalu u fike peni, Omwene Kalunga ta ti, shaashi wa ninga oinima aishe ei, oshilonga shombwadelela, 31 ove eshi to tungu onhele yoye ya tumba peshakeneno keshe ndele to ningi oikulundu yoye mondabo keshe! Ndelenee ove wa li uhe li ngaashi eembwada dikweni, eshi wa dina ondjabi yoluhaelo. 32 Akutu ove, ngaashi omukainhu ta teya ohombo, osheshi ta tambula ovanhu ponhele yomulumenhu waye. 33 Vo ohava pe eembwada adishe oyoonda, ndelenee ove wa yandja oyoonda kovaholike voye aveshe, ndele ove we liondela ovahaeli vo ve uya kwoove keembinga adishe. 34 Hano ove wa monika onakupilika weenghedi dovakainhu, vo inave ku shikulila oluhaelo, ndele ove wa yandja oyoonda, ndele haave wa pewa oyoonda. Hano osho ngaha wa ninga onakupilika.

35 “Onghee hano, ombwada ove, uda ondjovo yOmwene. 36 Omwene Kalunga osho ta ti: Oihole yoye eshi ya tilwashi noukainhu woye eshi wa monika mokuhaelwa kwoye novaholike voye noikalunga yoye aishe tai nyonyodolwa, naashi we i tilila ohonde yovana voye, 37 onghee hano, tala, Ame ohandi ka ongela ovaholike voye aveshe, ava we va hokwa, aveshe ava ve holike kwoove, naaveshe ava wa li uhe va hole, heeno, vo aveshe ohandi ke va ongela keembinga adishe oku ku lwifa, ndele handi va hololele oukainhu woye, opo va tale ohoni yoye aishe. 38 Ndele Ame ohandi ke ku tokola ngaashi sha pangelwa momhangela yovatei vohombo novatilishi vohonde, ndele Ame handi ku efele efyo lohonde moupyuhandu nomouladi. 39 Ndele Ame ohandi ke ku yandja momake avo, ndele vo otava ka teya po onhele yoye ya tumba nokungumauna po oikulundu yoye, otava kufa kwoove oikutu yoye nomawapeko oye, ndele tave ku efa u li hamunghele uhe na sha. 40 Opo vo otave ku shivile ongudu yovanhu ndele tai ku kupula nomamanya ndele tai ku tetaula nomaongamukonda. 41 Vo otava ka xwika po omaumbo eni yo nomundilo noku mu wanifila omahandukilo moipafi yovalikadi vahapu. Ndele Ame ohandi xulifa po okuhaelwa kwoye, naave yo ito ka yandja vali oyoonda. 42 Ndele Ame ohandi ka dima oupyuhandu wange mwoove, opo nee ehandu lange tali kanduka po pwoove, ndele Ame ohandi ka kala nda mwena ndele itandi handuka vali. 43 Ove eshi ino dimbulukwa omafiku enya ounyasha woye ndele wa pendula ehandu lange noinima ei aishe, tala, osho naame yo ohandi wilifa okweenda kwoye komutwe woye, Omwene Kalunga ta ti. Mboli ove ino ninga oshififahoni kombada yoixuna yoye aishe?

44 “Tala, keshe umwe ou ta toto oitevo, ote shi ku ningile yo, nokutya: ‘Ngaashi ina nosho yo omona okakadona.’ 45 Oove omona okakadona kanyoko, ou a tunyukwa omulumenhu waye novana vaye; ndele oove omumwaina wovamwanyoko, ava va tunyukwa ovalumenhu vavo novana vavo. Nyoko okwa li Omuheti, naxo okwa li Omuamori. 46 Ndele omukulu woye omukainhu oye Samaria, ye pamwe novana vaye oukadona, ava ve li koumbangalanhu woye. Ndelenee ondenge yoye omukainhu, ou e li koumbuwanhu woye, oye Sodom novana vaye oukadona. 47 Ndelenee nye inamu enda neendjila davo ndele inamu longa oixuna yavo. Okafimbo kaxupi ndele nye mwe va dula meenghedi dii ngaashi vo meendjila davo adishe. 48 Oshili ngaashi Ame ndi nomwenyo, Omwene Kalunga ta ti, oshilielela, Sodom, omumwanyoko omukainhu, ye pamwe novana vaye oukadona ina longa ngaashi ove wa longa, ove novana voye oukadona. 49 Tala, oulunde womumwanyoko omukainhu Sodom owo: ye novana vaye oukadona va kala melinenepeko nomeloolo leendja nometulumuko lihe na oshisho, ndelenee ye ina pameka okwooko kwohepele nokwomukwanaluhepo. 50 Ndele vo eshi ve linenepeka ndele va ninga oixuna koshipala shange, Ame eshi nde shi mona, onde va ta po. 51 Samaria mokunyona ina fika nande ketata loulunde woye. Ove wa hapupalifa oixuna yoye, u va dule, ndele ove noixuna yoye aishe we i longa, wa yukipalifa ovamwanyoko ovakainhu. 52 Humbata hano yo ohoni yoye, ove eshi wa yukipalifa ovamwanyoko ovakainhu. Omolwomatimba oye e dule aavenya mokunyonenena, vo ove ku dule mouyuki. Kala hano wa fya ohoni ndele humbata elengwa loye, shaashi wa yukipalifa ovamwanyoko ovakainhu.

53 “Ndele Ame ohandi ka lundulula okukala kwavo, okukala kwaSodom novana vaye oukadona, nokukala kwaSamaria novana vaye oukadona. Ndele Ame ohandi ka lundulula okukala kwoye, ove ou u li pokati kavo, 54 opo ove u humbate elengwa loye ndele ove u shiive okufya ohoni molwaaishe ei wa ningile, u va hekeleke. 55 Ndele ovamwanyoko ovakainhu Sodom pamwe novana vaye oukadona tava ka shuna moukali wavo wonale. NaSamaria pamwe novana vaye oukadona ta ka shuna moukali wavo wonale. Naave pamwe novana voye oukadona tamu ka shuna moukali weni wonale. 56 Heeno, omumwanyoko omukainhu Sodom ino mu tumbula kokanya koye mefiku lelinenepeko loye, 57 manga owii woye inau holoka, ngaashi mefimbo linya ove wa shekwa keembinga adishe, eshi ovana oukadona vaEdom naaveshe ava ve ku dingilila novana oukadona Ovafilisti ve ku dina. 58 Oshilonga shoye shi fifa ohoni noixuna yoye ove u noku i humbata, Omwene Kalunga ta ti.

59 “Osheshi Omwene Kalunga ota ti ngaha: Heeno, Ame ohandi ku ningi ngaashi ove wa ningile, ove ou wa dina eano nowa teya po ehangano. 60 Nande ngaha Ame ohandi ka dimbulukwa ehangano letu naave lomomafiku enya ounyasha woye, ndele Ame ohandi ka dika naave ehangano laalushe. 61 Opo nee ove oto ka dimbulukwa eendjila doye nokufya ohoni, ngeenge ove ho tambula ovamwanyoko ovakainhu ovakulu voye neendenge doye, ndele Ame ohandi ve ku pe ngaashi ovana oukadona. Nande ihandi shi ningi meenghono dehangano letu naave. 62 Ndele Ame ohandi ka dika ehangano letu naave ndele ove to ka shiiva nokutya, Aame Omwene, 63 opo ove u shiive okudimbulukwa nokufya ohoni ndele ito makula vali okanya koye omolwohoni, Ame ngeenge handi ku longele ekwatakanifo omolwaaishe ei we i ningile, Omwene Kalunga ta ti.”