Ombululu yomekuma Oupika woshiwana nehalakanifo lasho
1 Ondjovo yOmwene oye uya kwaame natango, ndele tai ti: 2 “Kaana komunhu, ove u li mokati kovanhu veumbo lovatangalali, ava ve nomesho okutala, ndele kave wete ko. Vo ve nomatwi okuuda, ndelenee itava udu ko, osheshi vo eumbo lovatangalali. 3 Ndelenee ove, kaana komunhu, inda moupika omutenya, moipafi yavo. Fikama ngaashi omupika moipafi yavo u dje monhele yoye u ye monhele imwe. Kashiimba tave ke shi mona, osheshi vo eumbo lovatangalali. 4 Ndele ove u nokweeta pondje oinima yoye omutenya moipafi yavo, ngaashi oinima ei tai pumbiwa kwaau ta i moupika. Ndele ove mwene ou nokupita mo onguloshi moipafi yavo ngaashi ou ta i moupika. 5 Fa ombululu mekuma moipafi yavo, ndele to i pitifa mo. 6 Moipafi yavo u noku i humbata kepepe, nomomulaulu fokofoko u noku i eta pondje. Oshipala shoye shi uvika, opo uha mone oshilongo. Osheshi Ame ohandi ku ningi edidilikofano leumbo laIsrael.”
7 Ndele ame osho nda ninga ngaashi nda lombwelwa. Ame onda tuta mo oinima yange omutenya, ei ya pumbiwa kwaau ta i moupika. Nonguloshi ame nda fa neke lange ombululu mekuma. Momulaulu fokofoko ame nde i tuta mo, nde i humbata kepepe lange moipafi yavo. 8 Opo ondjovo yOmwene oye uya kwaame ongula, ndele tai ti: 9 “Kaana komunhu, eumbo laIsrael, epata li nondubo, inali tya kwoove: oto ningi shike? 10 Tya kuvo: Omwene Kalunga ota ti ngaha: Exunganeko tuu eli tali xunganeke omupangeli womuJerusalem neumbo alishe laIsrael eli li li mokati kavo. 11 Tya: Aame edidilikofano leni. Ngaashi ame nda ninga, navo osho tava ka ningwa: Otava ka ya moupika, moukwatwa. 12 Ndele omupangeli ou e li mokati keni ota ka humbata oinima kepepe, momulaulu fokofoko, ndele ta ka pita mo ye ota ka fa ombululu mekuma a shiive okupita mo. Ye ota ka uvika oshipala shaye, aha mone nomesho aye oshilongo. 13 Ndele Ame ohandi ka yala eendjadja kombada yaye, ndele ye ota ka kwatwa kelulo lange, ndele Ame ohandi ke mu twala kuBabilon, edu lOvakaldea. Ndelenee ye ite ke li mona, ndele oko ta ka fila. 14 Ndele aveshe ava ve li puye oku mu kwafa nomatanga aye aeshe Ame ohandi ke a halakanifila keembinga adishe domhepo, ndele ohandi va shikulile ko neongamukonda. 15 Opo nee vo otava ka shiiva nokutya, Aame Omwene, Ame ngeenge handi va halakanifile mokati koiwana nohandi va undwile moilongo. 16 Ndelenee muvo Ame ohandi ka xupifa mo okangudu kanini kaha hangike keongamukonda, nokondjala nokoudu u nolutapo, opo va shiive okuhepaulula mokati koiwana, oko tava i ko, oixuna yavo aishe, ndele vo otava ka shiiva nokutya, Aame Omwene.”
17 Ndele ondjovo yOmwene ye uya kwaame ndele tai ti: 18 “Kaana komunhu, ove u nokulya omungome woye nokukakama nokunwa omeva oye nokudekweta koumbada. 19 Ndele ove u nokulombwela ovanhu vomoshilongo: Omwene Kalunga mokupopya oonakukala muJerusalem, moshilongo shaIsrael, ota ti ngaha: Otava ka lya omungome wavo noumbada, nokunwa omeva avo mehaluko, nedu lavo tali ka tokekwa oinima aishe yomulo molwoukolokoshi woonakukalamo aveshe mulo. 20 Noilando ei i novanhu, otai ka hanaunwa po, noshilongo otashi ka ninga ofuka. Ndele nye otamu ka shiiva nokutya, Aame Omwene.”
Ovaxunganeki ovanaipupulu tava xunganekwa
21 Ndele ondjovo yOmwene ye uya kwaame ndele tai ti: 22 “Kaana komunhu, etumbulosheko olilipipo nye mu li na moshilongo shaIsrael, eshi tamu ti: ‘Omafiku taa lepala nomamoniko aeshe taa ningi ongaho.’ 23 Onghee hano va lombwela: Omwene Kalunga ota ti ngaha: Ame ohandi ka xulifa po etumbulosheko eli, vo vehe li longife vali muIsrael. Ndelenee tya kuvo: ‘Omafiku a ehena popepi newanifo lemoniko keshe.’ 24 Ndelenee meumbo laIsrael itamu ka kala vali emoniko loipupulu ile exunganeko longaho. 25 Osheshi Ame, Omwene, Ame ohandi ka popya. Nondjovo ei Ame handi ka popya, otai ka wanifwa, itai kala ko. Osheshi momafiku tuu eni, epata ove londubo, Ame ohandi ka popya ondjovo imwe noku i wanifa yo, Omwene Kalunga ta ti.”
26 Ondjovo yOmwene ye uya natango kwaame, ndele tai ti: 27 “Kaana komunhu, tala, eumbo laIsrael tali ti: Emoniko ye e li mona olomafiku okomesho, ndele ta xunganeke omafimbo e li kokule. 28 Onghee hano va lombwela: Omwene Kalunga ta ti: ‘Kape na nande ondjovo imwe yange tai ka kala ko. Ondjovo Ame handi i popi otai ka wanifwa,’ Omwene Kalunga ta ti.”
© Oshikwanyama Bible Revised © Bible Society of Namibia, 2008, 2012.
