HESEKIEL 15 - Oshikwanyama Bible (OKYB)

Israel omuti womuviinyu tau xwikwa po komundilo

1 Ndele ondjovo yOmwene ye uya kwaame ndele tai ti: 2 “Kaana komunhu, omuti womuviinyu u dule ngahelipi omiti dikwao adishe, omuti womuviinyu ou wa li mokati komiti domoixwa? 3 Muwo tamu kufwa mbela oshiti, shi hongwe nande oshinima tashi longifwa? Ile omunhu ta kufa mo muwo ngeno oshitindungo shokweendjelelifa ko oinima i lili noi lili? 4 Tala, wo wa efelwa okuxwikwa komundilo. Omundilo ngeenge wa xwika po eembinga adishe mbali domuwo nopokati kao wa lungwina, u noshilonga shashike u longifwe? 5 Tala, fimbo wa li omuti inau nyonauka, inapa dulika okuhongwa sha kuwo, hano unene kau noshilonga vali, eshi omundilo we u xwika noku u lungwinifa, otapa ka hongwa sha vali mbela?” 6 Onghee hano, Omwene Kalunga ta ti ngaha: “Ngaashi omuti omuviinyu u li mokati komiti domoixwa, omuti omuviinyu ou nde u efela okuxwikwa po komundilo, osho ngaha nda efa oonakukala muJerusalem. 7 Ame ohandi ka taalelifa oshipala shange kuvo noku va vela ombedi: vo va dja momundilo tau ke va xwika po. Ndele vo otava ka shiiva nokutya, Aame Omwene, ngeenge handi taalelifa oshipala shange kuvo oku va vela ombedi, 8 ndele oshilongo shavo handi shi ningi ofuka, osheshi vo va teya po ohombo, Omwene Kalunga ta ti.”