HESEKIEL 13 - Oshikwanyama Bible (OKYB)

Woo ovaxunganeki ovanaipupulu

1 Ndele ondjovo yOmwene ye uya kwaame ndele tai ti: 2 “Kaana komunhu, xunganeka nokuvela ombedi ovaxunganeki vomuIsrael hava xunganeke, nokwaava ve lininga ovaxunganeki meenghono davo vene, u tye: Pwilikineni ondjovo yOmwene!” 3 Omwene Kalunga ota ti ngaha: “Woo ovaxunganeki vehe neendunge, ava hava shikula omhepo yavo vene noinima inave i mona. 4 Israel, ovaxunganeki voye ove li ngaashi eembadje momakulukuma. 5 Nye inamu ya moipana yomohotekuma, noinamu fitika ekuma tali dingilile epata laIsrael, opo li kale la pama molwoodi mefiku lOmwene. 6 Vo ova mona oinima yongaho noutalikokule woipupulu, vo ava hava ti: Omwene okwa popya, nande Omwene ine va tuma; ndele vo hava teelele vati ewanifo londjovo. 7 Nye inamu mona ngeno emoniko longaho noinamu popya outalikokule woipupulu, eshi tamu ti: Omwene ta popi, nande Ame inandi shi popya?”

8 Onghee hano Omwene Kalunga ta ti: “Nye eshi mwa popya oumbudi ndele tamu mono omamoniko oipupulu, onghee hano, Ame ohandi mu vele eembedi, Omwene Kalunga ta ti. 9 Ndele eke lange tali ka lwifa ovaxunganeki ava hava mono omamoniko oumbudi ndele ohava xunganeke oipupulu: Vo itava ka kala meongalo loshiwana shange, noitava ka shangwa membo lepata laIsrael, noitave ke uya moshilongo shaIsrael. Ndele vo otava ka shiiva nokutya, Aame Omwene Kalunga. 10 Vo, heeno, vo eshi hava pukifa oshiwana shange mokupopya: ‘Ombili!’ Nande kape nombili; ndele vo, fimbo ovanhu tava tungu ekuma, ohave li kolongifa nokalka. 11 Lombwela venya hava kolongifa nokalka, nokutya otaka ka natuka ko! Odula inene yetilashi tai ke uya, ndele nye eemhawe, tamu ka wila poshi noshikungulu tashi ka pauka. 12 Ndele taleni, ekuma tali teka po! Opo nee nye itamu ka lombwelwa ngeno: ‘Ekolongo mwa kolonga nalo, oli li peni?’ ” 13 Onghee hano, Omwene Kalunga ta ti ngaha: “Ame mehandu lange handi tumu oshikungulu, nodula inene yetilashi tai ke uya mehandu lange neemhawe moupyuhandu wange okuteyaula po shekesheke. 14 Ndele ekuma, nye mwe li kolongifa nokalka, Ame ohandi ke li ngumauna po noku li undulila poshi, fiyo ekanghameno tali ka holoka. Opo nee oshilando tashi ka teka po, ndele nye otamu ka fila mo; ndele nye otamu ka shiiva nokutya, Aame Omwene. 15 Ndele oupyuhandu wange Ame ohandi ke u wanifila ekuma naava ve li kolongifa nokalka; ndele Ame ohandi ke mu lombwela: kape na vali ekuma novakolongi valo, 16 nokutya, ovaxunganeki vaIsrael hava xunganekele Jerusalem ndele tave shi monene omamoniko ombili, nande ombili kai po, Omwene Kalunga ta ti.

17 “Ndele oove, kaana komunhu, taalelifa oshipala shoye kovana oukadona voshiwana shoye, ava hava holoka ngaashi ovaxunganeki ovakainhu meenghono domitima davo vene, ndele ove, xunganeka noku va vela ombedi,” 18 ndele tya: Omwene Kalunga ota ti ngaha: “Woo ovalikadi ava, hava mangele poikesho aishe yomaoko ouputu nohava tungu oshiyata sheluviluvi kombada yomitwe dovanhu ve lili nove lili vakula novanini, opo va yule eemwenyo. Tashi dulika tuu nye mu yule eemwenyo dimwe, fimbo eemwenyo dimwe tamu di lixupifile nye vene? 19 Ndele nye otamu dinifa nge mokati kovanhu omolwouyadi wokushambekela omahangu nomolwoupambu vavali vomungome mu dipae eemwenyo, odo da li di nokukala nomwenyo, fimbo mwa diinina eemwenyo da li di nokufya, eshi mwa pukifa oshiwana shange osho tashi pwilikine oipupulu.” 20 Onghee hano Omwene Kalunga ota ti ngaha: “Ame ohandi mu velele eembedi eenghandja doupule nado tamu yulu eemwenyo ngaashi oudila, ndele Ame ohandi ke u tokola ko koikesho yeni; ndele Ame ohandi ka mangulula eemwenyo, odo mwe di yula ngaashi oudila. 21 Ame ohandi ka teta po oiyata yomaluviluvi yeni nokuxupifa oshiwana shange momake eni, opo vaha ninge vali ovahakanwa vomomake eni. Ndele nye otamu ka shiiva nokutya, Aame Omwene. 22 Nye eshi mwa nyikifa omitima dovayuki oluhodi noipupulu, nande Ame nda li inandi hala oku mu nyikifa oluhodi, ndele mwa pameka omake omuhenakalunga, opo ye ehe lialuluke kondjila yaye ii, a kale nomwenyo. 23 Onghee hano nye itamu ka mona vali omamoniko oipupulu nande noitamu ka longifa vali outalikokule. Ndelenee Ame ohandi ka xupifa ovanhu vange momake eni, ndele nye otamu ka shiiva nokutya, Aame Omwene.”