Ovakulunhu tava tokolwa
1 Ndele Omhepo oya yelula nge po ndele oya twala nge koshivelo shomuvelo wotembeli yOmwene, sha ama koushilo. Ndele tala, poshivelo opa kala ovalumenhu omilongo mbali navatano, nomokati kavo ame nda mona Jaasanja yaAsiria, naPelatja yaBenaja, omalenga oshiwana. 2 Opo Ye okwa lombwela nge: “Kaana komunhu, ovo ovalumenhu hava diladila eshi inashi yuka ndele hava yandje omapukululo mai moshilando, 3 vo hava ti: ‘Efimbo lokutunga eengulu itali fiki diva. Oshilando eshi osho ombiya ndele fye ombelela.’ 4 Onghee hano xunganeka u va vele eembedi. Kaana komunhu, xunganeka!” 5 Opo nee Omhepo yOmwene ya wila nge, ndele ye ta ti kwaame: Popya, Omwene osho ta ti: Osho ngaha mwa popya, onye epata laIsrael. Ndele eshi tashi uya momhepo yeni, Ame ondi shi shii. 6 Moshilando eshi omu na vahapu ava va dipawa kunye, nye omwa yadifa omapandavanda eni novadipawa. 7 Onghee hano Omwene Kalunga ta ti ngaha: “Ovadipawa kunye, ava mwe va nangeka musho, vo ombelela, noshilando eshi ombiya, ndelenee Ame ohandi ke mu kufa mo. 8 Nye ohamu tila eongamukonda, ndelenee Ame ohandi ka eta eongamukonda kombada yeni, osho Omwene Kalunga ta ti: 9 ndele Ame ohandi ke mu kufa mo ndele handi mu yandje momake ovanailongo ndele handi ka wanifa omatokolohandu mokati keni. 10 Nye otamu ka fya keongamukonda. Pongaba yaIsrael Ame ohandi ke mu tokola. Ndele nye otamu ka shiiva nokutya, Aame Omwene. 11 Oshilando eshi itashi ka ninga kunye ombiya, nanye itamu ka ninga ombelela musho. Pongaba yaIsrael Ame ohandi ke mu tokola. 12 Ndele nye otamu ka shiiva nokutya, Aame Omwene, nye ava inamu enda paenghedimhango dange ndele inamu diinina omalombwelo ange, ndelenee mwa longa pamalombwelo oiwana ei tai mu dingilile.” 13 Ndele fimbo ame nda xunganeka, Pelatja, omona waBenaja, okwa fya. Opo nee ame nda wila eombe ndele nda ingida pombada, ndele handi ti: “Akutu, Omwene Kalunga, Ove wa hala okumana po mbela oshixupe shaIsrael?”
14 Opo nee ondjovo yOmwene ye uya kwaame ndele tai ti: 15 “Kaana komunhu, ovamwanyoko, ovamwanyoko, ovalumenhu vomepata leni, neumbo alishe laIsrael, aveshe kumwe, vo otava lombwelwa koonakukala muJerusalem nokutya: ‘Kaleni kokule nOmwene, ofye tuu twa pewa oshilongo tu shi nangale.’ 16 Onghee hano popya: Omwene Kalunga ota ti ngaha: Ame eshi nde mu twala kokule mokati koiwana naashi nde mu halakanifa moilongo ndele Ame nda ninga otembeli kunye okafimbo kaxupi moilongo muyo tamu ke uya. 17 Onghee hano popya: Omwene Kalunga ota ti ngaha: Ame ohandi ke mu kombelela moiwana noku mu ongela moilongo muyo mwa halakanifilwa, ndele Ame handi ke mu pa edu laIsrael. 18 Ndele vo otave ke uya ko, ndele tava ka kufa mo oixuna aishe noififahoni aishe 19 Ndele Ame ohandi ke va pa omutima umwe nomhepo ipe meni lavo. Nomutima wemanya ohandi ke u kufa mo ndele handi va pe omutima wonhumba, 20 opo mu shiive okweenda meenghedimhango dange nokudiinina omalombwelo ange noku a wanifa. Ndele vo otava ka ninga oshiwana shange, naame ohandi ka kala Kalunga kavo. 21 Ndelenee vo ve nomitima tadi shikula omitima doixuna yavo nodoififahoni yavo, okweenda kwavo Ame ohandi ku umbile kombada yomitwe davo, Omwene Kalunga ta ti.”
22 Opo nee ovakerubi va yelula omavava avo nomaluvalaulu a yeluka shimwe pamwe navo, fimbo oshinge shaKalunga kaIsrael sha kala kombada yavo. 23 Ndele oshinge shOmwene sha yeluka sha dja moshilando ndele sha kanghama komhunda ei ya ama koushilo koshilando. 24 Opo Omhepo ya yelula nge, ndele memoniko, meenghono dOmhepo yaKalunga, ya twala nge kovapika vomuKaldea. Nemoniko nde li mona ola efa nge. 25 Ndele ame nda udifila ovapika eendjovo adishe dOmwene, e di talifa nge.
© Oshikwanyama Bible Revised © Bible Society of Namibia, 2008, 2012.
